ന്യൂഡൽഹി: ഇന്ത്യൻ വ്യോമസേനയുടെ കരുത്ത് വർദ്ധിപ്പിക്കുന്നതിനായി 114 പുതിയ റഫാൽ യുദ്ധവിമാനങ്ങൾ കൂടി വാങ്ങാനുള്ള പ്രതിരോധ നടപടികളുമായി ഇന്ത്യ അതിവേഗം മുന്നോട്ട്. ഇതിന്റെ ഭാഗമായി ഇന്ത്യൻ വ്യോമസേനാ മേധാവി എയർ ചീഫ് മാർഷൽ അമർ പ്രീത് സിംഗ് നാല് ദിവസത്തെ ഔദ്യോഗിക സന്ദർശനത്തിനായി ഫ്രാൻസിലെത്തി (India Buying 114 Rafale Fighter Jets). വ്യോമസേനയുടെ ചരിത്രത്തിലെ തന്നെ ഏറ്റവും വലിയ യുദ്ധവിമാന സംഭരണ പദ്ധതികളിലൊന്നാണിത്. വിമാനങ്ങൾ വാങ്ങുന്നതുമായി ബന്ധപ്പെട്ട ഔദ്യോഗിക നിർദ്ദേശം ഇന്ത്യ ഫ്രാൻസിന് കൈമാറിക്കഴിഞ്ഞതായും വില, ഉൽപ്പാദന ശേഷി, ലോജിസ്റ്റിക്സ് പിന്തുണ എന്നിവ വ്യക്തമാക്കിക്കൊണ്ടുള്ള ഫ്രാൻസിന്റെ മറുപടി അടുത്ത രണ്ട് മൂന്ന് മാസങ്ങൾക്കുള്ളിൽ ലഭ്യമാകുമെന്നും പ്രതിരോധ മന്ത്രാലയ വൃത്തങ്ങൾ സൂചിപ്പിച്ചു. ഇരുരാജ്യങ്ങളും തമ്മിലുള്ള ഔദ്യോഗിക ചർച്ചകൾ ഉടൻ ആരംഭിച്ച് ഒരു വർഷത്തിനുള്ളിൽ കരാർ ഒപ്പിടാൻ സാധിക്കുമെന്നാണ് ഉദ്യോഗസ്ഥരുടെ പ്രതീക്ഷ.
വ്യോമസേനാ മേധാവിയുടെ ഈ ഫ്രഞ്ച് സന്ദർശനം കേവലം ഔപചാരികമല്ലെന്നാണ് വിലയിരുത്തപ്പെടുന്നത്. റഫാൽ നിർമ്മാതാക്കളായ ദസ്സാൾട്ട് ഏവിയേഷൻ, പ്രമുഖ മിസൈൽ നിർമ്മാണ കമ്പനിയായ എംബിഡിഎ എന്നിവയുടെ തലപ്പത്തുള്ളവരുമായി അദ്ദേഹം ചർച്ചകൾ നടത്തും. വിമാനങ്ങൾ വാങ്ങുന്നതിനപ്പുറം ഇന്ത്യയിലെ പ്രാദേശിക ഉൽപ്പാദനം, സാങ്കേതിക സഹകരണം, ഇന്ത്യൻ നിർമ്മിത ആയുധങ്ങൾ വിമാനങ്ങളിൽ ഘടിപ്പിക്കൽ എന്നിവയും ഈ കൂടിക്കാഴ്ചയിൽ അജണ്ടയാകും. കൂടാതെ ജൂൺ പകുതിയോടെ പ്രധാനമന്ത്രി നരേന്ദ്ര മോദി ഫ്രാൻസ് സന്ദർശിച്ചേക്കുമെന്നും ഈ വേളയിൽ ഗവൺമെന്റ്-ടു-ഗവൺമെന്റ് മാതൃകയിലുള്ള ഈ റഫാൽ കരാർ മുഖ്യ ചർച്ചാവിഷയമാകുമെന്നും റിപ്പോർട്ടുകളുണ്ട്. പഴയ മിഗ്-21 വിമാനങ്ങൾ ഘട്ടംഘട്ടമായി ഒഴിവാക്കിയതോടെ വ്യോമസേനയിൽ വിമാന സ്ക്വാഡ്രനുകളുടെ എണ്ണത്തിൽ വലിയ കുറവുണ്ടായതാണ് പുതിയ മൾട്ടിറോൾ യുദ്ധവിമാനങ്ങൾ വാങ്ങാൻ ഇന്ത്യയെ പ്രേരിപ്പിച്ചത്.
ഈ കരാറിന്റെ ഏറ്റവും ശ്രദ്ധേയമായ വശം ‘മേക്ക് ഇൻ ഇന്ത്യ’ പദ്ധതിക്ക് കീഴിൽ 114 വിമാനങ്ങളിൽ 94 എണ്ണവും ഇന്ത്യയിൽ തന്നെ നിർമ്മിക്കും എന്നതാണ്. ബാക്കിയുള്ള 20 വിമാനങ്ങൾ ഫ്രാൻസിൽ നിന്ന് നേരിട്ട് ഇറക്കുമതി ചെയ്യും. ഇതിനായി ദസ്സാൾട്ട് ഏവിയേഷൻ ഒരു ഇന്ത്യൻ കമ്പനിയുമായി പങ്കാളിത്തത്തിൽ ഏർപ്പെടും. പദ്ധതിയിൽ അൻപത് ശതമാനം തദ്ദേശീയവൽക്കരണം പ്രതിരോധ മന്ത്രാലയം ലക്ഷ്യമിടുന്നുണ്ട്. ഇന്ത്യക്ക് നിലവിൽ 36 റഫാൽ വിമാനങ്ങളാണുള്ളത്. കൂടാതെ നാവികസേനയ്ക്കായി 26 റഫാൽ-എം വിമാനങ്ങൾ വാങ്ങാനുള്ള കരാർ നേരത്തെ ഒപ്പിട്ടിരുന്നു. പുതിയ 114 വിമാനങ്ങൾ കൂടി എത്തുന്നതോടെ ഇന്ത്യയുടെ റഫാൽ ശേഖരം 176 ആയി ഉയരുകയും ചൈന, പാകിസ്ഥാൻ അതിർത്തികളിൽ ഇന്ത്യൻ വ്യോമസേനയുടെ പ്രതിരോധ ശേഷി ഗണ്യമായി വർദ്ധിക്കുകയും ചെയ്യും.
Summary: Indian Air Force Chief Air Chief Marshal Amar Preet Singh has arrived in France for a crucial four-day visit to advance the procurement of 114 additional Rafale fighter jets. Under this landmark Government-to-Government proposal, 94 of the 114 multirole aircraft are planned to be manufactured within India under the Make in India initiative. This significant fleet expansion will eventually bring India’s total Rafale count to 176, significantly boosting its aerial capabilities on both the China and Pakistan fronts.
