മുല്ലൻപൂർ: ഐപിഎൽ 2026 എലിമിനേറ്റർ മത്സരത്തിൽ സൺറൈസേഴ്സ് ഹൈദരാബാദിനെതിരെ വെറും 29 പന്തിൽ 97 റൺസ് നേടി ക്രിക്കറ്റ് ലോകത്തെ അത്ഭുതപ്പെടുത്തിയ രാജസ്ഥാൻ റോയൽസിന്റെ 15-കാരൻ വിസ്മയം വൈഭവ് സൂര്യവംശി വാർത്തകളിൽ നിറയുന്നു ( Sunil Gavaskar Message To Vaibhav Sooryavanshi). മത്സരത്തിന് തൊട്ടുമുമ്പ് ഇന്ത്യൻ ക്രിക്കറ്റ് ഇതിഹാസം സുനിൽ ഗാവസ്കറുടെ പാദം തൊട്ട് സൂര്യവംശി അനുഗ്രഹം വാങ്ങുന്ന ദൃശ്യങ്ങൾ സോഷ്യൽ മീഡിയയിൽ തരംഗമായിരുന്നു. മുതിർന്നവരെ ബഹുമാനിക്കുന്ന ഇന്ത്യൻ സംസ്കാരത്തിന്റെ ഭാഗമായാണ് താൻ കളിക്ക് മുൻപ് ഗാവസ്കറുടെ അനുഗ്രഹം തേടിയതെന്ന് താരം വ്യക്തമാക്കി. ആ സമയത്ത് കൂടുതൽ സംസാരിക്കാൻ കഴിഞ്ഞില്ലെങ്കിലും ഗാവസ്കർ തനിക്ക് നൽകിയ ഹ്രസ്വമായ ഒരു സന്ദേശം മത്സരത്തിൽ വലിയ ഊർജ്ജമായെന്ന് വൈഭവ് വെളിപ്പെടുത്തി.
തന്റെ പാദം തൊട്ട് വന്ദിച്ച വൈഭവിനോട് ‘ലഗേ രഹോ ബേട്ടേ’ (തുടരുക മകനേ) എന്ന് മാത്രമാണ് താൻ പറഞ്ഞതെന്ന് ഒരു അഭിമുഖത്തിൽ സുനിൽ ഗാവസ്കർ പിന്നീട് സ്ഥിരീകരിച്ചു. വൈഭവ് സൂര്യവംശിയുടെ ഭയമില്ലാത്ത ബാറ്റിംഗ് ശൈലിയെ പ്രശംസിച്ച ഗാവസ്കർ, താരം ഇപ്പോൾ തന്നെ അന്താരാഷ്ട്ര ടി20 ക്രിക്കറ്റ് കളിക്കാൻ യോഗ്യനാണെന്ന് അഭിപ്രായപ്പെട്ടു. പ്രായം ഒരു ഘടകമാക്കാതെ വരാനിരിക്കുന്ന ഇംഗ്ലണ്ട് പര്യടനത്തിനുള്ള ഇന്ത്യൻ ടി20 ടീമിലേക്ക് ഈ യുവതാരത്തെ തിരഞ്ഞെടുക്കണമെന്നും അദ്ദേഹം സെലക്ടർമാരോട് ആവശ്യപ്പെട്ടു. രാജ്യാന്തര തലത്തിൽ 15 വർഷത്തെ പരിചയസമ്പത്തുള്ള ബൗളർമാരെയാണ് 15 വയസ്സ് മാത്രം പ്രായമുള്ള ഈ കുട്ടി അനായാസം സിക്സറുകൾ പറത്തുന്നതെന്നും ഗാവസ്കർ കൂട്ടിച്ചേർത്തു.
Summary: During the IPL 2026 Eliminator match, Rajasthan Royals’ 15-year-old prodigy Vaibhav Sooryavanshi sought blessings from cricket legend Sunil Gavaskar by touching his feet. Gavaskar revealed that his brief, encouraging message to the youngster was ‘lage raho’ (keep at it), which motivated the batter to smash a brilliant 97 off just 29 balls. Highly impressed by his fearless approach, Gavaskar strongly backed the teenager for an immediate debut in the Indian T20 International team for the upcoming England tour.
