തിരുവനന്തപുരം: ജോലിസ്ഥലത്ത് അതിക്രമിച്ചുകയറി യുവതിയെ കഴുത്തുഞെരിച്ച് കൊലപ്പെടുത്താൻ ശ്രമിച്ച കേസിൽ പ്രതിയെ കരമന പോലീസ് അറസ്റ്റ് ചെയ്തു (Karamana salesgirl attack case). മരുതൂർക്കടവ്, കുളത്തറ, വാഴവിളാകം മേലിട്ടുവീട്ടിൽ ബിനുവിന്റെ മകൻ രാഹുൽ (28) ആണ് പിടിയിലായത്.
കഴിഞ്ഞ തിങ്കളാഴ്ച രാവിലെ 10:45 ഓടെ കാലടി, വാഴവിളാകം ഭാഗത്തുള്ള ഒരു സ്വകാര്യ സ്ഥാപനത്തിലായിരുന്നു നാടിനെ നടുക്കിയ സംഭവം നടന്നത്. ഈ സ്ഥാപനത്തിൽ സെയിൽസ് ഗേൾ ആയി ജോലി ചെയ്യുന്ന യുവതിക്ക് നേരെയായിരുന്നു രാഹുലിന്റെ അക്രമം. പോലീസ് നൽകുന്ന വിവരങ്ങൾ പ്രകാരം മുൻവൈരാഗ്യമാണ് അക്രമത്തിന് പിന്നിലെ കാരണം.
തിങ്കളാഴ്ച രാവിലെ സ്ഥാപനത്തിന് മുന്നിലെത്തിയ പ്രതി യുവതിയെ പരസ്യമായി അസഭ്യം പറയുകയും ബഹളം വെക്കുകയും ചെയ്തു. യുവാവ് പ്രശ്നമുണ്ടാക്കിയതോടെ അവിടെനിന്നും പോകാൻ യുവതി ആവശ്യപ്പെട്ടു. ഇതിൽ പ്രകോപിതനായ പ്രതി കൈവശം കരുതിയിരുന്ന കമ്പിവടിയുമായി സ്ഥാപനത്തിനുള്ളിലേക്ക് അതിക്രമിച്ചു കയറുകയായിരുന്നു.
ഉള്ളിൽക്കയറിയ പ്രതി യുവതിയുടെ കഴുത്തിൽ കുത്തിപ്പിടിച്ച് നിലത്തേക്ക് തള്ളിയിട്ടു. തുടർന്ന് കമ്പിവടി വീശി സ്ഥാപനത്തിനുള്ളിൽ ഭീകരാന്തരീക്ഷം സൃഷ്ടിച്ച പ്രതി, യുവതിയെ കൊലപ്പെടുത്താൻ ശ്രമിക്കുകയായിരുന്നുവെന്ന് പോലീസ് വ്യക്തമാക്കുന്നു.
അക്രമത്തിന് ശേഷം സംഭവസ്ഥലത്തുനിന്നും പ്രതി രാഹുൽ ഒളിവിൽ പോയിരുന്നു. യുവതിയുടെ പരാതിയിൽ വധശ്രമത്തിന് കേസെടുത്ത കരമന പോലീസ് പ്രത്യേക സംഘം രൂപീകരിച്ച് നടത്തിയ തന്ത്രപരമായ നീക്കത്തിനൊടുവിലാണ് പ്രതിയെ വലയിലാക്കിയത്.ഇയാളെ സ്റ്റേഷനിലെത്തിച്ച് വിശദമായി ചോദ്യം ചെയ്ത ശേഷം കോടതിയിൽ ഹാജരാക്കി. കോടതി പ്രതിയെ വരും ദിവസങ്ങളിലേക്ക് റിമാൻഡ് ചെയ്ത് ജയിലിലടച്ചു.
Story Summary : The Karamana police have arrested a notorious history-sheeter for components of trespassing and attempting to murder a 24-year-old woman at her workplace. The accused, identified as Rahul (28), a native of Maruthurkadavu, entered a private firm in Kalady where the victim works as a salesgirl. Following a prior dispute, Rahul verbally abused her and subsequently assaulted her with an iron rod, grabbing her neck and pinning her down. After a brief period on the run, the police tracked down and apprehended him. Rahul has been produced before the court and remanded into judicial custody.
