ടെഹ്റാൻ: അമേരിക്കയും ഇറാനും തമ്മിൽ അതിർത്തികളിൽ വീണ്ടും മിന്നലാക്രമണങ്ങൾ വച്ചുമാറിയതോടെ പശ്ചിമേഷ്യയിലെ താൽക്കാലിക വെടിനിർത്തൽ കരാർ ചർച്ചകൾ പൂർണ്ണമായി പ്രതിസന്ധിയിലായി (US Iran War). ഇറാനിലെ വ്യോമതാവളങ്ങൾക്ക് നേരെ യുഎസ് സൈന്യം പുതിയ ബോംബാക്രമണങ്ങൾ നടത്തിയതിന് പിന്നാലെ, തങ്ങളുടെ നേർക്കുണ്ടായ മിസൈൽ ആക്രമണങ്ങൾക്ക് തിരിച്ചടിയായി യുഎസ് എയർബേസ് ലക്ഷ്യമിട്ട് പ്രത്യാക്രമണം നടത്തിയതായി ഇറാൻ സ്ഥിരീകരിച്ചു.
ഹോർമുസ് കടലിടുക്ക് വീണ്ടും തുറക്കുന്നതുമായി ബന്ധപ്പെട്ട് ഇരുരാജ്യങ്ങളും തമ്മിൽ ധാരണയിലെത്തിയെന്ന ഇറാന്റെ റിപ്പോർട്ടുകൾ യുഎസ് പ്രസിഡന്റ് ഡൊണാൾഡ് ട്രംപ് തള്ളിക്കളഞ്ഞു. അതിനിടെ അന്താരാഷ്ട്ര ജലാശയമായ ഹോർമുസ് കടലിടുക്കിന്റെ നിയന്ത്രണം ആർക്കും വിട്ടുനൽകില്ലെന്നും, അമേരിക്കൻ നിർദ്ദേശങ്ങൾ ലംഘിച്ചാൽ ഒമാനെപ്പോലും തകർക്കുമെന്നുമുള്ള ട്രംപിന്റെ ഭീഷണി നിലനിൽക്കെ ഒമാന് പൂർണ്ണ പിന്തുണ പ്രഖ്യാപിച്ച് ഇറാന്റെ വിദേശകാര്യ മന്ത്രാലയം രംഗത്തെത്തി. മറുവശത്ത്, തെക്കൻ ലെബനനിലെ ഹിസ്ബുള്ള കേന്ദ്രങ്ങൾക്ക് നേരെ ഇസ്രായേൽ നൂറിലധികം വ്യോമാക്രമണങ്ങൾ നടത്തിയതോടെ അവിടെ നിലനിന്നിരുന്ന വെടിനിർത്തലും ലംഘിക്കപ്പെട്ടു.
ഈ പുതിയ യുദ്ധസാഹചര്യങ്ങൾ ആഗോള വിപണിയിൽ വലിയ രീതിയിലുള്ള സാമ്പത്തിക പ്രത്യാഘാതങ്ങളാണ് ഉണ്ടാക്കിക്കൊണ്ടിരിക്കുന്നത്. പശ്ചിമേഷ്യൻ സംഘർഷം കടുക്കുമെന്ന ആശങ്കയെത്തുടർന്ന് രാജ്യാന്തര വിപണിയിൽ ക്രൂഡ് ഓയിൽ വില 2.5 ശതമാനത്തിലധികം വർദ്ധിച്ച് ബാരലിന് 97 ഡോളറിലേക്ക് കുതിച്ചുയർന്നു. എണ്ണവിലയിലുണ്ടായ ഈ വർദ്ധനവ് യൂറോപ്യൻ ഓഹരി വിപണികളിൽ വലിയ ഇടിവുണ്ടാക്കിയതിനൊപ്പം എയർ ഫ്രാൻസ്, റയൻഎയർ തുടങ്ങിയ പ്രമുഖ വിമാനക്കമ്പനികളുടെ ഓഹരികളെയും പ്രതികൂലമായി ബാധിച്ചു. യുദ്ധം പെട്ടെന്ന് അവസാനിച്ചാൽ പോലും ഇന്ധനവിലയിലുണ്ടായ ഈ ആഘാതം കാരണം ആഗോള വിപണിയിൽ ദീർഘകാലത്തേക്ക് പണപ്പെരുപ്പംനിലനിൽക്കുമെന്ന് യൂറോപ്യൻ സെൻട്രൽ ബാങ്ക് ചീഫ് ഇക്കണോമിസ്റ്റ് ഫിലിപ്പ് ലെയ്ൻ മുന്നറിയിപ്പ് നൽകി. അതേസമയം, യുദ്ധ സാഹചര്യങ്ങളുടെ ഭാഗമായി ഇറാനിൽ കഴിഞ്ഞ 90 ദിവസമായി ഏർപ്പെടുത്തിയിരുന്ന ഇന്റർനെറ്റ് നിരോധനം പ്രസിഡന്റ് മസൂദ് പെസെഷ്കിയാൻ ഭാഗികമായി നീക്കിയതോടെ ഇവിടുത്തെ സാമൂഹിക മാധ്യമങ്ങൾ വീണ്ടും സജീവമായിട്ടുണ്ട്.
Summary: Hostilities have escalated as the US and Iran exchanged retaliatory military strikes, dimming hopes for a diplomatic resolution to reopen the crucial Strait of Hormuz. US President Donald Trump dismissed reports of a peace deal, while global crude oil prices surged over 2.5 percent to reach $97 a barrel following the attacks. The renewed Middle East conflict has triggered a drop in European stock markets and prompted warnings from the ECB regarding prolonged economic inflation.
