അഹമ്മദാബാദ്: ആഫ്രിക്കൻ രാജ്യമായ ഡെമോക്രാറ്റിക് റിപ്പബ്ലിക് ഓഫ് കോംഗോയിൽ നിന്ന് ഇന്ത്യയിലെത്തിയ മുപ്പത്തിയേഴുകാരനായ വ്യവസായിയെ എബോള വൈറസ് ബാധ സംശയിച്ച് അഹമ്മദാബാദിലെ സിവിൽ ആശുപത്രിയിലെ പ്രത്യേക ഐസൊലേഷൻ വാർഡിൽ പ്രവേശിപ്പിച്ചു (Ebola Suspect Ahmedabad). പത്തു ദിവസം മുൻപ് മുംബൈയിൽ വിമാനമിറങ്ങിയ ഇദ്ദേഹം ബിസിനസ് ആവശ്യങ്ങൾക്കായി ഗുജറാത്തിലെ വഡോദരയിലേക്കും അവിടെ നിന്ന് കേന്ദ്രഭരണ പ്രദേശമായ സിൽവാസയിലേക്കും യാത്ര ചെയ്തിരുന്നു. കഴിഞ്ഞ ആറു ദിവസമായി കടുത്ത പനിയും മറ്റ് ശാരീരിക അസ്വസ്ഥതകളും പ്രകടിപ്പിച്ചതിനെ തുടർന്ന് വഡോദരയിലെ സ്വകാര്യ ആശുപത്രിയിൽ ചികിത്സ തേടുകയായിരുന്നു. ഇവിടെ വെച്ച് ഇയാൾ കോംഗോയിൽ നിന്ന് വന്നതാണെന്ന വിവരം പുറത്തറിഞ്ഞതോടെയാണ് കനത്ത ജാഗ്രതയോടെ അഹമ്മദാബാദിലെ എബോള പ്രത്യേക വാർഡിലേക്ക് മാറ്റിയത്.
രോഗലക്ഷണങ്ങൾ പ്രകടിപ്പിച്ച വ്യക്തിയുമായി അടുത്ത സമ്പർക്കം പുലർത്തിയ മൂന്ന് പേരെ അധികൃതർ തിരിച്ചറിയുകയും മുൻകരുതലിന്റെ ഭാഗമായി ഇവരെ എസ്.വി.പി ആശുപത്രിയിൽ ഐസൊലേഷനിൽ പ്രവേശിപ്പിക്കുകയും ചെയ്തിട്ടുണ്ട്. രോഗിയുടെ സാമ്പിളുകൾ അടിയന്തരമായി പുണെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് വിശദമായ പരിശോധനയ്ക്കായി അയച്ചിരിക്കുകയാണ്. ഇതിന്റെ അന്തിമ ഫലം വരാൻ 24 മുതൽ 48 മണിക്കൂർ വരെ സമയമെടുക്കുമെന്ന് ആരോഗ്യവകുപ്പ് വ്യക്തമാക്കി. നിലവിൽ ആശങ്കപ്പെടേണ്ട സാഹചര്യമില്ലെന്നും രോഗബാധ ആർക്കും സ്ഥിരീകരിച്ചിട്ടില്ലെന്നും വെറും മുൻകരുതൽ നടപടികൾ മാത്രമാണ് സ്വീകരിക്കുന്നതെന്നും ഗുജറാത്ത് ആരോഗ്യ മന്ത്രാലയം അറിയിച്ചു. ആഫ്രിക്കൻ രാജ്യങ്ങളിൽ എബോള വീണ്ടും റിപ്പോർട്ട് ചെയ്ത പശ്ചാത്തലത്തിൽ രാജ്യത്തെ പ്രധാന വിമാനത്താവളങ്ങളിൽ പരിശോധന കർശനമാക്കാനും വിദേശത്തുനിന്ന് എത്തുന്ന യാത്രക്കാരെ നിരീക്ഷിക്കാനും പ്രത്യേക മെഡിക്കൽ സംഘങ്ങളെ നിയോഗിച്ചിട്ടുണ്ട്.
Summary: A 37-year-old businessman from the Democratic Republic of Congo has been admitted to Ahmedabad Civil Hospital over suspected Ebola symptoms. The patient had traveled across Mumbai, Vadodara, and Silvassa before being isolated with severe fever and related complications. His samples have been sent to the National Institute of Virology in Pune for confirmation, while three close contacts have been quarantined as a precautionary measure.
