കൊച്ചി: ആഭ്യന്തര-അന്താരാഷ്ട്ര വിമാന യാത്രക്കാർക്കായി ആകർഷകമായ ഓഫറുകളുമായി എയർ ഇന്ത്യ എക്സ്പ്രസ് (Air India Express sale offers). ‘എക്സ്പ്രസ് സെയിൽ’ (Express Sale) എന്ന പേരിൽ ആരംഭിച്ചിരിക്കുന്ന ഈ പുതിയ പദ്ധതിയിലൂടെ 50 ലക്ഷം സീറ്റുകളിൽ 50 ശതമാനം വരെയാണ് കമ്പനി വിലക്കിഴിവ് പ്രഖ്യാപിച്ചിരിക്കുന്നത്. ജൂൺ 15 മുതൽ ഒക്ടോബർ 10 വരെയുള്ള കാലയളവിലെ യാത്രകൾക്കായി മേയ് 31-നകം ടിക്കറ്റ് ബുക്ക് ചെയ്യുന്നവർക്കാണ് ഈ വമ്പൻ ഇളവ് ലഭിക്കുക.
എക്സ്പ്രസ് ലൈറ്റ് (Express Lite), എക്സ്പ്രസ് വാല്യൂ (Express Value) എന്നീ നിരക്കുകളിലാണ് 50 ശതമാനം വരെ ഡിസ്ക്കൗണ്ട് ലഭ്യമാക്കിയിട്ടുള്ളത്. ഈ ഓഫർ കാലയളവിൽ എയർ ഇന്ത്യ എക്സ്പ്രസ് ഔദ്യോഗിക വെബ്സൈറ്റിലൂടെയോ മൊബൈൽ ആപ്പിലൂടെയോ ടിക്കറ്റ് ബുക്ക് ചെയ്യുന്ന യാത്രക്കാരിൽ നിന്നും പ്രത്യേക കൺവീനിയൻസ് ഫീ ഈടാക്കില്ല എന്ന വലിയ പ്രത്യേകതയുമുണ്ട്.
ബിസിനസ് ക്ലാസിന് തത്തുല്യമായ പ്രീമിയം ‘ബിസ്’ (Xpress Biz) വിഭാഗത്തിൽ ടിക്കറ്റെടുക്കുന്ന ടാറ്റ ന്യൂപാസ് (Tata NeuPass) അംഗങ്ങൾക്ക് 20 ശതമാനം വരെ പ്രത്യേക ഡിസ്ക്കൗണ്ടും എക്സ്പ്രസ് എഹെഡ് മുൻഗണന സേവനങ്ങളും ലഭ്യമാകും. ഇതിനൊപ്പം 300 രൂപ വരെയുള്ള അധിക കിഴിവും എട്ട് ശതമാനം വരെ ന്യൂ കോയിനുകളും ഇവർക്ക് സ്വന്തമാക്കാം. യാത്രക്കാർക്ക് ഇഷ്ടമുള്ള സീറ്റ്, മുൻകൂട്ടി ഓർഡർ ചെയ്യുന്ന ഭക്ഷണം, 10 കിലോ അധിക ചെക്ക്-ഇൻ ബാഗേജ്, 3 കിലോ അധിക ഹാൻഡ് ബാഗേജ് എന്നിവയ്ക്ക് 30 ശതമാനം വരെ ഡിസ്കൗണ്ടും പദ്ധതിയുടെ ഭാഗമായി ഒരുക്കിയിട്ടുണ്ട്.
വിദ്യാർഥികൾ, മുതിർന്ന പൗരന്മാർ, സായുധ സേനാംഗങ്ങൾ, അവരുടെ ആശ്രിതർ എന്നിവർക്കും എയർ ഇന്ത്യ എക്സ്പ്രസ് വെബ്സൈറ്റിലൂടെ പ്രത്യേക ആനുകൂല്യങ്ങളോടെ ടിക്കറ്റുകൾ ലഭ്യമാകും. എയർ ഇന്ത്യ എക്സ്പ്രസിന്റെ മികച്ച സേവനങ്ങളും ആതിഥ്യ മര്യാദയും വ്യക്തമാക്കിക്കൊണ്ട് ബോളിവുഡ് താരം പങ്കജ് ത്രിപാഠി മുഖ്യവേഷത്തിൽ എത്തിയ ‘എക്സ്പ്രസ് വാലി ബാത് ഹെ’ ക്യാമ്പയിൻ ഇതിനകം 300 മില്യണിലധികം കാഴ്ചക്കാരുമായി വലിയ വിജയമായി മുന്നേറുകയാണ്.
Story Summary: Air India Express has launched its ‘Express Sale’ offering up to 50% discount on 50 lakh seats for domestic and international travel. Valid for bookings made until May 31 for travel between June 15 and October 10, the offer includes zero convenience fees on website and app bookings.
