കോഴിക്കോട്: വടകരയിൽ വീട്ടുകാരെ മാരകവിഷമുള്ള മൂർഖൻ പാമ്പിൽ നിന്നും അദ്ഭുതകരമായി രക്ഷിച്ച് വളർത്തു പൂച്ചകൾ. വടകര മന്തരത്തൂരിലെ കുഴിച്ചാലിൽ സുനിതയുടെ വീട്ടിലാണ് വളർത്തു പൂച്ചകളുടെ കൃത്യമായ ഇടപെടൽ കാരണം വലിയൊരു ദുരന്തം ഒഴിവായത്. വീടിന്റെ അടുക്കളയിൽ കയറി ഗ്യാസ് സിലിണ്ടറിന് സമീപം നിലയുറപ്പിച്ച മൂർഖൻ പാമ്പിനെയാണ് പൂച്ചകൾ സമർത്ഥമായി നേരിട്ടതും വീട്ടുകാരുടെ ശ്രദ്ധയിൽപ്പെടുത്തിയതും.(Pet Cats Save Family From Deadly Cobra Inside Kitchen In Vadakara Kozhikode)
സംഭവസമയത്ത് സുനിത വസ്ത്രങ്ങൾ അലക്കുന്നതിനായി വീടിന് പുറത്തേക്ക് ഇറങ്ങിയതായിരുന്നു. ഈ സമയത്ത് വീട്ടിൽ ആളനക്കമില്ലാത്തത് നോക്കിയാണ് മൂർഖൻ പാമ്പ് അടുക്കള ഭാഗത്തേക്ക് കയറിയത്. എന്നാൽ ഇത് ശ്രദ്ധയിൽപ്പെട്ട വീട്ടിലെ രണ്ട് വളർത്തു പൂച്ചകൾ പാമ്പിനെ വിടാതെ പിന്തുടർന്നു. പാമ്പ് സിലിണ്ടറിന് പിന്നിൽ ഒളിച്ചതോടെ ഒരു പൂച്ച അതിനെത്തന്നെ സൂക്ഷ്മമായി നിരീക്ഷിച്ച് അവിടെ നിലയുറപ്പിച്ചു. രണ്ടാമത്തെ പൂച്ച പുറത്തുണ്ടായിരുന്ന സുനിതയുടെ അടുത്തെത്തി അസ്വാഭാവികമായ രീതിയിൽ ശബ്ദമുണ്ടാക്കുകയും പെരുമാറുകയും ചെയ്തു.
പൂച്ചയുടെ തുടർച്ചയായുള്ള അസ്വാഭാവിക പെരുമാറ്റത്തിൽ സംശയം തോന്നിയ സുനിതയും വീട്ടുകാരും അടുക്കളയിൽ കയറി പരിശോധിച്ചപ്പോഴാണ് ഗ്യാസ് സിലിണ്ടറിന് സമീപം പത്തിവിടർത്തി നിൽക്കുന്ന വലിയ മൂർഖൻ പാമ്പിനെ കണ്ടത്. ഭയന്നുപോയ വീട്ടുകാർ ഉടൻ തന്നെ അയൽവാസികളെയും വാർഡ് മെമ്പറെയും വിവരമറിയിക്കുകയായിരുന്നു. തുടർന്ന് വിവരമറിഞ്ഞ് വനംവകുപ്പിന്റെ ആർ.ആർ.ടി സംഘത്തിന്റെ നിർദ്ദേശപ്രകാരം സ്നേക്ക് റെസ്ക്യൂവർ മുതുവന സ്വദേശി അമീർ സ്ഥലത്തെത്തി. മൂർഖൻ പാമ്പിനെ സുരക്ഷിതമായി പിടികൂടി ചാക്കിലാക്കി.
Story Summary
Two pet cats saved a family from a venomous cobra in Vadakara, Kozhikode. The snake entered the kitchen and hid near the gas cylinder, but the cats alerted the owner through unusual behavior, leading to the safe capture of the snake by an RRT snake rescuer.
