കൊൽക്കത്ത: പശ്ചിമ ബംഗാളിൽ ഭരണകക്ഷിയായ തൃണമൂൽ കോൺഗ്രസിനെ (TMC) പ്രതിസന്ധിയിലാക്കി മുതിർന്ന നേതാവും ബരാസത് എംപിയുമായ കകോലി ഘോഷ് ദസ്തിദാർ പാർട്ടി പദവികൾ രാജിവെച്ചു. തൃണമൂൽ കോൺഗ്രസിന്റെ ലോക്സഭയിലെ ചീഫ് വിപ്പ് സ്ഥാനത്തുനിന്ന് കഴിഞ്ഞ ദിവസം ഇവരെ നീക്കിയിരുന്നു. ഇതിന് പിന്നാലെയാണ് ഓർഗനൈസേഷണൽ ഡിസ്ട്രിക്റ്റ് പ്രസിഡന്റ്, പാർട്ടി മഹിളാ വിഭാഗം അധ്യക്ഷ എന്നീ പദവികളിൽ നിന്നുള്ള കകോലി ഘോഷിന്റെ അപ്രതീക്ഷിത രാജി.(TMC MP Kakoli Ghosh Dastidar Resigns From Party Posts Slams IPAC And Government Corruption)
പാർട്ടിയുടെ തെരഞ്ഞെടുപ്പ് തന്ത്രങ്ങൾ രൂപീകരിക്കാൻ കരാറെടുത്ത രാഷ്ട്രീയ കൺസൾട്ടൻസി സ്ഥാപനമായ ഐ-പാക്കിനെതിരെ രൂക്ഷവിമർശനം ഉന്നയിച്ചാണ് രാജി. ഐ-പാക് തൃണമൂൽ കോൺഗ്രസിനെ പൂർണ്ണമായും നശിപ്പിച്ചുവെന്ന് കകോലി ആരോപിച്ചു. പാർട്ടി ബംഗാൾ അധ്യക്ഷനാണ് ഇവർ രാജിപ്പത്രങ്ങൾ കൈമാറിയത്.
“പാർട്ടി തകർന്നടിയാൻ കാരണം ആ ഏജൻസിയാണ് (ഐ-പാക്). ഞാൻ 40-45 വർഷമായി സജീവ രാഷ്ട്രീയത്തിലുള്ള ആളാണ്. ഇപ്പോൾ കൺസൾട്ടൻസി സ്ഥാപനത്തിലെ 22-ഉം 23-ഉം വയസ്സുള്ള കുട്ടികൾ വന്ന് എന്നെ ഭീഷണിപ്പെടുത്തുന്നു, എന്ത് ചെയ്യണമെന്ന് അവർ നിർദ്ദേശിക്കുന്നു. പാർട്ടി ചെയർപേഴ്സൺ മമതാ ബാനർജിയോട് എനിക്ക് ഒന്നേ പറയാനുള്ളൂ; ഇത്തരം താൽക്കാലിക ഏജൻസികളെ വിട്ട് പഴയതും വിശ്വസ്തരുമായ പാർട്ടി പ്രവർത്തകരെ വിശ്വസിക്കുക,” കകോലി ഘോഷ് മാധ്യമങ്ങളോട് തുറന്നടിച്ചു.
ബംഗാളിലെ മമതാ ബാനർജി സർക്കാരിന്റെ ഭരണപരാജയത്തെയും അഴിമതികളെയും കകോലി ഘോഷ് രാജിപ്പത്തിൽ ചോദ്യം ചെയ്തിട്ടുണ്ട്. അടുത്തിടെ ബംഗാളിലുണ്ടായ കുറ്റകൃത്യങ്ങളും അഴിമതികളും പൊതുജനങ്ങളിൽ വലിയ ആശങ്കയുണ്ടാക്കിയിട്ടുണ്ടെന്നും ജനാധിപത്യം ശക്തമാകാൻ ഭരണത്തിൽ സുതാര്യതയും ഉത്തരവാദിത്തവും അനിവാര്യമാണെന്നും അവർ ഓർമ്മിപ്പിച്ചു. 1976 മുതൽ മമതയുമായി വ്യക്തിബന്ധമുള്ള കകോലി, നാല് പതിറ്റാണ്ടിന്റെ വിശ്വസ്തതയ്ക്കുള്ള പ്രതിഫലമാണ് തനിക്ക് ഇപ്പോൾ ലഭിച്ചതെന്ന് സോഷ്യൽ മീഡിയയിലൂടെ പരിഹസിച്ചിരുന്നു.
കകോലി ഘോഷ് ദസ്തിദാർ എംപി സ്ഥാനവും രാജിവെച്ചേക്കുമെന്ന് അവരുടെ മകൻ ബൈദ്യനാഥ് ഘോഷ് ദസ്തിദാർ മാധ്യമങ്ങളോട് വ്യക്തമാക്കി. മമതാ സർക്കാരിന്റെ തുടർച്ചയായ അഴിമതികൾ തങ്ങളുടെ കുടുംബത്തിന്റെ അന്തസ്സിന് കളങ്കമുണ്ടാക്കുന്നതായും അദ്ദേഹം പറഞ്ഞു. ബരാസത് മണ്ഡലത്തിലെ ഏഴ് നിയമസഭാ സീറ്റുകളിൽ ആറിലും ടിഎംസി ഇത്തവണ തോറ്റു. അതിന്റെ ധാർമ്മിക ഉത്തരവാദിത്തം ഏറ്റെടുത്താണ് അമ്മ പദവികൾ ഒഴിഞ്ഞത്. പാർത്ഥാ ചാറ്റർജിയുടെ തൊഴിൽ കുംഭകോണം, ജ്യോതിപ്രിയ മല്ലിക്കിന്റെ റേഷൻ അഴിമതി, ആർ.ജി കർ മെഡിക്കൽ കോളേജ് സംഭവം എന്നിവയെല്ലാം ഞങ്ങൾ കണ്ടു. ഒരു മാന്യമായ കുടുംബത്തിൽ നിന്നുള്ള ഞങ്ങൾ എത്രകാലമാണ് ഈ അഴിമതികൾക്ക് കൂട്ടുനിൽക്കുക? അമ്മ ബിജെപിയിൽ ചേരുന്നതിനെക്കുറിച്ചല്ല ഇത്, അഴിമതിക്കെതിരെയുള്ള അമ്മയുടെ ശക്തമായ നിലപാടാണ്, ബൈദ്യനാഥ് വ്യക്തമാക്കി.
അതിനിടെ, കകോലി ഘോഷിന് കേന്ദ്ര ആഭ്യന്തര മന്ത്രാലയം ‘വൈ’ കാറ്റഗറി സുരക്ഷ അനുവദിച്ചത് ബംഗാൾ രാഷ്ട്രീയത്തിൽ വലിയ ഊഹാപോഹങ്ങൾക്ക് വഴിതുറന്നിട്ടുണ്ട്. ഐബി റിപ്പോർട്ടിന്റെ അടിസ്ഥാനത്തിലാണ് സുരക്ഷ വർദ്ധിപ്പിച്ചതെന്നാണ് കേന്ദ്ര നിലപാടെങ്കിലും, അവർ ഉടൻ തന്നെ ബിജെപിയിലേക്ക് ചേക്കേറുമെന്ന സൂചനയായിട്ടാണ് രാഷ്ട്രീയ നിരീക്ഷകർ ഇതിനെ വിലയിരുത്തുന്നത്.
Story Summary
Senior TMC leader and Barasat MP Kakoli Ghosh Dastidar resigned from her organizational posts after being removed as Lok Sabha chief whip, blaming political consultancy I-PAC for ruining the party. Her son indicated she might also resign as MP, citing growing corruption scandals within the Mamata Banerjee government that affected their family’s reputation.
