ലഖ്നൗ: തുടർച്ചയായ ആറ് തോൽവികൾക്ക് ശേഷം നിർണായക മത്സരത്തിൽ ലഖ്നൗ സൂപ്പർ ജയന്റ്സിനെ തകർത്ത് പഞ്ചാബ് കിങ്സ് ഐപിഎല്ലിൽ പ്ലേഓഫ് പ്രതീക്ഷകൾ നിലനിർത്തി. ക്യാപ്റ്റന്റെ ഇന്നിങ്സുമായി മുന്നിൽ നിന്ന് നയിച്ച ശ്രേയസ് അയ്യറുടെ കന്നി ഐപിഎൽ സെഞ്ച്വറിയാണ് പഞ്ചാബിന് ഏഴ് വിക്കറ്റിന്റെ ആധികാരിക വിജയം സമ്മാനിച്ചത്. ഇതോടെ 14 ലീഗ് മത്സരങ്ങളിൽ നിന്ന് 15 പോയിന്റുമായി പഞ്ചാബ് പോയിന്റ് പട്ടികയിൽ നാലാം സ്ഥാനത്തേക്ക് തിരിച്ചെത്തി.(IPL PBKS Victory Shreyas Iyer Century Playoff Scenarios MI vs RR)
ലഖ്നൗവിന്റെ ഹോം ഗ്രൗണ്ടായ ഏകാന സ്റ്റേഡിയത്തിൽ നടന്ന മത്സരത്തിൽ ജയത്തോടെ പ്ലേഓഫ് പ്രതീക്ഷകൾ നിലനിർത്തിയെങ്കിലും പഞ്ചാബിന്റെ വിധി ഇപ്പോഴും അവരുടെ കൈകളിലല്ല. ഞായറാഴ്ച മുംബൈയിലെ വാങ്കഡെ സ്റ്റേഡിയത്തിൽ നടക്കുന്ന രാജസ്ഥാൻ റോയൽസ് – മുംബൈ ഇന്ത്യൻസ് മത്സരഫലത്തെ ആശ്രയിച്ചായിരിക്കും പഞ്ചാബിന്റെ അടുത്ത ഘട്ട പ്രവേശം. നിലവിൽ 14 പോയിന്റുള്ള രാജസ്ഥാൻ റോയൽസ് മുംബൈയെ പരാജയപ്പെടുത്തിയാൽ 16 പോയിന്റോടെ അവർ പ്ലേഓഫിലെത്തും, പഞ്ചാബ് ടൂർണമെന്റിൽ നിന്ന് പുറത്താകും. അതിനാൽ, “ഞങ്ങൾ നാളെ മുംബൈ ഇന്ത്യൻസിനെ പിന്തുണയ്ക്കും” എന്ന് മത്സരശേഷം ശ്രേയസ് അയ്യർ തുറന്നുപറഞ്ഞു.
കന്നി ഐപിഎൽ സെഞ്ചറിയും ടീമിന്റെ വിജയവും ഒന്നിച്ച് നേടിയതിന്റെ ആവേശത്തിലാണ് താനെന്ന് പ്ലെയർ ഓഫ് ദി മാച്ച് പുരസ്കാരം ഏറ്റുവാങ്ങിക്കൊണ്ട് ശ്രേയസ് അയ്യർ പറഞ്ഞു. തുടർച്ചയായ ആറ് തോൽവികൾക്ക് ശേഷമുള്ള ഈ വിജയം അതിയായ സന്തോഷം നൽകുന്നു. ക്രീസിൽ അല്പം സമയം ചിലവഴിച്ചാൽ മികച്ച രീതിയിൽ പന്ത് ടൈം ചെയ്യാൻ സാധിക്കുമെന്ന് എനിക്കറിയാമായിരുന്നു. ഒരു സെഞ്ചറിയോടെ മത്സരം ഫിനിഷ് ചെയ്യാൻ കഴിഞ്ഞത് ഒരു അത്ഭുത നിമിഷമായി തോന്നുന്നു, അയ്യർ വ്യക്തമാക്കി.
മത്സരത്തിൽ മൂന്നാം വിക്കറ്റിൽ തനിക്കൊപ്പം നിർണായകമായ 140 റൺസിന്റെ കൂട്ടുകെട്ടുണ്ടാക്കിയ പ്രഭ്സിമ്രാൻ സിങ്ങിനെ ക്യാപ്റ്റൻ പ്രശംസിച്ചു. ലഖ്നൗവിനെ 200 റൺസിന് താഴെ ഒതുക്കിയ ബൗളർമാരുടെ പ്രകടനവും മികച്ചതായിരുന്നുവെന്ന് അദ്ദേഹം കൂട്ടിച്ചേർത്തു. സമ്മർദ്ദമേറിയ ഈ മത്സരത്തിന് മുന്നോടിയായി ടീമിൽ പ്രത്യേക മീറ്റിംഗുകൾ ഒന്നും തന്നെ നടത്തിയിരുന്നില്ലെന്ന് അയ്യർ വെളിപ്പെടുത്തി.
Story Summary
Punjab Kings kept their playoff hopes alive with a 7-wicket win against Lucknow Super Giants, driven by skipper Shreyas Iyer’s maiden IPL century and a 140-run partnership with Prabhsimran Singh. With 15 points from 14 games, Punjab’s fate now depends on Sunday’s MI vs RR clash, leading Iyer to state that Punjab will be rooting for a Mumbai Indians victory.
