തിരുവനന്തപുരം: സോഷ്യൽ മീഡിയയിൽ തരംഗമായി മാറുന്ന ‘കോക്രോച്ച് ജനത പാർട്ടി’ (CJP) അഥവാ കോക്രോച്ച് മൂവ്മെന്റിനെതിരെ കടുത്ത വിമർശനവുമായി ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ (Rajeev Chandrasekhar Cockroach Janata Party). ഈ നീക്കം രാജ്യത്തെയും പ്രധാനമന്ത്രി നരേന്ദ്ര മോദിയെയും ലക്ഷ്യം വച്ചുള്ളതാണെന്ന് അദ്ദേഹം വ്യക്തമാക്കി. പ്രതിപക്ഷ പാർട്ടികളെ കൂട്ടുപിടിച്ച് ചില നിക്ഷിപ്ത താൽപ്പര്യക്കാരാണ് ഇതിന് പിന്നിൽ പ്രവർത്തിക്കുന്നതെന്നും രാജ്യത്തിന്റെ മുന്നോട്ടുള്ള കുതിപ്പിന് തടസ്സം നിൽക്കുന്ന സിജെപിയുടെ നീക്കങ്ങൾക്കെതിരെ ജനങ്ങൾ ഒറ്റക്കെട്ടായി നിൽക്കണമെന്നും അദ്ദേഹം എക്സിൽ (ട്വിറ്റർ) കുറിച്ചു.
സോഷ്യൽ മീഡിയ, എഐ (AI), ബോട്ടുകൾ (Bots) എന്നിവ വ്യാപകമായി ദുരുപയോഗം ചെയ്യപ്പെടുന്ന ഈ കാലത്ത്, വ്യാജ വാർത്തകളും തെറ്റായ ആഖ്യാനങ്ങളും ചമച്ച് ജനങ്ങളെ തെറ്റിദ്ധരിപ്പിക്കുന്നത് രാജ്യത്തിന് വലിയൊരു സുരക്ഷാ ഭീഷണിയാണ്. പുറമേയ്ക്ക് വളരെ സ്വാഭാവികമെന്ന് തോന്നിയേക്കാമെങ്കിലും, ഭാരതത്തിന്റെ സമാധാനവും സ്ഥിരതയും തകർക്കാൻ ലക്ഷ്യമിട്ടുള്ള ആസൂത്രിത നീക്കങ്ങളാണ് ഇവയെല്ലാം എന്ന് രാജീവ് ചന്ദ്രശേഖർ ആരോപിച്ചു.
പ്രധാനമന്ത്രി നരേന്ദ്രമോദിജിയുടെ നേതൃത്വത്തിൽ ഇന്ത്യ കൈവരിക്കുന്ന സാമ്പത്തിക വളർച്ചയും നേട്ടങ്ങളും പല വിദേശ രാജ്യങ്ങൾക്കും അസ്വസ്ഥത ഉണ്ടാക്കുന്നുണ്ടെന്ന് രാജീവ് ചന്ദ്രശേഖർ ചൂണ്ടിക്കാട്ടി. അതുകൊണ്ടുതന്നെ, നമ്മുടെ മുന്നോട്ടുള്ള കുതിപ്പിന് തടയിടാൻ അവർ ഇത്തരം തരംതാണ ആഭ്യന്തര രാഷ്ട്രീയ നീക്കങ്ങളെ ഇനിയും പിന്തുണച്ചേക്കാം.
കൊവിഡ് മഹാമാരി, റഷ്യ-ഉക്രെയ്ൻ യുദ്ധം, യുഎസ്-ഇറാൻ സംഘർഷം, ആഗോള ഊർജ്ജ പ്രതിസന്ധികൾ, ചൈനീസ് കടന്നുകയറ്റം തുടങ്ങിയ വലിയ പ്രതിസന്ധികളിലൂടെയാണ് കഴിഞ്ഞ കുറച്ചുകാലമായി ലോകം കടന്നുപോയത്. ലോകത്തിലെ വൻശക്തികൾ പോലും ഈ കൊടുങ്കാറ്റിൽ ഉലഞ്ഞപ്പോൾ, ഭാരതീയരുടെ സുരക്ഷ ഉറപ്പാക്കാനും നമ്മുടെ സമ്പദ്വ്യവസ്ഥയെ ലോകത്തിന്റെ നെറുകയിൽ എത്തിക്കാനും പ്രധാനമന്ത്രിക്ക് സാധിച്ചു. ഇതാണ് യഥാർത്ഥ നേതൃത്വത്തിന്റെ കരുത്ത്.
രാജ്യവും ലോകവും ഇത്തരം വലിയ വെല്ലുവിളികൾ നേരിടുമ്പോൾ നമ്മൾ ഒറ്റക്കെട്ടായി നിൽക്കുക എന്നതാണ് പ്രധാനം. ചില വിദേശ ശക്തികൾക്കോ, ഇവിടുത്തെ നിലവാരമില്ലാത്ത പ്രതിപക്ഷ രാഷ്ട്രീയക്കാർക്കോ ഒന്നും തന്നെ എല്ലാ ഇന്ത്യക്കാർക്കും വേണ്ടി മെച്ചപ്പെട്ടൊരു ഭാവി കെട്ടിപ്പടുക്കാനുള്ള നമ്മുടെ ഒത്തൊരുമയെയും ദൃഢനിശ്ചയത്തെയും തളർത്താൻ കഴിയില്ലെന്നും ബിജെപി സംസ്ഥാന അധ്യക്ഷൻ കൂട്ടിച്ചേർത്തു.
Story Summary: BJP State President Rajeev Chandrasekhar strongly criticized the ongoing ‘Cockroach Movement’ (CJP) on social media, calling it a calculated attempt to target Prime Minister Narendra Modi and national stability. He alleged that vested interest groups and opposition parties, backed by foreign elements, are behind this campaign.
