തിരുവനന്തപുരം: കേരളത്തിൽ കെ.പി.സി.സി (KPCC) അധ്യക്ഷ സ്ഥാനത്തേക്ക് പുതിയ നേതാവിനെ കണ്ടെത്താനുള്ള ചർച്ചകൾ കോൺഗ്രസിൽ ഊർജ്ജിതമാകുന്നു (Next KPCC president Kerala Congress). പാർട്ടി പുനഃസംഘടനയുമായി ബന്ധപ്പെട്ട് ഗ്രൂപ്പ് പോരുകളും തർക്കങ്ങളും നിലനിൽക്കുന്ന സാഹചര്യത്തിൽ മൂന്ന് പ്രമുഖ നേതാക്കളുടെ പേരുകളാണ് ഹൈക്കമാൻഡിന്റെയും സംസ്ഥാന നേതൃത്വത്തിന്റെയും സജീവ പരിഗണനയിലുള്ളത്.
കൊടിക്കുന്നിൽ സുരേഷ്, ബെന്നി ബഹനാൻ, ജോസഫ് വാഴക്കൻ എന്നിവരാണ് അധ്യക്ഷ പദവിയിലേക്ക് പ്രധാനമായും പരിഗണക്കപ്പെടുന്ന മൂന്ന് പേർ. മുൻപ് പലതവണ തഴയപ്പെട്ട മുതിർന്ന നേതാവും എം.പിമാരിൽ പ്രമുഖനുമായ കൊടിക്കുന്നിൽ സുരേഷിനാണ് നിലവിൽ കെ.പി.സി.സി അധ്യക്ഷ സ്ഥാനത്തേക്ക് കൂടുതൽ മുൻഗണന കൽപ്പിക്കപ്പെടുന്നത്. പദവി ഉറപ്പാക്കുന്നതിനായി അദ്ദേഹം ഇതിനോടകം തന്നെ മുതിർന്ന നേതാക്കളെ കണ്ട് ചർച്ചകൾ നടത്തിക്കഴിഞ്ഞു.
അതേസമയം, പാർട്ടിയിലെ പരമ്പരാഗത ഗ്രൂപ്പുകളും തങ്ങളുടെ പ്രതിനിധികൾക്കായി കടുത്ത സമ്മർദ്ദമാണ് ചെലുത്തുന്നത്.മുൻ കെ.പി.സി.സി ഭാരവാഹിയും ചാലക്കുടി എം.പിയുമായ ബെന്നി ബഹനാനെ അധ്യക്ഷനാക്കണമെന്ന ആവശ്യവുമായി കോൺഗ്രസിലെ ‘എ’ വിഭാഗം ശക്തമായി രംഗത്തുണ്ട്.
മറുഭാഗത്ത് ജോസഫ് വാഴക്കനെ അധ്യക്ഷനാക്കണമെന്ന ആവശ്യവുമായി രമേശ് ചെന്നിത്തലയുടെ നേതൃത്വത്തിലുള്ള വിഭാഗവും ഹൈക്കമാൻഡിന് മേൽ സമ്മർദ്ദം ചെലുത്തുന്നു.കെ.പി.സി.സി അധ്യക്ഷനെ തിരഞ്ഞെടുക്കുന്നതിനൊപ്പം സംസ്ഥാനത്തെ ഏഴ് ഡി.സി.സി (DCC) അധ്യക്ഷന്മാരെയും മാറ്റാൻ ഹൈക്കമാൻഡ് തീരുമാനിച്ചിട്ടുണ്ട്. നിലവിൽ പൂർണ്ണ ചുമതലയുള്ള അധ്യക്ഷന്മാരില്ലാതെ കെ.പി.സി.സി ഓഫീസും പ്രധാന ഡി.സി.സികളും പ്രതിസന്ധിയിലാണെന്ന വിമർശനം പാർട്ടിക്കുള്ളിൽ നിന്ന് തന്നെ ഉയരുന്ന പശ്ചാത്തലത്തിലാണ് ഈ വേഗതയിലുള്ള നീക്കം.
ഡൽഹിയിൽ നടക്കുന്ന ഹൈക്കമാൻഡ് ചർച്ചകളിൽ സംസ്ഥാനത്തെ പ്രമുഖ കോൺഗ്രസ് നേതാക്കളും പ്രതിപക്ഷ നേതാവ് വി.ഡി. സതീശനും തങ്ങളുടെ വ്യക്തമായ അഭിപ്രായം അറിയിക്കും. വരും ദിവസങ്ങളിൽ തന്നെ കെ.പി.സി.സി അധ്യക്ഷന്റെ കാര്യത്തിൽ എ.ഐ.സി.സി (AICC) ഭാഗത്തുനിന്ന് അന്തിമ പ്രഖ്യാപനം ഉണ്ടായേക്കുമെന്നാണ് കോൺഗ്രസ് വൃത്തങ്ങൾ നൽകുന്ന സൂചന.
Story Summary (English): Discussions within the Congress party have intensified to select the new KPCC President, with three prominent names under high command consideration: Kodikunnil Suresh, Benny Behanan, and Joseph Vazhackan. Senior leader Kodikunnil Suresh currently leads the race and has already initiated talks with top leadership. Meanwhile, the ‘A’ group pushes for Chalakudy MP Benny Behanan, and the faction led by Ramesh Chennithala lobbies for Joseph Vazhackan. Along with the KPCC chief, restructuring of seven DCC presidents is also on the cards, with Leader of Opposition VD Satheesan expected to convey key inputs during the high-command discussions in Delhi.
