ന്യൂയോർക്ക്: കടുത്ത ഇടിമിന്നലോടു കൂടിയ അതിതീവ്ര മഴയെത്തുടർന്ന് യു.എസിലെ ന്യൂയോർക്ക് നഗരത്തിൽ വൻ പ്രളയം. നഗരത്തിലെ റോഡുകളെല്ലാം പൂർണ്ണമായി വെള്ളത്തിനടിയിലാവുകയും ഡ്രെയിനേജ് സംവിധാനങ്ങൾ തകരുകയും ചെയ്തതോടെ ജനജീവിതം പൂർണ്ണമായി സ്തംഭിച്ചു (New York City Flash Floods). അതിനിടെ, നഗരത്തിലെ ഫ്ലാഷ് ഫ്ലഡിന്റെ ഭീകരത വ്യക്തമാക്കുന്ന ഒരു വിഡിയോ ദൃശ്യം സോഷ്യൽ മീഡിയയിൽ വ്യാപകമായി പ്രചരിക്കുകയാണ്. പൊതുഗതാഗത ബസിൽ നിന്നും റോഡിലേക്ക് ഇറങ്ങുന്നതിനിടെ ഒരു യുവതി ശക്തമായ വെള്ളപ്പാച്ചിലിൽ ഒഴുക്കിൽപ്പെടുന്നതാണ് 15 സെക്കൻഡ് ദൈർഘ്യമുള്ള വിഡിയോയിലുള്ളത്.
റോഡിൽ കടുത്ത വെള്ളപ്പൊക്കമായതിനാൽ ബസ് വശങ്ങളിലേക്ക് ഒതുക്കി നിർത്താൻ ഡ്രൈവർക്ക് സാധിച്ചിരുന്നില്ല. ഇതേത്തുടർന്ന് റോഡിന് നടുവിൽ നിർത്തിയ ബസിൽ നിന്നും യാത്രക്കാർക്ക് വെള്ളത്തിലേക്ക് ചാടേണ്ടി വന്നു. പിങ്ക് നിറത്തിലുള്ള വസ്ത്രം ധരിച്ച യുവതി ദൂരം കൃത്യമായി കണക്കാക്കാതെ ബസിൽ നിന്നും ചാടിയപ്പോൾ റോഡിന്റെ വശത്തെ നടപ്പാതയിലെ കോൺക്രീറ്റ് അരികിൽ തലയിടിച്ച് വീഴുകയും, നിമിഷങ്ങൾക്കകം ശക്തമായ ഒഴുക്കിൽപ്പെടുകയുമായിരുന്നു. ചുറ്റും നിന്നവർ ഓടിക്കൂടിയെങ്കിലും യുവതി ഒഴുക്കിൽപ്പെട്ടു കഴിഞ്ഞിരുന്നു. സുരക്ഷിതമായി ഇറക്കാൻ പാകത്തിന് ബസ് വശങ്ങളിലേക്ക് ചേർത്തുനിർത്താതിരുന്ന ഡ്രൈവറുടെ നടപടിയെ ചോദ്യം ചെയ്ത് നിരവധി പേർ രംഗത്തെത്തിയിട്ടുണ്ട്. നഗരത്തിലെ ഡ്രെയിനേജ് സംവിധാനങ്ങൾക്ക് താങ്ങാൻ കഴിയുന്നതിലും അധികം മഴയാണ് പെയ്തതെന്നും, നാശനഷ്ടങ്ങൾ റിപ്പോർട്ട് ചെയ്യാൻ പ്രത്യേക വെബ്സൈറ്റ് സജ്ജമാക്കിയിട്ടുണ്ടെന്നും ന്യൂയോർക്ക് സിറ്റി മേയർ സൊഹ്റാൻ മംദാനി അറിയിച്ചു.
Woman got washed away in the NYC flood. 😭💔 pic.twitter.com/KFWwASKwYW
— Rain Drops Media (@Raindropsmedia1) May 21, 2026
