മുംബൈ: തനിക്കും സഹോദര ഭാര്യക്കുമെതിരെ അപകീർത്തികരമായ പരാമർശത്തോടെ സോഷ്യൽ മീഡിയയിൽ റീൽ പങ്കുവെച്ച പാപ്പരാസി അക്കൗണ്ടിനെതിരെ രൂക്ഷവിമർശനവുമായി സച്ചിൻ ടെണ്ടുൽക്കറുടെ മകൾ സാറ ടെണ്ടുൽക്കർ (Sara Tendulkar Paparazzi Body Shaming). ഇൻസ്റ്റാഗ്രാം സ്റ്റോറിയിലൂടെയാണ് സാറ ഈ മോശം പ്രവണതക്കെതിരെ ശക്തമായ ഭാഷയിൽ പ്രതികരിച്ചത്. പ്രതിഷേധം ശക്തമായതിനെ തുടർന്ന് പ്രസ്തുത അക്കൗണ്ട് റീൽ പിൻവലിച്ചെങ്കിലും, പോസ്റ്റ് ഡിലീറ്റ് ചെയ്തതുകൊണ്ട് മാത്രം നിങ്ങളുടെ പ്രവർത്തി ഇല്ലാതാകില്ലെന്ന് സാറ ഓർമ്മിപ്പിച്ചു.
“നിങ്ങൾ തികച്ചും അരോചകമായി പെരുമാറുന്നു. ഇതൊരിക്കലും മാധ്യമപ്രവർത്തനമല്ല, ഞങ്ങളെ ഞങ്ങളുടെ വഴിക്ക് വിടൂ” എന്ന് സാറ ഇൻസ്റ്റാഗ്രാമിൽ കുറിച്ചു. കഴിഞ്ഞ മാർച്ച് 5-ന് മുംബൈയിലെ പ്രമുഖ ലക്ഷ്വറി ഹോട്ടലായ ദി സെന്റ് റെജിസിൽ വെച്ചായിരുന്നു സാറയുടെ സഹോദരനും ക്രിക്കറ്റ് താരവുമായ അർജുൻ ടെണ്ടുൽക്കറും വ്യവസായി സാനിയ ചന്ദോക്കും തമ്മിലുള്ള വിവാഹം നടന്നത്. അമിതാഭ് ബച്ചൻ, ഷാരൂഖ് ഖാൻ, എം.എസ്. ധോണി തുടങ്ങിയ പ്രമുഖർ പങ്കെടുത്ത ഈ വിവാഹ ചടങ്ങുകളുടെ ചിത്രങ്ങൾ പങ്കുവെച്ചതിന് പിന്നാലെയാണ് സോഷ്യൽ മീഡിയയിൽ മോശം പരാമർശങ്ങളുമായി ചില പാപ്പരാസി അക്കൗണ്ടുകൾ രംഗത്തെത്തിയത്. ഇത്തരം ബോഡി ഷെയ്മിംഗ് രീതികൾക്കെതിരെ സോഷ്യൽ മീഡിയയിൽ വലിയ പിന്തുണയാണ് സാറയ്ക്ക് ലഭിക്കുന്നത്.
Summary: Sara Tendulkar, daughter of cricket legend Sachin Tendulkar, strongly criticized a paparazzi account for a body-shaming post involving her and her sister-in-law Saaniya Chandhok. Taking to her Instagram Stories, Sara called out the offensive and now-deleted video reel, stating that deleting the post does not change their behavior.
