തിരുവനന്തപുരം: നവകേരള സദസ്സിനിടെ യൂത്ത് കോൺഗ്രസ്-കെ.എസ്.യു പ്രവർത്തകരെ മുൻ മുഖ്യമന്ത്രിയുടെ ഗൺമാൻമാർ ക്രൂരമായി മർദ്ദിച്ച സംഭവത്തിൽ പ്രത്യേക അന്വേഷണ സംഘത്തെ (SIT) പ്രഖ്യാപിച്ച് കേരള പോലീസ് ഔദ്യോഗിക ഉത്തരവിറക്കി. വി. ഡി. സതീശൻ മുഖ്യമന്ത്രിയായി അധികാരമേറ്റതിന് പിന്നാലെ പ്രഖ്യാപിച്ച പുനരന്വേഷണത്തിലാണ് ഇപ്പോൾ കൃത്യമായ ഉദ്യോഗസ്ഥ ചുമതലകൾ നിശ്ചയിച്ചിരിക്കുന്നത്.(Gunmen assault case, DYSP Baiju Poulose To Lead Special Investigation Team)
ആലപ്പുഴ ക്രൈംബ്രാഞ്ച് എസ്.പി ഷൗക്കത്തലിയുടെ മേൽനോട്ടത്തിൽ, പ്രമുഖ ഉദ്യോഗസ്ഥനായ ഡി.വൈ.എസ്.പി ബൈജു പൗലോസായിരിക്കും കേസിലെ മുഖ്യ അന്വേഷണ ഉദ്യോഗസ്ഥൻ. ബൈജു പൗലോസ് ഉൾപ്പെടെ ആറംഗ പ്രമുഖ പോലീസ് ഉദ്യോഗസ്ഥരടങ്ങുന്ന സംഘമാണ് മുൻ മുഖ്യമന്ത്രിയുടെ സുരക്ഷാ ജീവനക്കാർ നടത്തിയ വിവാദ ‘രക്ഷാപ്രവർത്തനം’ പരിശോധിക്കുക.
കേസിന്റെ ഗൗരവം കണക്കിലെടുത്ത് രണ്ടാഴ്ചയ്ക്കകം അന്വേഷണ പുരോഗതി റിപ്പോർട്ട് സമർപ്പിക്കാനും, ഒരു മാസത്തിനകം അന്തിമ അന്വേഷണ റിപ്പോർട്ട് സമർപ്പിക്കാനും ആഭ്യന്തര വകുപ്പ് കർശന നിർദ്ദേശം നൽകിയിട്ടുണ്ട്. 2023 ഡിസംബറിലാണ് കേരള രാഷ്ട്രീയത്തിൽ വൻ കൊടുങ്കാറ്റായി മാറിയ ഈ സംഭവം അരങ്ങേറിയത്. പിണറായി വിജയൻ നയിച്ച നവകേരള യാത്ര ആലപ്പുഴയിലൂടെ കടന്നുപോയപ്പോൾ കരിങ്കൊടി കാണിക്കാൻ ശ്രമിച്ച പ്രതിപക്ഷ സംഘടനാ പ്രവർത്തകരെ മുഖ്യമന്ത്രിയുടെ ഔദ്യോഗിക അകമ്പടി വാഹനത്തിൽ നിന്നിറങ്ങിവന്ന ഗൺമാൻമാരായ അനിൽ കുമാറും സന്ദീപ് എസും ചേർന്ന് ക്രൂരമായി മർദ്ദിക്കുകയായിരുന്നു.
Story Summary
The Kerala Police has issued an official order appointing a 6-member Special Investigation Team led by DYSP Baiju Poulose, under the supervision of Crime Branch SP Shaukathali, to probe the Navakerala Sadas assault case. The team has been directed to submit a progress report in two weeks and a final report within a month, fulfilling Chief Minister V D Satheesan’s promise of a re-investigation.
