കൊൽക്കത്ത: പശ്ചിമ ബംഗാളിലെ ഫാൽത്ത നിയമസഭാ മണ്ഡലത്തിൽ നടക്കാനിരിക്കുന്ന പുനർവോട്ടെടുപ്പിന് രണ്ട് ദിവസം മാത്രം ബാക്കിനിൽക്കെ തൃണമൂൽ കോൺഗ്രസ് സ്ഥാനാർത്ഥി ജഹാംഗീർ ഖാൻ അപ്രതീക്ഷിതമായി മത്സരരംഗത്തുനിന്ന് പിന്മാറി (West Bengal Falta Bypoll Repoll). മണ്ഡലത്തിനായി സർക്കാർ “പ്രത്യേക പാക്കേജ്” അനുവദിച്ചിട്ടുണ്ടെന്നും ഫാൽത്തയുടെ വികസനവും സമാധാനവും മുൻനിർത്തിയാണ് താൻ നാമനിർദ്ദേശ പത്രിക പിൻവലിക്കുന്നതെന്നും ചൊവ്വാഴ്ച അദ്ദേഹം വാർത്താസമ്മേളനത്തിൽ അറിയിച്ചു.
ബംഗാളിൽ അടുത്തിടെ നടന്ന നിയമസഭാ തിരഞ്ഞെടുപ്പിൽ 207 സീറ്റുകളുടെ വൻ ഭൂരിപക്ഷത്തോടെ ബിജെപി ആദ്യമായി അധികാരത്തിലെത്തുകയും സുവേന്ദു അധികാരി മുഖ്യമന്ത്രിയായി ചുമതലയേൽക്കുകയും ചെയ്തിരുന്നു. ഈ രാഷ്ട്രീയ സാഹചര്യങ്ങൾക്കിടയിലാണ് തൃണമൂൽ കോൺഗ്രസ് ദേശീയ ജനറൽ സെക്രട്ടറി അഭിഷേക് ബാനർജിയുടെ ഡയമണ്ട് ഹാർബർ ലോക്സഭാ മണ്ഡലത്തിൽ ഉൾപ്പെടുന്ന ഫാൽത്തയിലെ നാടകീയ പിന്മാറ്റം.
മെയ് 21-നാണ് മണ്ഡലത്തിൽ പുനർവോട്ടെടുപ്പ് നിശ്ചയിച്ചിരിക്കുന്നത്. വികസനത്തിന് വേണ്ടിയാണ് തന്റെ പിന്മാറ്റമെന്ന് ജഹാംഗീർ ഖാൻ അവകാശപ്പെടുന്നുണ്ടെങ്കിലും, പാർട്ടി നേതൃത്വത്തിന്റെ നിർബന്ധപ്രകാരമാണോ ഈ തീരുമാനമെന്ന ചോദ്യത്തോട് പ്രതികരിക്കാൻ അദ്ദേഹം തയ്യാറായില്ല. അതേസമയം, സ്ഥാനാർത്ഥിയുടെ പിന്മാറ്റത്തെക്കുറിച്ച് വിവരങ്ങൾ ലഭിച്ചിട്ടുണ്ടെന്നും എന്നാൽ കൃത്യമായ കാരണത്തെക്കുറിച്ച് വ്യക്തതയില്ലെന്നുമാണ് തൃണമൂൽ വക്താവ് അരൂപ് ചക്രവർത്തി പ്രതികരിച്ചത്. എന്നാൽ, പോളിംഗ് ഏജന്റുമാരെപ്പോലും കിട്ടാത്തതുകൊണ്ടാണ് തൃണമൂൽ സ്ഥാനാർത്ഥി ഭയന്നോടിയതെന്ന് മുഖ്യമന്ത്രി സുവേന്ദു അധികാരി പരിഹസിച്ചു. ഏപ്രിൽ 29-ന് നടന്ന വോട്ടെടുപ്പിൽ ബിജെപിയുടെ ചിഹ്നത്തിന് മുകളിൽ വെള്ള ടേപ്പ് ഒട്ടിച്ചതടക്കമുള്ള വ്യാപക ക്രമക്കേടുകൾ കണ്ടെത്തിയതിനെ തുടർന്നാണ് തിരഞ്ഞെടുപ്പ് കമ്മീഷൻ ഇവിടെ പുനർവോട്ടെടുപ്പ് പ്രഖ്യാപിച്ചത്. മെയ് 24-നാണ് ഫാൽത്തയിലെ വോട്ടെണ്ണൽ.
Summary: In a dramatic political turn, Trinamool Congress candidate Jahangir Khan announced his withdrawal from the Falta Assembly constituency bypoll in West Bengal, just two days before the scheduled repoll on May 21. Declaring that a “special package” had been granted for the area, Khan claimed his decision was aimed at ensuring peace and fostering development in Falta, which falls under TMC National General Secretary Abhishek Banerjee’s Diamond Harbour MP constituency.
