ഭോപ്പാൽ: മധ്യപ്രദേശിലെ ഭോപ്പാലിൽ നോയിഡ സ്വദേശിനിയും മുൻ മിസ് പൂനെയുമായിരുന്ന ട്വിഷ ശർമ്മ (33) ഭർതൃഗൃഹത്തിൽ ദുരൂഹസാഹചര്യത്തിൽ മരിച്ച കേസിൽ നിർണായക സിസിടിവി ദൃശ്യങ്ങൾ പുറത്ത്. മേയ് 12-ന് ഭോപ്പാലിലെ കതാരാ ഹിൽസ് പ്രദേശത്തുള്ള വീട്ടിലാണ് ട്വിഷയെ തൂങ്ങിമരിച്ച നിലയിൽ കണ്ടെത്തിയത്. യുവതിയുടെ മരണവുമായി ബന്ധപ്പെട്ട് അഭിഭാഷകനായ ഭർത്താവ് സമർത്ഥ് സിങ്, മുൻ സെഷൻസ് ജഡ്ജി കൂടിയായ ഭർതൃമാതാവ് ഗിരിബാല സിങ് എന്നിവർക്കെതിരെ സ്ത്രീധന പീഡനം, ആത്മഹത്യാ പ്രേരണ (BNS 80-2) എന്നീ വകുപ്പുകൾ ചുമത്തി പോലീസ് കേസെടുത്തിരുന്നു.(Twisha Sharma death case CCTV Footage Released Husband Samarth Singh On The Run)
മരണത്തിന് തൊട്ടുമുമ്പുള്ള സംഭവങ്ങളുടെ പശ്ചാത്തലം വ്യക്തമാക്കുന്ന രണ്ട് സിസിടിവി ദൃശ്യങ്ങളാണ് ഇപ്പോൾ മാധ്യമങ്ങളിലൂടെ പുറത്തുവന്നിരിക്കുന്നത്. മേയ് 12-ന് രാവിലെ 7:20ഓടെ ട്വിഷ ഭർതൃവീട്ടിലെ ഗോവണിപ്പടി കയറി മുകളിലെ ടെറസ് ഭാഗത്തേക്ക് തനിയെ നടന്നുപോകുന്നത് കാണാം. ഏകദേശം ഒരു മണിക്കൂറിന് ശേഷം ഗോവണിയുടെ ലാൻഡിങ്ങിൽ അതീവ ഗുരുതരാവസ്ഥയിലുള്ള ട്വിഷയ്ക്ക് ഭർത്താവ് സമർത്ഥ് സിങ് രണ്ടുതവണ സിപിആർ നൽകാൻ ശ്രമിക്കുന്നു. ഇത് പരാജയപ്പെട്ടതോടെ മറ്റ് രണ്ട് പുരുഷന്മാരുടെ സഹായത്തോടെ ട്വിഷയുടെ ശരീരം താഴത്തെ നിലയിലേക്ക് എത്തിക്കുകയാണ്. ഈ സമയത്ത് വിരമിച്ച ജഡ്ജി കൂടിയായ ഭർതൃമാതാവ് ഗിരിബാല സിങ് ദൃശ്യങ്ങളിലേക്ക് വരികയും പിന്നീട് മറ്റൊരു മുറിയിലേക്ക് മാറുകയും ചെയ്യുന്നുണ്ട്.
കേസിൽ ഗിരിബാല സിങ്ങിന് ഭോപ്പാൽ കോടതി മുൻകൂർ ജാമ്യം അനുവദിച്ചെങ്കിലും ഭർത്താവ് സമർത്ഥ് സിങ്ങിന്റെ ജാമ്യാപേക്ഷ തള്ളിയിരുന്നു. നിലവിൽ ഒളിവിലുള്ള സമർത്ഥിനെ കണ്ടെത്താൻ ലുക്ക്ഔട്ട് നോട്ടീസ് പുറപ്പെടുവിക്കുകയും 10,000 രൂപ ഇനാം പ്രഖ്യാപിക്കുകയും ചെയ്തിട്ടുണ്ട്. ഇയാളുടെ പാസ്പോർട്ട് റദ്ദാക്കാനുള്ള നടപടികളും പോലീസ് ആരംഭിച്ചു. വിവാഹം കഴിഞ്ഞ് വെറും അഞ്ച് മാസത്തിനുള്ളിലാണ് ദാരുണമായ ഈ സംഭവം നടക്കുന്നത്. മരണത്തിന് ദിവസങ്ങൾക്ക് മുമ്പ്, ഭർതൃവീട്ടിൽ താൻ ക്രൂരമായി പീഡിപ്പിക്കപ്പെടുകയാണെന്നും തന്നെ വന്ന് കൂട്ടിക്കൊണ്ടുപോകണമെന്നും ആവശ്യപ്പെട്ട് ട്വിഷ അമ്മയ്ക്ക് അയച്ച വാട്സ്ആപ്പ് സന്ദേശങ്ങൾ കുടുംബം പുറത്തുവിട്ടു. കടുത്ത മാനസിക പീഡനം കാരണം വിവാഹശേഷം ട്വിഷയ്ക്ക് 15 കിലോയോളം ഭാരം കുറഞ്ഞിരുന്നതായും കുടുംബം ആരോപിക്കുന്നു.
Story Summary
The mystery behind the suspicious death of 33-year-old Twisha Sharma at her marital home in Bhopal deepened following the release of new CCTV footage showing her final moments and subsequent failed CPR attempts. While police placed a ₹10,000 bounty on her absconding lawyer husband Samarth Singh, an SIT continues to probe the dowry death allegations involving his mother, a retired judge.
