ഭോപ്പാൽ: മുൻ മിസ് പൂനെ ജേതാവും മോഡലും നടിയുമായ ട്വിഷ ശർമ്മയുടെ (33) മരണവുമായി ബന്ധപ്പെട്ട് ഭർതൃമാതാവും പെൺകുട്ടിയുടെ കുടുംബവും ഉന്നയിക്കുന്ന ആരോപണ പ്രത്യാരോപണങ്ങൾ പുതിയ തലത്തിലേക്ക് (Twisha Sharma Bhopal Death Case). ഭോപ്പാലിലെ കതാരാ ഹിൽസിലെ ഭർതൃവീട്ടിൽ മെയ് 12-നാണ് ട്വിഷയെ തൂങ്ങിമരിച്ച നിലയിൽ കണ്ടെത്തിയത്. മരണത്തിൽ ഭർത്താവ് സമർത്ഥ് സിംഗ്, ഭർതൃമാതാവും വിരമിച്ച ജഡ്ജിയുമായ ഗിരിബാല സിംഗ് എന്നിവർക്കെതിരെ സ്ത്രീധന പീഡനം, കൊലപാതകം തുടങ്ങിയ കുറ്റങ്ങൾ ചുമത്തി കേസ് രജിസ്റ്റർ ചെയ്തിട്ടുണ്ട്. ഇതിനിടയിലാണ് ട്വിഷയ്ക്കെതിരെ ഗുരുതര ആരോപണങ്ങളുമായി ഭർതൃമാതാവ് പത്രസമ്മേളനം നടത്തിയത്. എന്നാൽ കേസിലെ നിർണായക തെളിവുകൾ പോലീസ് നശിപ്പിച്ചതായും അന്വേഷണം അട്ടിമറിക്കാൻ ഭർതൃമാതാവ് സ്വാധീനം ചെലുത്തുന്നതായും പെൺകുട്ടിയുടെ കുടുംബം ആരോപിക്കുന്നു.
ട്വിഷയ്ക്കെതിരെ കഞ്ചാവ്, മാനസികരോഗ ആരോപണങ്ങളുമായി ഭർതൃമാതാവ്
തിങ്കളാഴ്ച ഭോപ്പാലിൽ നടത്തിയ വാർത്താസമ്മേളനത്തിൽ ട്വിഷയ്ക്ക് കഞ്ചാവ് ഉപയോഗവും കടുത്ത മാനസിക പ്രശ്നങ്ങളും ഉണ്ടായിരുന്നുവെന്ന് ഗിരിബാല സിംഗ് ആരോപിച്ചു. ഗർഭകാലത്ത് ട്വിഷ വൻതോതിൽ കഞ്ചാവ് ഉപയോഗിച്ചിരുന്നതായി തങ്ങളോട് സമ്മതിച്ചിട്ടുണ്ടെന്നും സ്കീസോഫ്രീനിയ ബാധിച്ച രോഗികൾക്ക് നൽകുന്ന മരുന്നുകളാണ് ട്വിഷ കഴിച്ചിരുന്നതെന്നും അവർ അവകാശപ്പെട്ടു. മരുന്ന് കഴിക്കാത്ത സമയങ്ങളിൽ ലഹരി വിമുക്ത ലക്ഷണങ്ങൾ കാണിക്കാറുണ്ടായിരുന്നു. മെയ് 7-ന് ട്വിഷ മെഡിക്കൽ അബോർഷൻ പൂർത്തിയാക്കിയിരുന്നതായും ഗിരിബാല പറഞ്ഞു. ട്വിഷയുടെ മാതാപിതാക്കൾ അവളെ ഒരു പണമുണ്ടാക്കാനുള്ള യന്ത്രം മാത്രമായാണ് കണ്ടിരുന്നതെന്നും കഴിഞ്ഞ അഞ്ചുമാസമായി അവർ മകളെ തിരിഞ്ഞുനോക്കിയിട്ടില്ലെന്നും വിരമിച്ച ജഡ്ജി കുറ്റപ്പെടുത്തി. സ്ത്രീധന പീഡന ആരോപണങ്ങളെ പ്രതിരോധിക്കാൻ 5,000 മുതൽ 50,000 രൂപ വരെയുള്ള ഓൺലൈൻ പണമിടപാട് രേഖകളും അവർ പുറത്തുവിട്ടു.
‘ആട്ടിൻ തോലിട്ട ചെന്നായ്’; ഭർതൃമാതാവിന്റെ വാദങ്ങൾ തള്ളി പിതാവ്
ഭർതൃമാതാവിന്റെ ആരോപണങ്ങൾ പൂർണ്ണമായും തള്ളിക്കളഞ്ഞ ട്വിഷയുടെ പിതാവ് നവനീതി ശർമ്മ, മകളുടെ ഭർത്താവ് സമർത്ഥ് സിംഗ് ‘ആട്ടിൻ തോലിട്ട ചെന്നായ്’ ആണെന്ന് പിതാവ് പറയുന്നു. ഡേറ്റിംഗ് ആപ്പ് വഴി പരിചയപ്പെട്ട ഇരുവരും 2025 ഡിസംബറിലാണ് വിവാഹിതരായത്. നേരിട്ട് സ്ത്രീധനം ചോദിച്ചില്ലെങ്കിലും, ആഡംബരങ്ങളുടെയും ജീവിതനിലവാരത്തിന്റെയും പേരിൽ നിരന്തരം പണം ആവശ്യപ്പെടുന്ന സാഹചര്യമാണ് അവർ ഉണ്ടാക്കിയതെന്ന് പിതാവ് വ്യക്തമാക്കി. വിവാഹശേഷം ട്വിഷയ്ക്ക് ജോലി നഷ്ടപ്പെട്ടതോടെ ‘നിന്നെ എങ്ങനെ ഊട്ടും’ എന്ന് ചോദിച്ച് മാനസിക പീഡനം കടുത്തു. പീഡനം കാരണം വിവാഹശേഷം ട്വിഷയ്ക്ക് 15 കിലോയോളം ഭാരം കുറഞ്ഞിരുന്നു. സമർത്ഥിന്റെ ആദ്യ വിവാഹവും ഇത്തരത്തിലുള്ള പീഡനങ്ങൾ കാരണം ഡിവോഴ്സിലാണ് കലാശിച്ചതെന്നും കുടുംബം വെളിപ്പെടുത്തി. മരണദിവസം രാത്രി 10 മണിക്ക് വരെ ട്വിഷ അമ്മയുമായി സംസാരിച്ചിരുന്നു. ഭോപ്പാലിലെ നരകത്തിൽ നിന്നും തന്നെ രക്ഷിക്കണമെന്നും നാട്ടിലേക്ക് കൂട്ടിക്കൊണ്ടുപോകണമെന്നും ആവശ്യപ്പെട്ട് ട്വിഷ അമ്മയ്ക്കയച്ച വാട്സ്ആപ്പ് സന്ദേശങ്ങളും, ‘വിവാഹക്കെണിയിൽ ചെന്നുപെടരുത്’ എന്ന് സുഹൃത്തിന് നൽകിയ മുന്നറിയിപ്പുകളും കഴിഞ്ഞദിവസം പുറത്തുവന്നിരുന്നു. ഗർഭച്ഛിദ്രം നടത്താൻ നിർബന്ധിച്ച സമർത്ഥ്, കുട്ടിയുടെ പിതാവ് ആരാണെന്ന് ചോദിച്ച് ട്വിഷയെ മാനസികമായി തകർത്തതായും ഈ ചാറ്റുകളിൽ വ്യക്തമാണ്.
പോലീസിന്റെ ഭാഗത്തുനിന്ന് ഗുരുതര വീഴ്ച; തെളിവ് അട്ടിമറിച്ചതായി ആക്ഷേപം
ട്വിഷയുടെ മരണവുമായി ബന്ധപ്പെട്ട അന്വേഷണത്തിൽ പോലീസിന്റെ ഭാഗത്തുനിന്ന് ഗുരുതരമായ വീഴ്ചകൾ സംഭവിച്ചതായി എയിംസ് ഭോപ്പാലിലെ പോസ്റ്റ്മോർട്ടം റിപ്പോർട്ട് വ്യക്തമാക്കുന്നു. ട്വിഷ ആത്മഹത്യ ചെയ്യാൻ ഉപയോഗിച്ചുവെന്ന് പറയുന്ന ‘ബെൽറ്റ്’ പോസ്റ്റ്മോർട്ടം സമയത്ത് അന്വേഷണ ഉദ്യോഗസ്ഥൻ ഡോക്ടർമാർക്ക് മുന്നിൽ ഹാജരാക്കിയില്ല. ഇതുമൂലം ട്വിഷയുടെ കഴുത്തിലെ പാടുകളും ബെൽറ്റും തമ്മിൽ ഒത്തുനോക്കാൻ ഫോറൻസിക് വിദഗ്ധർക്ക് സാധിച്ചില്ല. ഇത് തെളിവ് നശിപ്പിക്കാനുള്ള ബോധപൂർവ്വമായ ശ്രമമാണെന്ന് കുടുംബം ആരോപിക്കുന്നു. കൂടാതെ മൃതദേഹം കണ്ടെത്തിയ ഉടൻ പോലീസിനെ അറിയിക്കാതെ ഭർതൃവീട്ടുകാർ തനിയെ ആശുപത്രിയിലേക്ക് മാറ്റിയതും ദുരൂഹത വർദ്ധിപ്പിക്കുന്നു. മൂന്ന് പുരുഷന്മാർ ചേർന്ന് ട്വിഷയുടെ മൃതദേഹം ഗോവണിയിലൂടെ താഴേക്ക് കൊണ്ടുവരുന്ന സി.സി.ടി.വി ദൃശ്യങ്ങൾ പോലീസിന് ലഭിച്ചിട്ടുണ്ട്. അന്വേഷണ ഉദ്യോഗസ്ഥന്റെ ഭാഗത്തുനിന്നുണ്ടായ വീഴ്ച മിസ്രോഡ് അസിസ്റ്റന്റ് പോലീസ് കമ്മീഷണർ രജനീഷ് കശ്യപ് സമ്മതിച്ചു. നിലവിൽ ബെൽറ്റ് ഫോറൻസിക് ലാബിലേക്ക് മാറ്റിയതായി അദ്ദേഹം അറിയിച്ചു.
കേസിൽ മുൻകൂർ ജാമ്യാപേക്ഷ തള്ളപ്പെട്ടതിനെ തുടർന്ന് ഒളിവിൽ പോയ ഭർത്താവ് സമർത്ഥ് സിംഗിനെ കണ്ടെത്താൻ ഭോപ്പാൽ പോലീസ് 10,000 രൂപ പ്രതിഫലം പ്രഖ്യാപിച്ചിട്ടുണ്ട്. കേസിൽ പ്രത്യേക അന്വേഷണ സംഘം (SIT) അന്വേഷണം തുടരുകയാണ്.
Summary: The investigation into the death of 33-year-old model and actress Twisha Sharma in Bhopal has turned into a high-profile dispute, with critical lapses raised over the police’s forensic handling. Twisha’s mother-in-law, Giribala Singh (a retired judge), alleged that Twisha suffered from severe psychiatric issues and drug addiction, claiming she consumed marijuana during pregnancy. However, police stated there is no evidence backing these claims.
