ന്യൂഡൽഹി: തൊഴിലില്ലാത്ത യുവാക്കളെയും സോഷ്യൽ മീഡിയ ആക്ടിവിസ്റ്റുകളെയും ചീഫ് ജസ്റ്റിസ് സൂര്യകാന്ത് ‘പാറ്റകളോട്’ ഉപമിച്ചതിൽ പ്രതിഷേധിച്ച് എക്സിൽ രൂപംകൊണ്ട ആക്ഷേപഹാസ്യ രാഷ്ട്രീയ മുന്നണിയായ ‘കോക്രോച്ച് ജനതാ പാർട്ടി’ക്ക് (CJP) വൻ ജനപ്രീതി. ചീഫ് ജസ്റ്റിസിന്റെ പ്രസ്താവനയ്ക്കെതിരെയുള്ള ഡിജിറ്റൽ പ്രതിഷേധമായി മാറിയ ഈ പ്രസ്ഥാനത്തിൽ തൃണമൂൽ കോൺഗ്രസ് നേതാക്കളായ മഹുവ മൊയ്ത്ര, കീർത്തി ആസാദ് എന്നിവരും തിങ്കളാഴ്ച പ്രതീകാത്മകമായി പങ്കാളികളായതോടെ വിഷയം ദേശീയതലത്തിൽ ശ്രദ്ധേയമായി.(Cockroach Janata Party Trends On X Over Chief Justice Suryakant Viral Remarks On Youth)
കഴിഞ്ഞയാഴ്ച സുപ്രീം കോടതി നടപടികൾക്കിടെയായിരുന്നു ചീഫ് ജസ്റ്റിസിന്റെ വിവാദ പരാമർശം. യാതൊരു തൊഴിലുമില്ലാത്ത ചില യുവാക്കളുണ്ട്. അവരിൽ ചിലർ മാധ്യമപ്രവർത്തകരും ചിലർ സോഷ്യൽ മീഡിയ, ആർ.ടി.ഐ ആക്ടിവിസ്റ്റുകളുമായി സമൂഹത്തെ ആക്രമിക്കുന്നു. ഇവർ വെറും പാറ്റകളും പരാദങ്ങളുമാണ് എന്നായിരുന്നു ചീഫ് ജസ്റ്റിസ് പറഞ്ഞത്. ഇതിനെതിരെ രാജ്യവ്യാപകമായി യുവാക്കളിൽ നിന്നും ആക്ടിവിസ്റ്റുകളിൽ നിന്നും കടുത്ത വിമർശനമുയർന്നതിന് പിന്നാലെയാണ് സോഷ്യൽ മീഡിയയിൽ സി.ജെ.പി എന്ന പേരിൽ അക്കൗണ്ട് പ്രത്യക്ഷപ്പെട്ടത്.
പ്രസ്താവന വൻ വിവാദമായതോടെ ചീഫ് ജസ്റ്റിസ് സൂര്യകാന്ത് ഒടുവിൽ വിശദീകരണവുമായി രംഗത്തെത്തി. തന്റെ വാക്കാലുള്ള നിരീക്ഷണങ്ങൾ ചില മാധ്യമങ്ങൾ തെറ്റായി ഉദ്ധരിച്ചതാണെന്നും ഇന്ത്യയിലെ യുവാക്കളെയാകെ ഉദ്ദേശിച്ചല്ല താൻ അങ്ങനെ പറഞ്ഞതെന്നും അദ്ദേഹം വ്യക്തമാക്കി. വ്യാജ സർട്ടിഫിക്കറ്റുകൾ ഉപയോഗിച്ച് തട്ടിപ്പ് നടത്തുന്ന ചില വ്യക്തികളെയാണ് താൻ ഉദ്ദേശിച്ചതെന്നും ഒരു നിസ്സാര കേസ് പരിഗണിക്കുന്നതിനിടെയുണ്ടായ പരാമർശങ്ങൾ വളച്ചൊടിച്ചതിൽ തനിക്ക് വേദനയുണ്ടെന്നും ചീഫ് ജസ്റ്റിസ് കൂട്ടിച്ചേർത്തു.
ചീഫ് ജസ്റ്റിസിന്റെ പ്രസ്താവനയെ ട്രോളുകളിലൂടെ പ്രതിരോധിക്കാൻ എക്സിൽ രൂപീകരിച്ച ഒരു അനൗദ്യോഗിക ആക്ഷേപഹാസ്യ കൂട്ടായ്മയാണിത്. കൂളിങ് ഗ്ലാസ് ധരിച്ച ഒരു പാറ്റയുടെ ചിത്രമാണ് ഈ പേജിന്റെ പ്രധാന ലോഗോ. യുവാക്കൾക്കായി, യുവാക്കളാൽ രൂപീകരിക്കപ്പെട്ട ഒരു രാഷ്ട്രീയ മുന്നണി. സെക്കുലർ-സോഷ്യലിസ്റ്റ്-ഡെമോക്രാറ്റിക്-മടിയന്മാർ എന്നാണ് ഈ പേജ് സ്വയം പരിചയപ്പെടുത്തുന്നത്. ‘മടിയന്മാരുടെയും തൊഴിലില്ലാത്തവരുടെയും ശബ്ദം’ എന്ന് വിശേഷിപ്പിക്കുന്ന ഈ അക്കൗണ്ടിന് 24 മണിക്കൂറിനുള്ളിൽ 15,000-ത്തിലധികം ഫോളോവേഴ്സിനെ ലഭിച്ചു. നിലവിൽ 40,000-ത്തിലധികം ആളുകൾ ഈ ഡിജിറ്റൽ പ്രതിഷേധ മുന്നണിയുടെ ഭാഗമായതായി അക്കൗണ്ട് ഭാരവാഹികൾ അവകാശപ്പെടുന്നു.
Story Summary
An satirical political front named ‘Cockroach Janata Party’ (CJP) has gone viral on X (formerly Twitter) in protest against Chief Justice Suryakant’s remarks comparing unemployed youth and RTI activists to “cockroaches and parasites.” TMC leaders Mahua Moitra and Kirti Azad joined the trend, prompting the CJI to issue a clarification stating his comments were misquoted.
