ഗിസ: പ്രൊഫഷണൽ സ്ക്വാഷ് അസോസിയേഷൻ ലോക സ്ക്വാഷ് ചാമ്പ്യൻഷിപ്പിൽ ചരിത്രം തിരുത്തിക്കുറിച്ചു ഈജിപ്റ്റിന്റെ കൗമാരതാരം അമീന ഒർഫി (Amina Orfi Youngest Women Squash World Champion). ശനിയാഴ്ച ഈജിപ്റ്റിലെ ഗിസയിൽ നടന്ന ആവേശകരമായ ഫൈനൽ പോരാട്ടത്തിൽ ലോക രണ്ടാം നമ്പർ താരം നൂർ എൽ-ഷെർബീനിയെ അഞ്ച് സെറ്റുകൾ നീണ്ട കടുത്ത പോരാട്ടത്തിൽ അട്ടിമറിച്ചാണ് 18-കാരിയായ അമീന ഒർഫി കിരീടം ചൂടിയത്. സ്ക്വാഷ് ചരിത്രത്തിലെ ഏറ്റവും പ്രായം കുറഞ്ഞ വനിതാ ലോക ചാമ്പ്യനാണ് ഇനി അമീന.
സ്കോർ: 6-11, 11-6, 11-9, 7-11, 14-12. വെറും 18 വയസ്സും 10 മാസവും പ്രായമുള്ള അമീന ഒർഫി, ഒരേസമയം ലോക ജൂനിയർ കിരീടവും സീനിയർ പി.എസ്.എ ലോക ചാമ്പ്യൻഷിപ്പ് കിരീടവും കൈവശം വെക്കുന്ന ചരിത്രത്തിലെ ആദ്യ താരം കൂടിയാണ്. തന്റെ ഒൻപതാം ലോക കിരീടം ലക്ഷ്യമിട്ടിറങ്ങിയ 31-കാരിയായ ഇതിഹാസ താരം നൂർ എൽ-ഷെർബീനിയെയാണ് അമീന നിഷ്പ്രഭയാക്കിയത്. വനിതാ സ്ക്വാഷ് ചരിത്രത്തിലെ ഏറ്റവും ദൈർഘ്യമേറിയ രണ്ടാമത്തെ ഫൈനൽ മത്സരമായിരുന്നു ഇത്. സെമിഫൈനലിൽ ലോക ഒന്നാം നമ്പർ താരം ഹാനിയ എൽ-ഹമ്മാമിയെയും അമീന പരാജയപ്പെടുത്തിയിരുന്നു.
അതേസമയം, പുരുഷന്മാരുടെ ഫൈനലിൽ നിലവിലെ ചാമ്പ്യനായ ഈജിപ്റ്റിന്റെ മോസ്തഫ അസൽ കിരീടം നിലനിർത്തി. ഫൈനലിൽ ഏഴാം സീഡായ യൂസഫ് ഇബ്രാഹിമിനെ നേരിട്ടുള്ള സെറ്റുകൾക്ക് തകർത്താണ് (11-4, 11-1, 12-10) ഇരുപത്തഞ്ചുകാരനായ അസൽ തന്റെ കരിയറിലെ രണ്ടാമത്തെ ലോക ചാമ്പ്യൻഷിപ്പ് ട്രോഫി സ്വന്തമാക്കിയത്. തോളിലെ പരിക്കിനോട് പോരാടിയാണ് യൂസഫ് ഇബ്രാഹിം ഫൈനലിൽ കളിച്ചതെന്നത് ശ്രദ്ധേയമാണ്. സ്വന്തം നാട്ടിലെ കാണികൾക്ക് മുന്നിൽ ലോക കിരീടം നിലനിർത്താനായതിൽ അതിയായ സന്തോഷമുണ്ടെന്ന് മോസ്തഫ അസൽ മത്സരശേഷം പ്രതികരിച്ചു.
Summary: Egypt’s 18-year-old Amina Orfi created history by becoming the youngest-ever women’s world squash champion, defeating world number two Nour El-Sherbini in a thrilling five-game final at the PSA World Championships 2026 in Giza. At 18 years and 10 months, Orfi also became the first player to simultaneously hold both the world junior and senior titles. Meanwhile, in the men’s division, 25-year-old Mostafa Asal successfully defended his crown and retained the world title by defeating Youssef Ibrahim in straight games.
