മുംബൈ: ഒമ്പത് വർഷം മുമ്പ് സീബ്രാ ക്രോസിങ്ങിലൂടെ റോഡ് മുറിച്ചുകടക്കുകയായിരുന്ന 17-കാരിയെ കാറിടിച്ചുതെറിപ്പിച്ച് മാസങ്ങളോളം അബോധാവസ്ഥയിലാക്കിയ കേസിൽ പ്രതിയായ ഡ്രൈവർക്ക് 20,000 രൂപ പിഴ ശിക്ഷ ( Mumbai Marine Drive Road Accident). മുംബൈ അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതിയാണ് മുൻ റെയിൽവേ കമ്മിഷണറുടെ ഡ്രൈവറായിരുന്ന പി. നാരായണസാമി പൂസാരിപ്പടയാച്ചിക്ക് (66) പിഴ ശിക്ഷ വിധിച്ചത്. ഈ തുക മുഴുവൻ നഷ്ടപരിഹാരമായി ഇരയായ പെൺകുട്ടിക്ക് നൽകാനും കോടതി ഉത്തരവിട്ടു. പിഴ അടച്ചില്ലെങ്കിൽ 30 ദിവസത്തെ തടവ് അനുഭവിക്കണം.
2017 മേയ് 28-നായിരുന്നു മനസ്സാക്ഷിയെ ഞെട്ടിച്ച ഈ അപകടം നടന്നത്. പ്ലസ് ടു പ്രവേശന ആവശ്യങ്ങൾക്കായി കെ.സി. കോളേജിലേക്ക് പോകുകയായിരുന്ന നിധി ജെഠ്മലാനി എന്ന 17-കാരിയെ ചർച്ച്ഗേറ്റിന് സമീപം മറൈൻ ഡ്രൈവിലെ സീബ്രാ ക്രോസിങ്ങിൽ വെച്ച് നാരായണസാമി ഓടിച്ചിരുന്ന ടൊയോട്ട ഇന്നോവ കാർ ഇടിച്ചുതെറിപ്പിക്കുകയായിരുന്നു. മണിക്കൂറിൽ 70 കിലോമീറ്ററിലധികം അമിതവേഗതയിലായിരുന്നു വാഹനം. അപകടത്തിൽ തലയ്ക്കും അരക്കെട്ടിനും ഗുരുതരമായി പരുക്കേറ്റ പെൺകുട്ടിയെ നാരായണസാമിയും കാറിലുണ്ടായിരുന്ന കമ്മിഷണറും ചേർന്നാണ് ആശുപത്രിയിലെത്തിച്ചത്. തലയോട്ടി തുറന്നുള്ള സങ്കീർണ്ണമായ ശസ്ത്രക്രിയയ്ക്ക് വിധേയയായ പെൺകുട്ടി മാസങ്ങളോളം അബോധാവസ്ഥയിലായിരുന്നു. മൂന്ന് മാസത്തെ തീവ്രപരിചരണത്തിന് ശേഷമാണ് നിധിക്ക് ആശുപത്രി വിടാനായത്.
കേസിൽ പ്രതി അശ്രദ്ധമായും അലക്ഷ്യമായും വാഹനമോടിച്ചതായി കോടതി കണ്ടെത്തിയെങ്കിലും ശിക്ഷാവിധിയിൽ മൃദുസമീപനം സ്വീകരിക്കുകയായിരുന്നു. പ്രതി ആദ്യമായാണ് ഒരു കുറ്റകൃത്യത്തിൽപ്പെടുന്നത് എന്നതും, സംഭവം നടന്നിട്ട് എട്ട് വർഷത്തിലേറെയായതിനാൽ വിചാരണയുടെ ദുരിതം പ്രതി ഇതിനകം അനുഭവിച്ചുവെന്നതും കോടതി കണക്കിലെടുത്തു. ചെന്നൈ സ്വദേശിയായ പ്രതി 2020-ൽ സർവീസിൽ നിന്ന് വിരമിച്ചതാണെന്നും നിലവിൽ പെൻഷൻ തുകകൊണ്ട് ജീവിക്കുന്നതിനാൽ സാമ്പത്തിക സ്ഥിതി മോശമാണെന്നുമുള്ള പ്രതിഭാഗം അഭിഭാഷകന്റെ വാദവും അഡീഷണൽ ചീഫ് ജുഡീഷ്യൽ മജിസ്ട്രേറ്റ് സുപ്രിയ വിജയ്സിങ് നിഖം വിധിന്യായത്തിൽ പരാമർശിച്ചു. അപകടം നടന്ന ദിവസം തന്നെ അറസ്റ്റിലായ പ്രതി മണിക്കൂറുകൾക്കകം ജാമ്യത്തിൽ ഇറങ്ങിയിരുന്നു.
Summary: Nine years after a road accident, a Mumbai court has sentenced a 66-year-old driver to a fine of ₹20,000 for knocking down a 17-year-old girl at a zebra crossing. The incident occurred on May 28, 2017, when the accused, P. Narayanasamy, driving a former Railway Commissioner’s official car at 70 km/h, hit Nidhi Jethmalani, leaving her comatose for months. Additional Chief Judicial Magistrate Supriya Vijay Singh Nikam took a lenient view considering the convict’s age, retirement, and clean prior record, directing the fine amount to be paid to the victim as compensation.
