തിരുവനന്തപുരം: നിയുക്ത മുഖ്യമന്ത്രി വി.ഡി. സതീശന്റെ നേതൃത്വത്തിലുള്ള പുതിയ യു.ഡി.എഫ് സർക്കാരിന്റെ സത്യപ്രതിജ്ഞാ ചടങ്ങിനായി തിരുവനന്തപുരം നഗരം സർവ്വസജ്ജമായി (Kerala Cabinet Swearing In Ceremony). മെയ് 18 തിങ്കളാഴ്ച നടക്കുന്ന ചടങ്ങിൽ സമീപകാലത്ത് കേരളം കണ്ട ഏറ്റവും വലിയ രാഷ്ട്രീയ ജനമുന്നേറ്റത്തിന് സാക്ഷ്യം വഹിക്കാൻ ഒരു ലക്ഷത്തോളം പേർ തലസ്ഥാനത്തേക്ക് ഒഴുകിയെത്തുമെന്നാണ് സംഘാടകർ പ്രതീക്ഷിക്കുന്നത്. സെൻട്രൽ സ്റ്റേഡിയത്തിൽ 30,000 പേർക്ക് ഒരേസമയം ഇരിക്കാൻ കഴിയുന്ന കൂറ്റൻ പന്തലാണ് തയ്യാറാക്കിയിട്ടുള്ളത്.
തിങ്കളാഴ്ച രാവിലെ മഴ പെയ്യാൻ സാധ്യതയുണ്ടെന്ന കാലാവസ്ഥാ പ്രവചനത്തെ തുടർന്ന് പൂർണ്ണമായും മേൽക്കൂര മേഞ്ഞ സുരക്ഷിതമായ പന്തലാണ് ഒരുക്കിയിരിക്കുന്നത്. വേദിക്ക് പുറകിലിരിക്കുന്നവർക്കും ചടങ്ങുകൾ വ്യക്തമായി കാണുന്നതിനായി സ്റ്റേഡിയത്തിനകത്തും നഗരത്തിന്റെ വിവിധ ഭാഗങ്ങളിലും കൂറ്റൻ എൽ.ഇ.ഡി ഡിസ്പ്ലേ സ്ക്രീനുകൾ സ്ഥാപിച്ചിട്ടുണ്ട്. വിവിഐപികളും ദേശീയ നേതാക്കളും പങ്കെടുക്കുന്നതിനാൽ നഗരത്തിൽ കനത്ത പോലീസ് സുരക്ഷയാണ് ഏർപ്പെടുത്തിയിരിക്കുന്നത്.
തിങ്കളാഴ്ച രാവിലെ 7 മണി മുതൽ നഗരത്തിൽ കർശനമായ ഗതാഗത നിയന്ത്രണങ്ങൾ ഏർപ്പെടുത്തിയിട്ടുണ്ട്. ഗതാഗതക്കുരുക്ക് ഒഴിവാക്കാനായി വിവിധ വാഹനങ്ങൾക്കായി പ്രത്യേക പാർക്കിംഗ് കേന്ദ്രങ്ങൾ പോലീസ് നിശ്ചയിച്ചിട്ടുണ്ട്:
പാർക്കിംഗ് ക്രമീകരണങ്ങൾ ഒറ്റനോട്ടത്തിൽ:
എം.എൽ.എമാർ, എം.പിമാർ: ഗവൺമെന്റ് സെക്രട്ടേറിയറ്റ് കോംപ്ലക്സ്.
ഉദ്യോഗസ്ഥർ, പോലീസ്, മാധ്യമങ്ങൾ: സംസ്കൃത കോളേജ് ഗ്രൗണ്ട്, കേരള യൂണിവേഴ്സിറ്റി കാമ്പസ്, യൂണിവേഴ്സിറ്റി കോളേജ് ഗ്രൗണ്ട്.
പ്രവർത്തകരുമായി എത്തുന്ന വലിയ വാഹനങ്ങൾ (ബസ് മുതലായവ): ആറ്റുകാൽ പാർക്കിംഗ് ഗ്രൗണ്ട്, ഇരണിമുട്ടം ഹോമിയോ കോളേജ് ഗ്രൗണ്ട്, പൂജപ്പുര മൈതാനം, ചാക്ക ബൈപ്പാസ് റോഡിന്റെ ഇരുവശങ്ങളും, കുഴിവിള-ആക്കുളം റോഡ്, കൈമനം-പാപ്പനംകോട് റോഡ്.
ചെറിയ വാഹനങ്ങൾ (കാർ, ജീപ്പ്): പുത്തരിക്കണ്ടം മൈതാനം, മഞ്ചാടിക്കുളം ഗ്രൗണ്ട്, സാഫല്യം കോംപ്ലക്സ് പരിസരവും മൾട്ടിലെവൽ പാർക്കിംഗും, ജനറൽ ആശുപത്രി പരിസരം, സെന്റ് ജോസഫ് സ്കൂൾ ഗ്രൗണ്ട്, വുമൺസ് കോളേജ്, ടാഗോർ തിയേറ്റർ വളപ്പ്, വികാസ് ഭവൻ റോഡ് തുടങ്ങി നഗരത്തിലെ പ്രധാന സ്കൂൾ-കോളേജ് ഗ്രൗണ്ടുകൾ.
ഇരുചക്ര വാഹനങ്ങൾ: പുളിമൂട്-ഓവർബ്രിഡ്ജ് റോഡിന്റെ ഇരുവശങ്ങളും, എ.ജി ഓഫീസിന് മുൻവശം, എ.കെ.ജി സെന്റർ-സ്പെൻസർ റോഡ്, വി.ജെ.ടി-ജേക്കബ്സ് റോഡ്, പബ്ലിക് ലൈബ്രറിക്ക് എതിർവശത്തുള്ള ഗ്രൗണ്ട്.
സത്യപ്രതിജ്ഞാ സമയത്ത് സ്റ്റാച്യൂ ഭാഗത്തേക്ക് വരുന്ന മറ്റ് സാധാരണ വാഹനങ്ങൾ നഗരത്തിന്റെ വിവിധ ഭാഗങ്ങളിൽ നിന്ന് തിരിച്ചുവിടുമെന്നും പൊതുജനങ്ങൾ സഹകരിക്കണമെന്നും സിറ്റി പോലീസ് അറിയിച്ചു.
Summary: Thiruvananthapuram is under a heavy security blanket with elaborate traffic restrictions in place ahead of the swearing-in ceremony of the V.D. Satheesan-led UDF government on Monday, May 18, 2026. A massive weatherproof pavilion accommodating 30,000 people and giant LED screens have been set up at the Central Stadium. Anticipating an influx of around 1 lakh people, Kerala Police will enforce strict traffic diversions starting from 7 a.m. and have designated specific parking zones across the city for VVIPs, large buses, and small vehicles.
