തിരുവനന്തപുരം: പുതിയ സർക്കാർ അധികാരമേൽക്കുമ്പോൾ മന്ത്രിമാർക്കായി പുത്തൻ വാഹനങ്ങൾ വാങ്ങേണ്ടതില്ലെന്ന് തീരുമാനം. മുൻ സർക്കാരിലെ മന്ത്രിമാർ ഉപയോഗിച്ചിരുന്ന മികച്ച കണ്ടീഷനിലുള്ള ഇന്നോവ ക്രിസ്റ്റ കാറുകൾ തന്നെയായിരിക്കും പുതിയ മുഖ്യമന്ത്രിയും മന്ത്രിമാരും ഔദ്യോഗിക യാത്രകൾക്കായി ഉപയോഗിക്കുക. നിയുക്ത മുഖ്യമന്ത്രി വി.ഡി. സതീശന്റെ ഔദ്യോഗിക വാഹനം മുൻ മന്ത്രി വി.എൻ. വാസവൻ ഉപയോഗിച്ചിരുന്ന വെള്ള ഇന്നോവ ക്രിസ്റ്റയായിരിക്കും.(Kerala New Ministry, VD Satheesan to use VN Vasavan’s official car as new Kerala government skips buying new vehicles)
ടൂറിസം വകുപ്പിന്റെ ഗാരേജിലുള്ള കാറുകളിൽ ഏറ്റവും കുറവ് കിലോമീറ്റർ ഓടിയത് വി.എൻ. വാസവൻ ഉപയോഗിച്ചിരുന്ന 2024 മോഡൽ കാറാണ്. വെറും 6000 കിലോമീറ്റർ മാത്രമാണ് ഈ വാഹനം നിരത്തിലിറങ്ങിയിട്ടുള്ളത്. ഇതോടൊപ്പം മുൻ മുഖ്യമന്ത്രിയുടെ ഓഫീസിന് നൽകിയിരുന്ന, അധികം ഓടാത്ത മറ്റൊരു വെള്ള ക്രിസ്റ്റ കൂടി ടൂറിസം ഗാരേജിൽ മാറ്റിവെച്ചിട്ടുണ്ട്. മുഖ്യമന്ത്രിയുടെ ഔദ്യോഗിക വാഹനം അറ്റകുറ്റപ്പണിക്ക് കയറ്റുമ്പോൾ പകരമായി ഉപയോഗിക്കാനാണ് ഈ കാർ സൂക്ഷിക്കുക. മുൻ മുഖ്യമന്ത്രി പിണറായി വിജയൻ പോലീസിന്റെ കറുത്ത ഇന്നോവകളിലേക്ക് മാറിയതിനാലാണ് ടൂറിസം വകുപ്പിന്റെ ഈ വെള്ള കാർ അധികം ഓടാതെ കിടന്നത്.
പുതിയ മന്ത്രിസഭയ്ക്കായി ആകെ 24 ഇന്നോവ ക്രിസ്റ്റകളാണ് ടൂറിസം വകുപ്പ് ഒരുക്കിയിരിക്കുന്നത്. മുഖ്യമന്ത്രിക്കും മന്ത്രിമാർക്കുമായി 21 വാഹനങ്ങളും സ്പീക്കർ, ഡെപ്യൂട്ടി സ്പീക്കർ, ചീഫ് വിപ്പ് എന്നിവർക്ക് ഓരോ വാഹനം വീതവും നൽകും. പ്രോട്ടോക്കോൾ പ്രകാരം ഒന്നാം നമ്പർ കാർ മുഖ്യമന്ത്രിക്കും, രണ്ടാം നമ്പർ മുസ്ലീം ലീഗ് മന്ത്രിക്കുമായിരിക്കും ലഭിക്കുക. മറ്റ് ഘടകകക്ഷി നേതാക്കൾക്ക് വലിപ്പമനുസരിച്ച് തുടർന്നുള്ള നമ്പറുകൾ ക്രമത്തിൽ നൽകും.
ചില പ്രമുഖ നേതാക്കൾ തങ്ങൾക്ക് താല്പര്യമുള്ള നമ്പറുകൾ ഇതിനോടകം ആവശ്യപ്പെട്ടിട്ടുണ്ട്. ഷിബു ബേബി ജോൺ 51-ാം നമ്പറും, കെ. മുരളീധരൻ 11-ാം നമ്പറും, തിരുവഞ്ചൂർ രാധാകൃഷ്ണൻ 10-ാം നമ്പറും, എ.പി. അനിൽകുമാർ 7-ാം നമ്പറും ആവശ്യപ്പെട്ടിട്ടുണ്ട്. മന്ത്രിമാരുടെ താല്പര്യപ്രകാരം ഇത്തരം നമ്പറുകൾ സാധാരണയായി മാറ്റിനൽകാറുണ്ട്. വിവിഐപി സുരക്ഷ മുൻനിർത്തി കേന്ദ്ര നിർദ്ദേശപ്രകാരമായിരുന്നു മുൻ മുഖ്യമന്ത്രി പിണറായി വിജയനായി പൈലറ്റ്, എസ്കോർട്ട് സംവിധാനങ്ങൾ ഉൾപ്പെടെ കറുത്ത ഇന്നോവ കാറുകൾ പോലീസ് സജ്ജമാക്കിയിരുന്നത്. പുതിയ ഭരണമാറ്റത്തോടെ ഈ കറുത്ത വാഹനവ്യൂഹത്തെ പോലീസ് സേനയിലേക്ക് തന്നെ തിരിച്ചയച്ചിട്ടുണ്ട്.
Story Summary
The new Kerala government has decided not to purchase new vehicles for the cabinet, opting instead to reuse the Innova Crystas from the previous ministry. Designated Chief Minister V D Satheesan will use the 2024 model white Crysta previously used by V N Vasavan, while 24 reconditioned vehicles have been prepared for other ministers and officials with specific registration numbers.
