തിരുവനന്തപുരം: കേരളത്തിന്റെ പുതിയ മുഖ്യമന്ത്രിയായി വി.ഡി. സതീശനെ പ്രഖ്യാപിച്ചതിന് പിന്നാലെ കോൺഗ്രസിനുള്ളിൽ ഉടലെടുത്ത അതൃപ്തി പരിഹരിക്കാൻ ഹൈക്കമാൻഡ് അടിയന്തര ഇടപെടൽ നടത്തി. രമേശ് ചെന്നിത്തലയെ അനുനയിപ്പിക്കാനായി കേരളത്തിന്റെ ചുമതലയുള്ള എ.ഐ.സി.സി ജനറൽ സെക്രട്ടറി ദീപാദാസ് മുൻഷി അദ്ദേഹത്തിന്റെ വഴുതക്കാട്ടെ വസതിയിലെത്തി കൂടിക്കാഴ്ച നടത്തി. ചെന്നിത്തലയ്ക്ക് ആഭ്യന്തര വകുപ്പ് നൽകി അനുനയിപ്പിക്കുമോ എന്ന കാര്യത്തിൽ രാഷ്ട്രീയ കേന്ദ്രങ്ങളിൽ ആകാംക്ഷ ശക്തമാണ്.(VD Satheesan Swearing In On Monday And First Kerala Assembly Session From May Twenty One)
ദീപാദാസ് മുൻഷിയുടെ സന്ദർശനത്തിന് മുന്നോടിയായി നിയുക്ത മുഖ്യമന്ത്രി വി.ഡി. സതീശനും ചെന്നിത്തലയുടെ വസതിയിലെത്തി അടച്ചിട്ട മുറിയിൽ ചർച്ച നടത്തിയിരുന്നു. പ്രമുഖ നേതാക്കളും ചർച്ചയിൽ പങ്കെടുത്തു. സംസ്ഥാനത്തെ എല്ലാ മുതിർന്ന നേതാക്കളെയും നേരിൽ കാണുന്നതിന്റെ ഭാഗമായാണ് താൻ എത്തിയതെന്നും, കഴിഞ്ഞ ദിവസം ചെന്നിത്തല ഗുരുവായൂർ സന്ദർശനത്തിലായിരുന്നതിനാലാണ് കൂടിക്കാഴ്ച ഇന്നത്തേക്ക് മാറ്റിയതെന്നും ദീപാദാസ് മുൻഷി മാധ്യമങ്ങളോട് പറഞ്ഞു.
നിയമസഭാ തിരഞ്ഞെടുപ്പിൽ യു.ഡി.എഫ് വൻവിജയം നേടിയെങ്കിലും മുഖ്യമന്ത്രിയെ തീരുമാനിക്കുന്നതിലുണ്ടായ കാലതാമസം വലിയ ചർച്ചയായിരുന്നു. ഫലം വന്ന് പതിനൊന്നാം ദിവസമായ കഴിഞ്ഞ ദിവസമാണ് കോൺഗ്രസ് നിയമസഭാകക്ഷി നേതാവായി വി.ഡി സതീശനെ ഹൈക്കമാൻഡ് ഔദ്യോഗികമായി പ്രഖ്യാപിച്ചത്. തുടർന്ന് അദ്ദേഹം രാജ്ഭവനിലെത്തി ഗവർണർ രാജേന്ദ്ര അർലേക്കറെ കണ്ട് സർക്കാർ രൂപീകരണത്തിനുള്ള അവകാശവാദം ഉന്നയിച്ചിരുന്നു. വരും തിങ്കളാഴ്ച രാവിലെ തിരുവനന്തപുരം സെൻട്രൽ സ്റ്റേഡിയത്തിലാണ് പുതിയ മുഖ്യമന്ത്രിയുടെയും മന്ത്രിമാരുടെയും സത്യപ്രതിജ്ഞാ ചടങ്ങ് നടക്കുക.
കേരളത്തിന്റെ പതിനാറാമത് നിയമസഭയുടെ ആദ്യസമ്മേളനം മേയ് 21-ാം തീയതി ചേരും. പുതിയതായി തിരഞ്ഞെടുക്കപ്പെട്ട അംഗങ്ങളുടെ സത്യപ്രതിജ്ഞ അന്ന് നടക്കും. തൊട്ടടുത്ത ദിവസമായ മേയ് 22-നായിരിക്കും പുതിയ സ്പീക്കറെ കണ്ടെത്താനുള്ള തിരഞ്ഞെടുപ്പ്. തുടർന്ന് മേയ് 29-ന് ഗവർണറുടെ നയപ്രഖ്യാപന പ്രസംഗത്തോടെ സഭാ നടപടികൾ ഔദ്യോഗികമായി പുരോഗമിക്കും.
Story Summary
The Congress high command is actively trying to pacify Ramesh Chennithala, who is disgruntled over the CM selection. Amidst these political developments, designated Chief Minister VD Satheesan will take oath this Monday, and the first session of the 16th Kerala Assembly is scheduled to commence on May 21.
