ന്യൂഡൽഹി: അന്താരാഷ്ട്ര തലത്തിൽ സുപ്രധാന നീക്കങ്ങളുമായി പ്രധാനമന്ത്രി നരേന്ദ്ര മോദി യൂറോപ്യൻ-അറബ് രാജ്യങ്ങളിലേക്ക്. വെള്ളിയാഴ്ച ആരംഭിക്കുന്ന ആറ് ദിവസത്തെ സന്ദർശനത്തിൽ അഞ്ച് രാജ്യങ്ങളിലെ ഭരണത്തലവന്മാരുമായി അദ്ദേഹം ചർച്ച നടത്തും. വ്യാപാരം, ഊർജ്ജം, പ്രതിരോധം, സാങ്കേതികവിദ്യ എന്നീ മേഖലകളിൽ സഹകരണം ഉറപ്പാക്കുകയാണ് പര്യടനത്തിന്റെ പ്രധാന ലക്ഷ്യം.(PM Modi Five Nation Visit UAE Europe May 2026)
പര്യടനത്തിന്റെ ആദ്യ ലക്ഷ്യസ്ഥാനം യുഎഇയാണ്. പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി പ്രധാനമന്ത്രി കൂടിക്കാഴ്ച നടത്തും. ഊർജ്ജ സഹകരണം, പശ്ചിമേഷ്യൻ സംഘർഷം എന്നിവ ചർച്ചയാകും. ഇന്ത്യയുടെ മൂന്നാമത്തെ വലിയ വ്യാപാര പങ്കാളിയാണ് യുഎഇ.
രണ്ടാം ഘട്ടത്തിൽ നെതർലൻഡ്സ് സന്ദർശിക്കുന്ന മോദി, രാജാവ് വില്ല്യം അലക്സാണ്ടർ, രാജ്ഞി മാക്സിമ എന്നിവരുമായി കൂടിക്കാഴ്ച നടത്തും. പ്രതിരോധം, സെമികണ്ടക്ടർ, ഗ്രീൻ ഹൈഡ്രജൻ എന്നീ മേഖലകളിലെ നിക്ഷേപം വർദ്ധിപ്പിക്കുന്നതിലാണ് ശ്രദ്ധ കേന്ദ്രീകരിക്കുന്നത്. സ്വീഡിഷ് പ്രധാനമന്ത്രി ഉൽഫ് ക്രിസ്റ്റർസണിന്റെ ക്ഷണം സ്വീകരിച്ചാണ് അടുത്ത സന്ദർശനം. എഐ (AI), ഗ്രീൻ ട്രാൻസിഷൻ, സ്റ്റാർട്ടപ്പുകൾ എന്നിവയിൽ ഇരുരാജ്യങ്ങളും തമ്മിലുള്ള സഹകരണം അവലോകനം ചെയ്യും.
43 വർഷത്തിന് ശേഷം ഒരു ഇന്ത്യൻ പ്രധാനമന്ത്രി നോർവേ സന്ദർശിക്കുന്നു എന്ന പ്രത്യേകതയും അടുത്ത സന്ദർശനത്തിനുണ്ട്. ഓസ്ലോയിൽ നടക്കുന്ന മൂന്നാം ഇന്ത്യ-നോർഡിക് ഉച്ചകോടിയിൽ മോദി പങ്കെടുക്കും. ഡെന്മാർക്ക്, ഫിൻലൻഡ്, ഐസ്ലൻഡ്, സ്വീഡൻ, നോർവേ എന്നീ രാജ്യങ്ങളിലെ പ്രധാനമന്ത്രിമാരും ഇതിൽ അണിനിരക്കും. പര്യടനത്തിന്റെ അവസാന പാദത്തിൽ ഇറ്റാലിയൻ പ്രധാനമന്ത്രി ജോർജിയ മെലോണിയുമായി മോദി ചർച്ച നടത്തും. പ്രതിരോധം, സുരക്ഷ, ക്ലീൻ എനർജി എന്നീ മേഖലകളിലെ 2025-2029 കാലയളവിലെ കർമ്മപദ്ധതി നടപ്പിലാക്കുന്നതിനെക്കുറിച്ച് ഇരുവരും സംസാരിക്കും. ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാറിന്റെ പശ്ചാത്തലത്തിൽ ഈ സന്ദർശനത്തിന് വലിയ പ്രാധാന്യമുണ്ട്.
Story Summary
PM Narendra Modi is set for a 6-day visit to the UAE, Netherlands, Sweden, Norway, and Italy starting Friday. The visit aims to strengthen bilateral ties in trade, defense, and green energy, including attending the 3rd India-Nordic Summit in Oslo.
