ന്യൂഡൽഹി: രാജ്യത്തെ സർക്കാർ സ്കൂളുകളിലെ അടിസ്ഥാന സൗകര്യങ്ങളുടെയും വിദ്യാഭ്യാസ നിലവാരത്തിന്റെയും ദയനീയാവസ്ഥ വെളിപ്പെടുത്തി നിതി ആയോഗിന്റെ പുതിയ റിപ്പോർട്ട്. “സ്കൂൾ എഡ്യൂക്കേഷൻ സിസ്റ്റം ഇൻ ഇന്ത്യ” (School Education System In India) എന്ന് പേരിട്ടിരിക്കുന്ന റിപ്പോർട്ട് പ്രകാരം ലക്ഷക്കണക്കിന് കുട്ടികൾ ഇപ്പോഴും അടിസ്ഥാന സൗകര്യങ്ങളില്ലാത്ത വിദ്യാലയങ്ങളെയാണ് ആശ്രയിക്കുന്നത്. (Government School Infrastructure Niti Aayog Report)
അടിസ്ഥാന സൗകര്യങ്ങളുടെ കുറവ്:
രാജ്യത്തെ സ്കൂളുകളിൽ വൈദ്യുതി, ശുദ്ധജലം, ശൗചാലയം എന്നിവയുടെ ലഭ്യതയിൽ ഇപ്പോഴും വലിയ കുറവുണ്ടെന്ന് റിപ്പോർട്ട് ചൂണ്ടിക്കാട്ടുന്നു.
- വൈദ്യുതി: ഏകദേശം 1.19 ലക്ഷം സ്കൂളുകളിൽ ഇപ്പോഴും പ്രവർത്തനക്ഷമമായ വൈദ്യുതി ബന്ധമില്ല.
- ശൗചാലയങ്ങൾ: 98,592 സ്കൂളുകളിൽ പെൺകുട്ടികൾക്കായി പ്രത്യേക ശൗചാലയങ്ങളില്ല. 61,540 സ്കൂളുകളിൽ യാതൊരു വിധത്തിലുള്ള ശൗചാലയ സൗകര്യവുമില്ല.
- കുടിവെള്ളം: 14,505 സ്കൂളുകളിൽ കുടിവെള്ള സൗകര്യമില്ല. കൂടാതെ 59,829 സ്കൂളുകളിൽ കൈ കഴുകാനുള്ള സൗകര്യം പോലുമില്ല.
അധ്യാപകരുടെ കുറവും നിലവാരവും
രാജ്യത്തെ വിദ്യാഭ്യാസ ഗുണനിലവാരത്തെ ബാധിക്കുന്ന പ്രധാന ഘടകങ്ങളിലൊന്ന്
അധ്യാപകരുടെ കുറവാണെന്ന് റിപ്പോർട്ട് വ്യക്തമാക്കുന്നു.
- ഏകാധ്യാപക സ്കൂളുകൾ: ഇന്ത്യയിൽ 1,04,125 സ്കൂളുകൾ പ്രവർത്തിക്കുന്നത് വെറും ഒരു അധ്യാപകന്റെ കീഴിലാണ്. ഇതിൽ 89 ശതമാനവും ഗ്രാമീണ മേഖലയിലാണ്.
- അധ്യാപക ഒഴിവുകൾ: ബിഹാറിൽ മാത്രം 2.08 ലക്ഷം അധ്യാപക ഒഴിവുകളാണുള്ളത്. ജാർഖണ്ഡിൽ 80,341-ഉം മധ്യപ്രദേശിൽ 47,122-ഉം ഒഴിവുകളുണ്ട്.
- നിലവാരം: സ്വന്തം വിഷയത്തിൽ 60 ശതമാനത്തിന് മുകളിൽ മാർക്ക് നേടാൻ കഴിയുന്നത് 10-15 ശതമാനം അധ്യാപകർക്ക് മാത്രമാണ്.
വിദ്യാർത്ഥികളുടെ കൊഴിഞ്ഞുപോക്ക്:
സെക്കൻഡറി തലത്തിൽ വിദ്യാർത്ഥികൾ സ്കൂൾ വിട്ടുപോകുന്നതും വലിയ വെല്ലുവിളിയാണ്. ദേശീയ ശരാശരി 11.5 ശതമാനമാണ്. പശ്ചിമ ബംഗാളിലാണ് (20%) ഏറ്റവും കൂടുതൽ കൊഴിഞ്ഞുപോക്ക് രേഖപ്പെടുത്തിയിരിക്കുന്നത്. കൂടാതെ, രാജ്യത്തെ 7,993 സ്കൂളുകളിൽ ഒരു വിദ്യാർത്ഥി പോലും പഠിക്കുന്നില്ല എന്നും റിപ്പോർട്ട് പറയുന്നു.
ജിഡിപി വിഹിതം
വിദ്യാഭ്യാസ മേഖലയ്ക്കായി ഇന്ത്യ ചെലവഴിക്കുന്നത് ജിഡിപിയുടെ 4.6 ശതമാനം മാത്രമാണ്. യുഎസ്, യുകെ തുടങ്ങിയ വികസിത രാജ്യങ്ങൾ 5.9 ശതമാനം വരെ ഇതിനായി ചെലവഴിക്കുന്നുണ്ട്. പഠനനിലവാരത്തിൽ കേരളത്തിന്റെ അയൽസംസ്ഥാനങ്ങളായ കർണാടകയും തമിഴ്നാടും മികച്ച പ്രകടനം നടത്തുമ്പോൾ ജാർഖണ്ഡ്, ഗുജറാത്ത് തുടങ്ങിയ സംസ്ഥാനങ്ങൾ പിന്നിലാണ്.
Summary: A new Niti Aayog report titled “School Education System In India” highlights severe infrastructure gaps in Indian government schools. Over 1.19 lakh schools lack electricity, while nearly 98,592 schools do not have functional girls’ toilets. The report also reveals that 1.04 lakh schools are run by a single teacher, and teacher vacancy rates remain high in states like Bihar and Jharkhand. Additionally, the national dropout rate at the secondary level stands at 11.5%, with West Bengal leading at 20%. India allocates only 4.6% of its GDP to education, falling behind developed nations.
