ഹൈദരാബാദ്: ഹൈദരാബാദിലെ ജൂബിലി ഹിൽസിലുള്ള വസതിയിൽ മുൻ ഐ.പി.എസ് ഉദ്യോഗസ്ഥനും ബിഹാർ മുൻ ഡി.ജി.പിയുമായ വിനയ് രഞ്ജൻ റേയുടെ ഭാര്യ സുനന്ദയെ (65) കൊല്ലപ്പെട്ട നിലയിൽ കണ്ടെത്തി (Hyderabad IPS Officer Wife Murdered). വെള്ളിയാഴ്ച രാവിലെ പ്രശാസൻ നഗറിലെ വസതിയുടെ ഒന്നാം നിലയിലാണ് മൃതദേഹം കണ്ടെത്തിയത്.
വ്യാഴാഴ്ച രാത്രിയാണ് കൊലപാതകം നടന്നതെന്നാണ് പ്രാഥമിക നിഗമനം. സംഭവം നടക്കുമ്പോൾ വിനയ് രഞ്ജൻ റായ് നഗരത്തിലുണ്ടായിരുന്നില്ല. വീട്ടിൽ നിന്ന് വിലപിടിപ്പുള്ള വസ്തുക്കളും ആഭരണങ്ങളും കവർന്നതായി കണ്ടെത്തിയിട്ടുണ്ട്. അതിനാൽ കവർച്ചാശ്രമത്തിനിടെയുള്ള കൊലപാതകമാണെന്നാണ് പോലീസ് സംശയിക്കുന്നത്.
വീട്ടിൽ പുതുതായി ജോലിക്കെത്തിയ നേപ്പാൾ സ്വദേശിനിയായ സ്ത്രീയെയും സംഘത്തെയുമാണ് പോലീസ് പ്രധാനമായും സംശയിക്കുന്നത്. സംഭവത്തിന് പിന്നാലെ ഇവർ ഒളിവിൽ പോയിരിക്കുകയാണ്. പ്രതികൾ സുനന്ദയെ ശ്വാസം മുട്ടിച്ച് കൊലപ്പെടുത്തിയതാകാം എന്നാണ് നിഗമനം. എന്നാൽ ചില റിപ്പോർട്ടുകൾ പ്രകാരം കഴുത്തറുത്താണ് കൊലപാതകം നടത്തിയതെന്നും പറയപ്പെടുന്നു.
ഹൈദരാബാദ് പോലീസ് കമ്മീഷണർ വി.സി. സജ്ജനാർ ഉൾപ്പെടെയുള്ള മുതിർന്ന ഉദ്യോഗസ്ഥർ സംഭവസ്ഥലം സന്ദർശിച്ചു. ഫോറൻസിക് വിദഗ്ധരും ഡോഗ് സ്ക്വാഡും സ്ഥലത്തെത്തി തെളിവുകൾ ശേഖരിച്ചു. ഒളിവിൽ പോയ പ്രതികളെ കണ്ടെത്തുന്നതിനായി പ്രത്യേക അന്വേഷണ സംഘങ്ങൾ (SIT) രൂപീകരിച്ചിട്ടുണ്ട്. നഗരത്തിലെ അതീവ സുരക്ഷയുള്ള പ്രദേശത്ത് നടന്ന ഈ കൊലപാതകം ഹൈദരാബാദിലെ താമസക്കാർക്കിടയിൽ വലിയ ആശങ്കയുണ്ടാക്കിയിട്ടുണ്ട്.
Story Summary: Sunanda, the wife of retired IPS officer and former Bihar DGP Vinay Ranjan Ray, was found murdered at her residence in Jubilee Hills, Hyderabad. Police suspect the family’s newly hired domestic help from Nepal and her associates, who are currently absconding after allegedly looting valuables from the house.
