ഹൈദരാബാദ്: ദീർഘനാളുകളായുള്ള ഉറക്കമില്ലായ്മയെയും കടുത്ത മാനസിക സമ്മർദ്ദത്തെയും തുടർന്ന് ആറ് മാസം പ്രായമുള്ള പെൺകുഞ്ഞിനെയുമെടുത്ത് യുവതി ഫ്ലാറ്റിന്റെ ആറാം നിലയിൽ നിന്ന് ചാടി മരിച്ചു (Techie suicide Hyderabad). വീഴ്ചയുടെ ആഘാതത്തിൽ അമ്മയുടെ കൈകളിൽ നിന്ന് തെന്നിമാറി താഴേക്ക് പതിച്ച കുഞ്ഞ് നിസ്സാര പരിക്കുകളോടെ അത്ഭുതകരമായി രക്ഷപ്പെട്ടു. മയൂരി നഗറിലെ ലക്ഷ്മി പ്രസ്റ്റീജ് അപ്പാർട്ട്മെന്റിൽ താമസിച്ചിരുന്ന സോഫ്റ്റ്വെയർ എഞ്ചിനീയറായ ഇഷ സാഹു (37) ആണ് ജീവനൊടുക്കിയത്.
കെട്ടിടത്തിൽ നിന്ന് ഇരുവരും താഴേക്ക് പതിക്കുന്നത് കണ്ട് ഓടിയെത്തിയ ഫ്ലാറ്റിലെ മറ്റ് താമസക്കാർ ഉടൻ തന്നെ കുഞ്ഞിനെ കെപിഎച്ച്ബിയിലെ ലോട്ടസ് ആശുപത്രിയിൽ എത്തിക്കുകയായിരുന്നു. കുഞ്ഞ് നിലവിൽ പൂർണ്ണമായും അപകടനില തരണം ചെയ്തതായി ഡോക്ടർമാർ വ്യക്തമാക്കി. എന്നാൽ, ആറാം നിലയിൽ നിന്നുള്ള വീഴ്ചയുടെ ആഘാതത്തിൽ തലയ്ക്ക് ഗുരുതരമായി പരിക്കേറ്റ ഇഷ സാഹു സംഭവസ്ഥലത്തുതന്നെ മരണപ്പെട്ടിരുന്നു.
പോലീസിന്റെ പ്രാഥമിക അന്വേഷണത്തിൽ ഇഷ കഴിഞ്ഞ കുറേ മാസങ്ങളായി ഉറക്കമില്ലായ്മ ഉൾപ്പെടെയുള്ള കടുത്ത മാനസിക ബുദ്ധിമുട്ടുകൾ നേരിട്ടിരുന്നതായി വ്യക്തമായി. ദീർഘനാളായുള്ള ഉറക്കക്കുറവും ഇതിനെത്തുടർന്നുണ്ടായ മാനസിക സമ്മർദ്ദവുമാകാം ആത്മഹത്യയിലേക്ക് നയിച്ചതെന്നാണ് പോലീസിന്റെ പ്രാഥമിക നിഗമനം. സംഭവത്തിൽ കൂടുതൽ വ്യക്തത വരുത്തുന്നതിനായി പോലീസ് ഇഷയുടെ കുടുംബാംഗങ്ങളുടെയും ബന്ധുക്കളുടെയും മൊഴി രേഖപ്പെടുത്തി വരികയാണ്.
Story Summary: A 37-year-old software engineer, Isha Sahu, committed suicide by jumping from the sixth floor of an apartment complex in Hyderabad along with her six-month-old baby due to severe insomnia and depression. While Isha died on the spot, her baby miraculously survived with minor injuries after slipping from her arms during the fall.
