മൈസൂരു: പൊതുസ്ഥലങ്ങളിൽ മൂത്രമൊഴിക്കുന്നത് തടയാൻ വ്യത്യസ്തമായൊരു മാർഗ്ഗവുമായി മൈസൂരു സിറ്റി കോർപ്പറേഷൻ. സെൻട്രൽ ബസ് സ്റ്റാൻഡിന് സമീപമുള്ള 80 മീറ്റർ നീളമുള്ള ചുറ്റുമതിലിലാണ് നഗരസഭ സ്റ്റെയിൻലെസ് സ്റ്റീൽ പ്രതിഫലന പാനലുകൾ സ്ഥാപിച്ചത് (Mysuru City Corporation Mirror Wall). ഭിത്തി ലക്ഷ്യമിട്ട് എത്തുന്നവർക്ക് സ്വന്തം രൂപം കണ്ണാടിയിൽ കാണാൻ സാധിക്കുമെന്നതിനാൽ ഇത് അവരിൽ ഒരു മാനസിക സമ്മർദ്ദം സൃഷ്ടിക്കുമെന്നും അതുവഴി ഈ പ്രവണത ഒഴിവാക്കാൻ സാധിക്കുമെന്നുമാണ് അധികൃതരുടെ കണക്കുകൂട്ടൽ.
രാത്രികാലങ്ങളിലും ഈ കണ്ണാടി പാളികൾ കൃത്യമായി കാണുന്നതിനായി എൽഇഡി ലൈറ്റുകളും ഇതിന് ചുറ്റും സജ്ജീകരിച്ചിട്ടുണ്ട്. തെരുവ് വിളക്കുകൾക്കൊപ്പം ഈ ലൈറ്റുകളും പ്രവർത്തിക്കും. ഏകദേശം 9.5 ലക്ഷം രൂപ ചെലവഴിച്ചാണ് ഈ പദ്ധതി നടപ്പിലാക്കിയിരിക്കുന്നത്. ഇത്തരമൊരു പരീക്ഷണം കർണാടകയിൽ തന്നെ ആദ്യമായാണെന്ന് ഉദ്യോഗസ്ഥർ അവകാശപ്പെടുന്നു.
നഗരസഭയുടെ ഈ നീക്കത്തോടു സമ്മിശ്ര പ്രതികരണമാണ് പൊതുജനങ്ങളിൽ നിന്നുണ്ടാകുന്നത്. ചിലർ ഈ നവീനമായ ആശയത്തെ സ്വാഗതം ചെയ്യുമ്പോൾ, മറ്റ് ചിലർ ഇത് പൊതുപണം പാഴാക്കലാണെന്ന് വിമർശിക്കുന്നു. ഭിത്തിയിൽ ദൈവങ്ങളുടെ ചിത്രം വരച്ചും മറ്റും ഈ പ്രശ്നത്തിന് പരിഹാരം കാണാൻ ശ്രമിച്ചിരുന്നെങ്കിലും അതൊന്നും ഫലിക്കാത്ത സാഹചര്യത്തിലാണ് മൈസൂരു നഗരസഭ ‘കണ്ണാടി’ വിദ്യയുമായി രംഗത്തെത്തിയത്.
Summary: In a unique move to tackle public urination, the Mysuru City Corporation (MCC) has installed 80-meter-long stainless steel reflective panels near the Central Bus Stand. The mirror-like surface acts as a psychological deterrent by making anyone standing near the wall clearly visible to passersby. The project, costing ₹9.5 lakh, also includes LED lighting for night visibility and has drawn mixed reactions from the public.
