തിരുവനന്തപുരം: കേരള നിയമസഭാ തിരഞ്ഞെടുപ്പ് ഫലം പുറത്തുവരാൻ മണിക്കൂറുകൾ മാത്രം ബാക്കിനിൽക്കെ വലിയ ആത്മവിശ്വാസ പ്രകടനവുമായി ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ (Rajeev Chandrasekhar on Kerala Election Results). കേരളത്തിലെ ജനങ്ങൾ ഇടതു-വലതു മുന്നണികളെ മടുത്തുകഴിഞ്ഞെന്നും സംസ്ഥാനത്തെ മൂന്നാം രാഷ്ട്രീയ ശക്തിയായി എൻഡിഎയെ അവർ അംഗീകരിച്ചുകഴിഞ്ഞെന്നും അദ്ദേഹം പറഞ്ഞു. അതീവ ശുഭപ്രതീക്ഷയോടെയാണ് തിരഞ്ഞെടുപ്പ് ഫലത്തെ കാത്തിരിക്കുന്നതെന്നും അദ്ദേഹം കൂട്ടിച്ചേർത്തു.
ഇത്തവണ ബിജെപി വലിയ മുന്നേറ്റം നടത്തുമെന്നും പല മണ്ഡലങ്ങളിലും അപ്രതീക്ഷിത വിജയം പാർട്ടി പ്രതീക്ഷിക്കുന്നുണ്ടെന്നും അദ്ദേഹം വ്യക്തമാക്കി. പകുതിയിലേറെ മണ്ഡലങ്ങളിൽ എൻഡിഎ അതിശക്തമായ പോരാട്ടമാണ് കാഴ്ചവെച്ചത്. പുറത്തുവന്ന എക്സിറ്റ് പോളുകളെല്ലാം ബിജെപിക്ക് അനുകൂലമായ സീറ്റുകൾ പ്രവചിക്കുന്നുണ്ട്. താഴെത്തട്ടിലുള്ള പ്രവർത്തകരിൽ നിന്നുള്ള വിവരങ്ങളും ഇത് ശരിവയ്ക്കുന്നതാണെന്ന് രാജീവ് ചന്ദ്രശേഖർ പറഞ്ഞു.
ശബരിമലയിലെ സ്വർണ്ണക്കൊള്ള, ഇടതുഭരണത്തിന്റെ കെടുകാര്യസ്ഥത, കോൺഗ്രസിന്റെ പ്രീണന രാഷ്ട്രീയം തുടങ്ങിയ വിഷയങ്ങൾ കേരളസമൂഹം ഗൗരവമായി ചർച്ച ചെയ്തു കഴിഞ്ഞു. വികസിത കേരളം എന്ന ബിജെപിയുടെ മുദ്രാവാക്യം മലയാളികൾ ഏറ്റെടുത്തുവെന്നും അദ്ദേഹം അവകാശപ്പെട്ടു. മാറ്റത്തിനായി വോട്ട് രേഖപ്പെടുത്തിയവർ ബിജെപിക്കൊപ്പം നിന്നുവെന്നും വോട്ട് ശതമാനത്തിലും സീറ്റുകളുടെ എണ്ണത്തിലും വലിയ വർധനവുണ്ടാകുമെന്നും രാജീവ് ചന്ദ്രശേഖർ ആത്മവിശ്വാസം പ്രകടിപ്പിച്ചു. പത്തുവർഷത്തെ ഇടതുഭരണത്തിന് അറുതി വരുത്തി ബിജെപി നിർണ്ണായക ശക്തിയായി മാറുന്ന ഫലമാകും മെയ് 4-ന് പുറത്തുവരികയെന്നാണ് ബിജെപി നേതൃത്വത്തിന്റെ വിലയിരുത്തൽ.
Summary: BJP State President Rajeev Chandrasekhar expressed strong confidence ahead of the Kerala Assembly election results, stating that the people of Kerala have grown tired of both the LDF and UDF. He noted that the NDA has been accepted as the state’s third major political force and expects unexpected victories in several constituencies. Chandrasekhar highlighted that issues like administrative mismanagement by the LDF and the BJP’s vision for a “Developed Kerala” resonated with voters, making him optimistic about a significant breakthrough in the results to be declared on May 4.
