അടൂർ: സാമൂഹിക മാധ്യമങ്ങളിലൂടെ പത്തനംതിട്ട ജില്ലാ പഞ്ചായത്തംഗം ശ്രീനാദേവി കുഞ്ഞമ്മയെ മോശമായ രീതിയിൽ ചിത്രീകരിക്കുകയും അപമാനിക്കുകയും ചെയ്തെന്ന പരാതിയിൽ പ്രമുഖ യൂട്യൂബർ അറസ്റ്റിൽ (Youtuber rajan joseph arrested). മഞ്ചേരി കൂമംകുളം തൃക്കലങ്ങോട് പുള്ളൂർ വീട്ടിൽ രാജൻ ജോസഫിനെ (48) ആണ് അടൂർ പോലീസ് ഔദ്യോഗികമായി അറസ്റ്റ് ചെയ്തത്. കൊച്ചിയിൽ ഒളിവിൽ കഴിഞ്ഞിരുന്ന ഇയാളെ ശനിയാഴ്ച രാത്രിയോടെയാണ് പോലീസ് സംഘം കസ്റ്റഡിയിൽ എടുത്തത്.
കഴിഞ്ഞ ജൂൺ നാലിനാണ് ശ്രീനാദേവി കുഞ്ഞമ്മയുടെ പരാതിയുടെ അടിസ്ഥാനത്തിൽ അടൂർ പോലീസ് പ്രതിക്കെതിരെ കേസ് രജിസ്റ്റർ ചെയ്തത്. യൂട്യൂബ് ചാനൽ വഴിയും മറ്റ് സോഷ്യൽ മീഡിയ പ്ലാറ്റ്ഫോമുകൾ വഴിയും സ്ത്രീത്വത്തെ അപമാനിക്കുന്ന തരത്തിലുള്ള അശ്ലീല ചുവയുള്ളതും വ്യക്തിഹത്യ നടത്തുന്നതുമായ വീഡിയോകൾ നിരന്തരം പ്രചരിപ്പിച്ചെന്ന കുറ്റമാണ് ഇയാൾക്കെതിരെ ചുമത്തിയിരിക്കുന്നത്.
അറസ്റ്റിലായ രാജൻ ജോസഫിനെതിരെ ഇതിനുമുമ്പും സമാനമായ രീതിയിൽ സ്ത്രീകളെ അപകീർത്തിപ്പെടുത്തിയതിന് കേരളത്തിലെ മറ്റ് പല പോലീസ് സ്റ്റേഷനുകളിലും കേസുകളും പരാതികളും നിലവിലുണ്ടെന്ന് അടൂർ പോലീസ് വ്യക്തമാക്കി. ഇയാളുടെ ഡിജിറ്റൽ ഉപകരണങ്ങളും പോലീസ് വിശദമായ പരിശോധനയ്ക്കായി കസ്റ്റഡിയിലെടുത്തിട്ടുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്യാനുള്ള നടപടികൾ പുരോഗമിക്കുകയാണ്.
Story Summary: Youtuber Rajan Joseph (48) from Manjeri was arrested by the Adoor Police from Kochi following a defamation and harassment complaint filed by Pathanamthitta District Panchayat member Sreenadevi Kunjamma. He was booked for circulating videos outraging the modesty of women on social media platforms.
