വാഷിങ്ടൺ: ഇറാൻ സമർപ്പിച്ച 14 ഇന സമാധാന നിർദേശങ്ങൾ അംഗീകരിക്കാൻ കഴിയില്ലെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. ചർച്ചകൾ പരാജയപ്പെട്ടാൽ ഇറാന് നേരെ വീണ്ടും സൈനിക നടപടികൾ ആരംഭിക്കുമെന്നും ട്രംപ് മുന്നറിയിപ്പ് നൽകി. ഫ്ളോറിഡയിൽ മാധ്യമങ്ങളോട് സംസാരിക്കവെയാണ് ഇറാന്റെ പെരുമാറ്റം മോശമായാൽ ശക്തമായ ആക്രമണം നേരിടേണ്ടി വരുമെന്ന് ട്രംപ് വ്യക്തമാക്കിയത്.(Trump may not accept Iran’s peace proposals with new 14 demands )
മേഖലയിലെ സംഘർഷം അവസാനിപ്പിക്കുന്നതിനായി 14 പ്രധാന നിർദേശങ്ങളാണ് ഇറാൻ മുന്നോട്ടുവെച്ചത്. വെടിനിർത്തൽ നീട്ടുന്നതിന് പകരം യുദ്ധം പൂർണ്ണമായും അവസാനിപ്പിക്കണമെന്നതാണ് ഇറാന്റെ പ്രധാന ആവശ്യം. ലെബനൻ ഉൾപ്പെടെയുള്ള മേഖലകളിലെ ആക്രമണങ്ങൾ അവസാനിപ്പിക്കുകയും മിഡിൽ ഈസ്റ്റിൽ നിന്ന് അമേരിക്കൻ സേനയെ പൂർണ്ണമായും പിൻവലിക്കുകയും വേണം.
ഇറാന് മേൽ ഏർപ്പെടുത്തിയിട്ടുള്ള എല്ലാ സാമ്പത്തിക-സൈനിക ഉപരോധങ്ങളും പിൻവലിക്കണം. ഹോർമുസ് കടലിടുക്കിന്റെ നിയന്ത്രണത്തിനായി പുതിയ സുരക്ഷാ സംവിധാനം വേണമെന്നും ഇറാൻ ആവശ്യപ്പെട്ടിട്ടുണ്ട്. ഇറാന്റെ നിർദേശങ്ങൾ പരിശോധിച്ചു വരികയാണെന്ന് നേരത്തെ പ്രതികരിച്ചിരുന്നെങ്കിലും, നിലവിൽ അവ അംഗീകരിക്കാൻ സാധ്യമല്ലെന്ന നിലപാടിലാണ് ട്രംപ് എത്തിയിരിക്കുന്നത്. ഇറാന്റെ ആവശ്യങ്ങൾ അമേരിക്കയുടെ താല്പര്യങ്ങൾക്ക് വിരുദ്ധമാണെന്നാണ് വൈറ്റ് ഹൗസിന്റെ വിലയിരുത്തൽ.
