കോഴിക്കോട്: ബേപ്പൂർ മണ്ഡലത്തിൽ വലിയ വിജയം നേടുമെന്നും സംസ്ഥാനത്ത് ഭരണത്തുടർച്ചയുണ്ടാകുമെന്നും മന്ത്രി പി.എ. മുഹമ്മദ് റിയാസ്. കഴിഞ്ഞ അഞ്ച് വർഷത്തെ വികസന പ്രവർത്തനങ്ങളും ജനക്ഷേമ പദ്ധതികളും ജനങ്ങൾക്കിടയിൽ വലിയ സ്വാധീനം ചെലുത്തിയിട്ടുണ്ടെന്നും അദ്ദേഹം പറഞ്ഞു.(Victory is guaranteed in Beypore, says Minister PA Mohammed Riyas ahead of Vote counting )
മണ്ഡലത്തിൽ ഇത്തവണ സ്ത്രീ വോട്ടർമാരുടെ വലിയ പിന്തുണ ലഭിച്ചിട്ടുണ്ടെന്ന് മന്ത്രി അവകാശപ്പെട്ടു. 53 ശതമാനത്തോളം സ്ത്രീകൾ വോട്ട് രേഖപ്പെടുത്തിയിട്ടുണ്ട്. സർക്കാർ സ്കൂളുകളിലെ മാറ്റങ്ങളും വികസന പ്രവർത്തനങ്ങളും അമ്മമാരും ഉമ്മമാരും നേരിട്ട് കാണുന്നതാണ്. പെൻഷൻ മുടങ്ങാതെ ലഭിക്കുന്നതും പുതിയതായി പ്രഖ്യാപിച്ച സ്ത്രീ സുരക്ഷാ പെൻഷനും വോട്ടർമാരെ എൽ.ഡി.എഫിനോട് അടുപ്പിച്ചു. ഭരണം മാറിയാൽ ഈ ആനുകൂല്യങ്ങളെല്ലാം നഷ്ടപ്പെടുമെന്നും യു.ഡി.എഫ് എല്ലാം കുളമാക്കുമെന്നുമുള്ള ബോധ്യം ജനങ്ങൾക്കുണ്ട്, റിയാസ് പറഞ്ഞു.
എൽ.ഡി.എഫ് മന്ത്രിമാർക്കെല്ലാം മണ്ഡലങ്ങളിൽ വലിയ അംഗീകാരമുണ്ടെന്ന് അദ്ദേഹം കൂട്ടിച്ചേർത്തു. സ്ഥാനാർത്ഥികളുടെ വ്യക്തിപരമായ മികവും പോസിറ്റീവ് വോട്ടുകളും ഇത്തവണ എൽ.ഡി.എഫിന് അനുകൂലമാകും. ഫ്ലോട്ടിങ് വോട്ടുകൾ പൂർണ്ണമായും എൽ.ഡി.എഫ് പാളയത്തിലെത്തുമെന്നും വലിയ ഭൂരിപക്ഷത്തോടെ വിജയം ഉറപ്പാണെന്നും അദ്ദേഹം ആത്മവിശ്വാസം പ്രകടിപ്പിച്ചു.
