തൃശൂർ: മുണ്ടത്തിക്കോട് വെടിക്കെട്ട് പുരയിലുണ്ടായ സ്ഫോടനത്തിൽ പരിക്കേറ്റ് ചികിത്സയിലായിരുന്ന തൃശൂർ സ്വദേശി രാകേഷ് മരണത്തിന് കീഴടങ്ങി. മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ കഴിയുകയായിരുന്നു അദ്ദേഹം. 85 ശതമാനത്തിലധികം പൊള്ളലേറ്റ രാകേഷിന്റെ നില അതീവ ഗുരുതരമായി തുടരുകയായിരുന്നു.(Mundathikode tragedy, One more person dies, death toll reaches 17)
സ്ഫോടനത്തിൽ പരിക്കേറ്റ മറ്റുചിലരും മരണത്തിന് കീഴടങ്ങിയിരുന്നു. തിരുവമ്പാടി വിഭാഗത്തിന്റെ വെടിക്കെട്ട് കരാറുകാരനായ സതീശൻ മരിച്ചിരുന്നു. എടപ്പാൾ സ്വദേശിയായ ഉണ്ണികൃഷ്ണൻ ഇന്നലെയാണ് മരിച്ചത്. ഇവർക്ക് പുറമെ വെടിക്കെട്ട് പുരയിലുണ്ടായിരുന്ന തൊഴിലാളികളും സഹായികളുമാണ് അപകടത്തിൽപ്പെട്ട മറ്റുള്ളവർ.
തൃശൂർ പൂരത്തിനായി വെടിക്കെട്ട് സാമഗ്രികൾ നിർമ്മിച്ചിരുന്ന മുണ്ടത്തിക്കോട്ടെ ശാലയിലായിരുന്നു അപകടം. കിലോമീറ്ററുകൾ അകലെ വരെ സ്ഫോടന ശബ്ദം കേട്ടിരുന്നു. വെടിക്കെട്ട് നിർമ്മാണ ശാല പൂർണ്ണമായും തകർന്നു. സ്ഫോടനത്തിന്റെ ആഘാതത്തിൽ മൃതദേഹങ്ങൾ ചിതറിത്തെറിച്ച നിലയിലായിരുന്നു. അകലെയുള്ള പാടശേഖരങ്ങളിൽ വരെ ശരീരഭാഗങ്ങൾ തെറിച്ചുവീണത് അപകടത്തിന്റെ തീവ്രത വ്യക്തമാക്കുന്നു.
