ഓസ്ട്രേലിയ: പ്രായം വെറും അക്കങ്ങൾ മാത്രമാണെന്ന് തെളിയിച്ച് ഓസ്ട്രേലിയയിൽ 18,000 അടി ഉയരത്തിൽ നിന്ന് സ്കൈ ഡൈവിംഗ് നടത്തി വിസ്മയം തീർത്തിരിക്കുകയാണ് ഒരു ഇന്ത്യൻ മുത്തശ്ശൻ (Indian Grandfather Skydiving Australia). പേരക്കുട്ടിയായ അങ്കിത് എന്ന യുവാവാണ് മുത്തശ്ശന്റെ ഈ സാഹസിക യാത്രയുടെ വീഡിയോ സോഷ്യൽ മീഡിയയിൽ പങ്കുവെച്ചത്. ഒട്ടേറെ യുവാക്കൾക്ക് പോലും ചെയ്യാൻ മടിയുള്ള ഈ അസാധാരണ നേട്ടം മുത്തശ്ശൻ വളരെ ആത്മവിശ്വാസത്തോടെയാണ് പൂർത്തിയാക്കിയത്.
സ്കൈ ഡൈവിംഗ് മുത്തശ്ശന് പുത്തരിയല്ല. നേരത്തെ 15,000 അടി ഉയരത്തിൽ നിന്ന് അദ്ദേഹം വിജയകരമായി സ്കൈ ഡൈവിംഗ് നടത്തിയിരുന്നു. എന്നാൽ അതിലും വലിയൊരു വെല്ലുവിളിയാണ് ഇത്തവണ ഓസ്ട്രേലിയയിൽ വെച്ച് അദ്ദേഹം ഏറ്റെടുത്തത്. 18,000 അടി ഉയരത്തിൽ നിന്ന് ചാടുന്നതിന് തൊട്ടുമുമ്പ് പേരക്കുട്ടി “പേടിയുണ്ടോ” എന്ന് ചോദിച്ചപ്പോൾ, “ആർക്കാണ് പേടി? എനിക്കോ?” എന്ന് അങ്ങേയറ്റം ആത്മവിശ്വാസത്തോടെയാണ് അദ്ദേഹം മറുപടി നൽകിയത്.
സ്കൈ ഡൈവിംഗിനിടെ ആകാശത്ത് വച്ച് “ജയ് ഹിന്ദ്, ജയ് ഭാരത്, ജയ് ഹരിയാന” എന്ന് അദ്ദേഹം ഉറക്കെ വിളിച്ചുപറയുന്നത് വീഡിയോയിൽ കേൾക്കാം. ‘ദാദാ ജി സ്കൈഡൈവിംഗ്’ എന്ന പേരിൽ പങ്കുവെച്ച ഈ ദൃശ്യങ്ങൾ നിമിഷനേരം കൊണ്ടാണ് സോഷ്യൽ മീഡിയയിൽ വൈറലായത്. മുത്തശ്ശന്റെ ഈ അപാരമായ ധൈര്യത്തെ പ്രശംസിച്ച് നിരവധി പേരാണ് രംഗത്തെത്തിയത്. പല യുവാക്കളെക്കാളും ആത്മവിശ്വാസം മുത്തശ്ശനുണ്ടെന്നും, അദ്ദേഹത്തിന്റെ ഊർജ്ജസ്വലത മാതൃകയാണെന്നുമാണ് വീഡിയോക്ക് താഴെ വന്നിരിക്കുന്ന കമന്റുകൾ.
