റിപ്പോർട്ട്: അൻവർ ഷരിഫ്
മലപ്പുറം: വീട്ടിലെ ടെറസിൽ നിന്നും മാങ്ങ പറിക്കുന്നതിനിടെ അബദ്ധത്തിൽ ഗേറ്റിലേക്ക് വീണ് കഴുത്തിൽ കമ്പി തുളച്ചുകയറി ചികിത്സയിലായിരുന്ന വിദ്യാർത്ഥി മരണപ്പെട്ടു (Muhammed Masin Death). മലപ്പുറം കൊണ്ടോട്ടി പുളിക്കൽ സിയാംകണ്ടം പാലശ്ശേരി പറമ്പ് വീട്ടിൽ മുഹമ്മദ് സഹീറിന്റെ മകൻ മുഹമ്മദ് മാസിൻ (16) ആണ് മരണപ്പെട്ടത്. പുളിക്കൽ എ.എം.എം.എച്ച്.എസ് സ്കൂളിലെ പത്താം ക്ലാസ് വിദ്യാർത്ഥിയായിരുന്നു മാസിൻ.
2026 മേയ് 31-നായിരുന്നു നാടിനെ നടുക്കിയ അപകടം നടന്നത്. സ്വന്തം വീടിന്റെ ടെറസിൽ കയറി തോട്ടി ഉപയോഗിച്ച് മാങ്ങ പറിക്കുന്നതിനിടെ കാൽതെറ്റി താഴെയുള്ള ഗേറ്റിലേക്ക് വീഴുകയായിരുന്നു. വീഴ്ചയിൽ ഗേറ്റിന്റെ കമ്പി മാസിന്റെ കഴുത്തിലൂടെ തുളച്ചുകയറി. അപകടം നടന്ന ഉടൻ തന്നെ വീട്ടുകാർ ഗേറ്റിന്റെ ഒരു ഭാഗം മുറിച്ചെടുത്ത് കുട്ടിയെ കോഴിക്കോട് മെഡിക്കൽ കോളേജ് കാഷ്വാലിറ്റിയിൽ എത്തിക്കുകയായിരുന്നു.
അതീവ ഗുരുതരാവസ്ഥയിലായിരുന്ന കുട്ടിയെ ശസ്ത്രക്രിയയ്ക്ക് വിധേയമാക്കുന്നതിന് മുന്നോടിയായി വെള്ളിമാടുകുന്ന് അഗ്നിരക്ഷാ സേനാംഗങ്ങൾ എത്തി ഗ്രൈൻഡർ ഉപയോഗിച്ച് കമ്പിയുടെ ഭൂരിഭാഗം ഭാഗങ്ങളും മുറിച്ചു മാറ്റിയിരുന്നു. തുടർന്ന് അടിയന്തര ശസ്ത്രക്രിയയ്ക്ക് വിധേയനാക്കിയെങ്കിലും, ഗുരുതരമായ പരിക്കേറ്റ മാസിൻ ഇന്ന് ചികിത്സയിലിരിക്കെ മരണത്തിന് കീഴടങ്ങുകയായിരുന്നു.
Summary: 16-year-old Muhammed Masin, a 10th-grade student from Pulikkal, Malappuram, has passed away while undergoing treatment at the Medical College Hospital. The tragic accident occurred on May 31, 2026, when he slipped and fell onto the gate while attempting to pick mangoes from his rooftop using a pole. The gate’s metal rod pierced his neck during the fall.
