മുംബൈ: ഐപിഎല്ലിൽ ബാറ്റിംഗ് ഇതിഹാസം എം.എസ്. ധോണിയുടെ ഒന്നര പതിറ്റാണ്ട് പഴക്കമുള്ള റെക്കോർഡ് തിരുത്തി കൊൽക്കത്ത നൈറ്റ് റൈഡേഴ്സിന്റെ ഫിനിഷർ റിങ്കു സിംഗ്. ലക്നൗവിനെതിരെ ആറാം നമ്പറിൽ ഇറങ്ങി 51 പന്തിൽ പുറത്താകാതെ 83 റൺസ് അടിച്ചുകൂട്ടിയതോടെയാണ് റിങ്കു ചരിത്രപുസ്തകത്തിൽ ഇടംപിടിച്ചത്. 7 ഫോറുകളും 5 സിക്സറുകളും അടങ്ങുന്നതായിരുന്നു റിങ്കുവിന്റെ ഇന്നിംഗ്സ്.(Rinku Singh Scripts History, Breaks MS Dhoni’s 15-Year-Old IPL Record)
ഐപിഎല്ലിൽ ആറാം നമ്പറിലോ അതിനു താഴെയോ ബാറ്റിംഗിന് ഇറങ്ങി ഒരു താരം നേടുന്ന ഏറ്റവും ഉയർന്ന സ്കോർ എന്ന റെക്കോർഡാണ് റിങ്കു സ്വന്തമാക്കിയത്. 2011-ൽ റോയൽ ചലഞ്ചേഴ്സ് ബംഗളൂരുവിനെതിരെ ധോണി നേടിയ പുറത്താകാതെയുള്ള 70 റൺസ് (40 പന്തിൽ) എന്ന റെക്കോർഡാണ് ഇതോടെ പഴങ്കഥയായത്. സുനിൽ നരൈനുമായി (62 റൺസ്) ചേർന്ന് നടത്തിയ തകർപ്പൻ കൂട്ടുകെട്ടിലൂടെ കെകെആർ സ്കോർ 150 കടത്താനും റിങ്കുവിനായി.
മറുഭാഗത്ത്, ചെന്നൈ ആരാധകർക്ക് നിരാശ നൽകുന്ന വാർത്തയാണ് പരിശീലകൻ സ്റ്റീഫൻ ഫ്ലെമിംഗ് പങ്കുവെച്ചത്. പരിക്കിനെത്തുടർന്ന് ഈ സീസണിലെ ആദ്യ എട്ട് മത്സരങ്ങളും ധോണിക്ക് നഷ്ടമായിരുന്നു. പരിശീലനത്തിനിടെ വീണ്ടും പേശീവലിവ് അനുഭവപ്പെട്ടതാണ് തിരിച്ചടിയായത്. മുംബൈ ഇന്ത്യൻസിനെതിരായ അടുത്ത പോരാട്ടത്തിന് മുൻപ് അഞ്ച് ദിവസത്തെ ഇടവേള സിഎസ്കെയ്ക്കുണ്ട്.
