ചൈന: മാരകരോഗം ബാധിച്ച ഒമ്പത് വയസ്സുകാരനായ കൊച്ചുമകന്റെ ചികിത്സാ ചിലവുകൾ കണ്ടെത്തുന്നതിനായി 75-കാരനായ മുത്തച്ഛൻ ബ്യൂട്ടി ഇൻഫ്ലുവൻസറായി മാറിയ വാർത്ത സോഷ്യൽ മീഡിയയിൽ വലിയ ചർച്ചയാകുന്നു ( Grandfather Beauty Influencer China). ചൈനയിലെ ജിയാങ്സു പ്രവിശ്യയിൽ നിന്നുള്ള ഷു യുൻചാങ് എന്ന വയോധികനാണ് തന്റെ കൊച്ചുമകൻ കാവോ ജിങ്യാന്റെ ചികിത്സയ്ക്കായി വ്യത്യസ്തമായ ഈ മാർഗ്ഗം തിരഞ്ഞെടുത്തത്.
ഒമ്പത് വർഷങ്ങൾക്ക് മുമ്പ് വെറും ആറ് മാസം പ്രായമുള്ളപ്പോഴാണ് ജിങ്യാന് നട്ടെല്ലിനെ ബാധിക്കുന്ന അപൂർവ്വ ജനിതക രോഗമായ ‘സ്പൈനൽ മസ്കുലർ അട്രോഫി’ (SMA) ടൈപ്പ് 1 സ്ഥിരീകരിച്ചത്. 18 മാസത്തിൽ കൂടുതൽ കുട്ടി ജീവിക്കില്ലെന്ന് ഡോക്ടർമാർ വിധിയെഴുതിയതോടെ ജിങ്യാന്റെ അമ്മ തകർന്നുപോയി. ഒരേയൊരു മകൾക്ക് അങ്ങനെയൊരു അവസ്ഥ വന്നാൽ കുടുംബം തകരുമെന്ന് തിരിച്ചറിഞ്ഞ മുത്തച്ഛൻ, കൊച്ചുമകന്റെ സംരക്ഷണം പൂർണ്ണമായി ഏറ്റെടുക്കുകയായിരുന്നു.
കുട്ടിയെ പരിചരിക്കുന്നതിനായി അദ്ദേഹം ആശുപത്രിയിൽ പോയി മസാജ് ചികിത്സാ രീതികൾ പഠിച്ചെടുത്തു. പ്രതിവർഷം 1.4 ദശലക്ഷം യുവാൻ (ഏകദേശം 2 കോടി രൂപ) വേണ്ടിയിരുന്ന ചികിത്സയ്ക്കായി വീട് വിൽക്കുകയും ബന്ധുക്കളിൽ നിന്ന് പണം കടം വാങ്ങുകയും ചെയ്തു. പ്രായമായ ഒരാളെ ജോലിക്ക് വെക്കാൻ ആരും തയ്യാറാകാത്തതിനാലാണ് മകൾ ഉപയോഗിച്ചിരുന്ന സൗന്ദര്യവർദ്ധക ഉൽപ്പന്നങ്ങൾ ഉപയോഗിച്ച് അദ്ദേഹം ലൈവ് സ്ട്രീമിംഗ് തുടങ്ങുന്നത്. സ്വന്തം മുഖത്ത് മേക്കപ്പിടുന്ന അദ്ദേഹത്തിന്റെ വീഡിയോകൾ വലിയ ഹിറ്റായി മാറി.
2021-ൽ ചൈനീസ് സർക്കാർ ഈ മരുന്നുകളെ മെഡിക്കൽ ഇൻഷുറൻസിൽ ഉൾപ്പെടുത്തിയതോടെ ചിലവ് വലിയ തോതിൽ കുറഞ്ഞു. ഇപ്പോൾ ഒമ്പത് വയസ്സുകാരനായ ജിങ്യാന് ഭേദപ്പെട്ട ദിവസങ്ങളിൽ സ്കൂളിൽ പോകാനും കുട്ടികൾക്കൊപ്പം കളിക്കാനും കഴിയുന്നുണ്ട്. ഭാവിയിൽ സർവ്വകലാശാലയിൽ പഠിക്കണമെന്ന കൊച്ചുമകന്റെ വലിയ ആഗ്രഹം നിറവേറ്റാൻ താൻ കൂടെയുണ്ടാകുമെന്ന് ഷു യുൻചാങ് ഉറപ്പുനൽകുന്നു. കഠിനമായ സാഹചര്യങ്ങളിലും കുടുംബബന്ധങ്ങളുടെ കരുത്തുകൊണ്ട് പോരാടുന്ന ഈ വയോധികന്റെ കഥ ലോകമെമ്പാടുമുള്ള ആളുകളുടെ കണ്ണുനനയിക്കുകയാണ്.
Summary: In a heartwarming story of resilience and love, a 75-year-old grandfather in China, Zhu Yunchang, became a beauty influencer to fund the expensive medical treatment of his grandson, Cao Jingyan. The nine-year-old was diagnosed with Spinal Muscular Atrophy (SMA) as an infant, and the family faced immense financial strain to keep him alive. After learning massage therapy to ease the boy’s condition, the grandfather took to live-streaming makeup demonstrations to raise funds after finding limited work opportunities.
