തൃശൂർ: വെള്ളാങ്ങല്ലൂരിൽ വിപണിയിൽ വിൽപനയ്ക്കെത്തിയ സോഡാ കുപ്പിക്കുള്ളിൽ ചത്ത പാമ്പിനെ കണ്ടെത്തി (Snake in Soda Bottle). വെള്ളാങ്ങല്ലൂർ സ്വദേശിയുടെ കടയിൽ നിന്ന് വാങ്ങിയ ജീരക സോഡയിലാണ് പാമ്പിനെ കണ്ടത്. സോളാർ പാനൽ നിർമ്മാണ ജോലിയിൽ ഏർപ്പെട്ടിരുന്ന തൊഴിലാളികളാണ് കുപ്പിയിൽ പാമ്പിനെ കണ്ടത്.
ജോലിക്കിടെ കുടിക്കാനായി വാങ്ങിയ സോഡാ കുപ്പി തുറന്ന ഉടൻ തന്നെ ഉള്ളിൽ എന്തോ കിടക്കുന്നത് തൊഴിലാളികളുടെ ശ്രദ്ധയിൽപ്പെടുകയായിരുന്നു. വിശദമായി പരിശോധിച്ചപ്പോഴാണ് പാമ്പിന്റെ കുഞ്ഞാണെന്ന് വ്യക്തമായത്. ഭാഗ്യവശാൽ സോഡ കുടിക്കുന്നതിന് മുൻപ് തന്നെ പാമ്പിനെ കണ്ടതിനാൽ വലിയ അപകടം ഒഴിവായി.
സംഭവം ശ്രദ്ധയിൽപ്പെട്ടയുടൻ തൊഴിലാളികൾ വിവരം ആരോഗ്യവകുപ്പ് അധികൃതരെ അറിയിച്ചു. ഉദ്യോഗസ്ഥർ സ്ഥലത്തെത്തി പരിശോധന നടത്തുകയും സോഡാ കുപ്പി കസ്റ്റഡിയിലെടുക്കുകയും ചെയ്തു. തുടർന്ന് നടത്തിയ അന്വേഷണത്തിൽ സോഡ നിർമ്മിച്ച യൂണിറ്റിൽ ഗുരുതരമായ വീഴ്ചകൾ കണ്ടെത്തിയതിനെത്തുടർന്ന് നിർമ്മാണ യൂണിറ്റ് ആരോഗ്യവകുപ്പ് അധികൃതർ താൽക്കാലികമായി അടപ്പിച്ചു. ഭക്ഷണസാധനങ്ങളുടെ നിർമ്മാണത്തിലും വിതരണത്തിലും പുലർത്തേണ്ട ശുചിത്വ മാനദണ്ഡങ്ങൾ ലംഘിച്ചതിനാണ് നടപടി.
Story Summary: A dead snake was found inside a bottle of cumin soda at Vellangallur, Thrissur. Solar panel workers who bought the soda noticed the snake immediately after opening the bottle. Following the incident, health department officials inspected the manufacturing unit and ordered its immediate closure due to safety and hygiene violations.
