തെഹ്റാൻ: ഇറാനിയൻ തുറമുഖങ്ങൾ ലക്ഷ്യമിട്ടുള്ള അമേരിക്കൻ ഉപരോധങ്ങൾക്കെതിരെ ശക്തമായ താക്കീതുമായി ഇറാൻ സായുധ സേന (Iran vs US Sanctions). പ്രകോപനം തുടരുകയാണെങ്കിൽ അമേരിക്ക കടുത്ത പ്രത്യാഘാതങ്ങൾ അനുഭവിക്കേണ്ടി വരുമെന്ന് ഇറാൻ സൈന്യത്തിന്റെ ഹസ്രത്ത് ഖതം അൽ അൻബിയ സെൻട്രൽ ഹെഡ്ക്വാർട്ടേഴ്സ് പുറത്തിറക്കിയ പ്രസ്താവനയിൽ വ്യക്തമാക്കി.മുൻപത്തേക്കാൾ വലിയ പ്രഹരശേഷിയോടെയും തയ്യാറെടുപ്പോടെയും സൈന്യം സജ്ജമാണെന്ന് പ്രസ്താവനയിൽ പറയുന്നു. ദേശീയ താൽപ്പര്യങ്ങൾ സംരക്ഷിക്കാൻ ഏതറ്റം വരെയും പോകാൻ മടിക്കില്ലെന്നാണ് ഇറാന്റെ നിലപാട്.
തന്ത്രപ്രധാനമായ ഹോർമുസ് കടലിടുക്കിൽ (Strait of Hormuz) ഇറാൻ പൂർണ്ണ നിയന്ത്രണം നിലനിർത്തും. ശത്രുക്കളുടെ ഓരോ നീക്കവും സൂക്ഷ്മമായി നിരീക്ഷിക്കുകയാണെന്നും സൈന്യം വ്യക്തമാക്കി.ശത്രുക്കളുടെ ഭാഗത്തുനിന്ന് എന്തെങ്കിലും നീക്കമുണ്ടായാൽ അത് ഭീകരമായ നാശനഷ്ടങ്ങൾക്കിടയാക്കുമെന്ന് തസ്നിം വാർത്താ ഏജൻസി റിപ്പോർട്ട് ചെയ്തു.
അതിനിടെ, രാജ്യത്തെ രൂക്ഷമായ ഊർജ്ജ പ്രതിസന്ധി മറികടക്കാൻ വൈദ്യുതി ഉപഭോഗം കുറയ്ക്കണമെന്ന് ഇറാൻ പ്രസിഡന്റ് മസൂദ് പെസഷ്കിയാൻ ജനങ്ങളോട് അഭ്യർത്ഥിച്ചു. ശത്രുക്കൾ രാജ്യത്തിന്റെ അടിസ്ഥാന സൗകര്യങ്ങളെ സൈബർ ആക്രമണങ്ങളിലൂടെയും ഉപരോധങ്ങളിലൂടെയും തകർക്കാൻ ശ്രമിക്കുകയാണെന്നും ജനങ്ങൾക്കിടയിൽ അതൃപ്തി പടർത്താനാണ് അവർ ലക്ഷ്യമിടുന്നതെന്നും അദ്ദേഹം മുന്നറിയിപ്പ് നൽകി.
ഇറാൻ വിദേശകാര്യ മന്ത്രി അബ്ബാസ് അറാഗ്ചിയുടെ നേതൃത്വത്തിലുള്ള സംഘം പാകിസ്താൻ അധികൃതരുമായി ചർച്ച നടത്തി. മേഖലയിലെ സമാധാനത്തിനായുള്ള വെടിനിർത്തൽ നിർദ്ദേശം പാകിസ്താനെ അറിയിച്ചിട്ടുണ്ട്. എന്നാൽ ഇസ്ലാമാബാദിൽ എത്തുന്ന യുഎസ് പ്രതിനിധി സംഘവുമായി നേരിട്ട് ചർച്ചയ്ക്കില്ലെന്ന കർശന നിലപാടിലാണ് ഇറാൻ ഇപ്പോഴും.
Story Summary: The Iranian military has warned the U.S. of a severe response if sanctions on Iranian ports continue. Asserting full control over the Strait of Hormuz, Iran stated its readiness to defend national interests. Meanwhile, President Masoud Pezeshkian urged citizens to cut electricity usage amid an energy crisis worsened by sanctions and cyberattacks. On the diplomatic front, Iran proposed a ceasefire plan to Pakistan but refused direct talks with U.S. representatives in Islamabad.
