ന്യൂഡൽഹി: ആം ആദ്മി പാർട്ടിയിൽ (എഎപി) ഉണ്ടായ അപ്രതീക്ഷിത പിളർപ്പിന്റെ ഞെട്ടിപ്പിക്കുന്ന വിവരങ്ങൾ പുറത്ത്. രാഘവ് ഛദ്ദയുടെ നേതൃത്വത്തിൽ ഏഴ് രാജ്യസഭാ എംപിമാർ ബിജെപിയിൽ ചേരുന്നതിന് തൊട്ടുമുമ്പ്, അനുനയ ചർച്ചകൾക്കായി അരവിന്ദ് കെജ്രിവാൾ ഇവരെ തന്റെ വീട്ടിലേക്ക് ക്ഷണിച്ചിരുന്നെങ്കിലും എംപിമാർ ആ ചർച്ചയ്ക്ക് കാത്തുനിൽക്കാതെ രാജി പ്രഖ്യാപിക്കുകയായിരുന്നു (AAP Rajya Sabha MPs Merge With BJP). വെള്ളിയാഴ്ച വൈകുന്നേരം കെജ്രിവാളിന്റെ വസതിയിൽ യോഗം നിശ്ചയിച്ചിരുന്നെങ്കിലും അതിന് മുമ്പ് തന്നെ ബിജെപി ആസ്ഥാനത്തെത്തി നേതാക്കൾ അംഗത്വം സ്വീകരിച്ചു.
പാർട്ടിയിൽ അതൃപ്തിയുള്ളവർക്ക് അടുത്ത തവണ വീണ്ടും മത്സരിക്കാൻ സീറ്റ് നൽകാമെന്നും ഇപ്പോൾ രാജിവെച്ച് ഒഴിയണമെന്നും കെജ്രിവാൾ വാഗ്ദാനം ചെയ്തിരുന്നതായി റിപ്പോർട്ടുകൾ സൂചിപ്പിക്കുന്നു. എന്നാൽ എംപിമാർ വ്യാഴാഴ്ച രാവിലെ തന്നെ പാർട്ടി വിടാൻ ഏകകണ്ഠമായി തീരുമാനമെടുത്തിരുന്നു. രാജ്യസഭയിലെ എഎപി ഡെപ്യൂട്ടി ലീഡർ സ്ഥാനത്തുനിന്ന് രാഘവ് ഛദ്ദയെ മാറ്റി അശോക് മിത്തലിനെ നിയമിച്ചതാണ് പിളർപ്പിന് വേഗത കൂട്ടിയത്. എന്നാൽ പുതിയ പദവി ലഭിച്ച മിത്തലും ഛദ്ദയ്ക്കൊപ്പം ബിജെപിയിലേക്ക് നീങ്ങിയത് എഎപി നേതൃത്വത്തെ അമ്പരപ്പിച്ചു.
ആകെ 10 എംപിമാരുള്ള എഎപിയിൽ 7 പേർ (മൂന്നിൽ രണ്ട് ഭാഗം) ഒരുമിച്ച് മാറിയതിനാൽ അയോഗ്യതാ ഭീഷണി ഒഴിവാക്കി ബിജെപിയിൽ ലയിക്കാൻ സാധിക്കുമെന്ന് രാഘവ് ഛദ്ദ അവകാശപ്പെട്ടു. ഇതുസംബന്ധിച്ച രേഖകൾ രാജ്യസഭാ ചെയർമാന് കൈമാറി. രാഘവ് ഛദ്ദ, സ്വാതി മലിവാൾ, ഹർഭജൻ സിംഗ്, സന്ദീപ് പഥക്, അശോക് മിത്തൽ, വിക്രം സാഹ്നി, രജീന്ദർ ഗുപ്ത എന്നിവരാണ് എഎപി വിട്ടത്. 15 വർഷം നൽകിയ പാർട്ടി ഇപ്പോൾ മൂല്യങ്ങളിൽ നിന്ന് വ്യതിചലിച്ചെന്ന് ഛദ്ദ ആരോപിക്കുമ്പോൾ, ബിജെപി ‘ഓപ്പറേഷൻ താമര’യിലൂടെ എംപിമാരെ വിലയ്ക്കെടുത്തതാണെന്ന് എഎപി നേതൃത്വം കുറ്റപ്പെടുത്തി.
അഴിമതി വിരുദ്ധ പോരാട്ടത്തിലൂടെ വളർന്നുവന്ന എഎപി അതിന്റെ 14-ാം വർഷത്തിൽ നേരിടുന്ന ഏറ്റവും വലിയ പ്രതിസന്ധിയാണിത്. പഞ്ചാബിലെ സർക്കാരിന്റെ പ്രവർത്തനങ്ങളെ അട്ടിമറിക്കാനുള്ള ബിജെപി ഗൂഢാലോചനയാണിതെന്ന് എഎപി ആരോപിക്കുന്നു.
Summary: Details have emerged showing that AAP chief Arvind Kejriwal’s last-minute attempt to pacify dissenting MPs failed, as seven Rajya Sabha members, led by Raghav Chadha, quit before a scheduled meeting on Friday. Kejriwal had reportedly offered future election tickets to pacify them, but the group had already finalized their move to the BJP. Chadha argued that the exit of 7 out of 10 MPs constitutes a legal merger, shielding them from disqualification. AAP has accused the BJP of executing “Operation Lotus” to destabilize the party.
