കണ്ണൂർ: നിയമസഭാ തിരഞ്ഞെടുപ്പ് ഫലപ്രഖ്യാപനത്തിന് മുന്നോടിയായി പോലീസ് നടത്തുന്ന പരിശോധനയിൽ പാനൂരിൽ നിന്ന് വീണ്ടും ബോംബുകൾ കണ്ടെടുത്തു (Panur Bomb Hunt). പാനൂർ മേലെ പൂക്കോം ചിത്രവയലിൽ നിന്നാണ് രണ്ട് സ്റ്റീൽ ബോംബുകളും ഒരു നാടൻ ബോംബും പോലീസ് കണ്ടെത്തിയത്.
രഹസ്യവിവരത്തെ തുടർന്ന് നടത്തിയ പരിശോധനയിലാണ് വിജനമായ സ്ഥലത്ത് നിന്ന് ബോംബുകൾ കണ്ടെടുത്തത്. കണ്ടെടുത്ത സ്റ്റീൽ ബോംബുകൾക്ക് പഴക്കമുണ്ടെങ്കിലും നാടൻ ബോംബ് നിർമ്മിച്ചിട്ട് അധിക ദിവസമായിട്ടില്ലെന്ന് പോലീസ് പറഞ്ഞു. എസിപി ഉൾപ്പെടെയുള്ള മുതിർന്ന പോലീസ് ഉദ്യോഗസ്ഥർ സംഭവസ്ഥലത്തെത്തി സ്ഥിതിഗതികൾ വിലയിരുത്തി. ബോംബ് സ്ക്വാഡ് എത്തി ഇവ ഉടൻ നിർവീര്യമാക്കും.
കഴിഞ്ഞ ദിവസം വടകര ചാനിയം കടവിന് സമീപത്തുനിന്നും സമാന രീതിയിൽ സ്റ്റീൽ ബോംബുകൾ കണ്ടെത്തിയിരുന്നു. തിരഞ്ഞെടുപ്പിന് ശേഷമുള്ള സംഘർഷ സാധ്യതകൾ ഒഴിവാക്കുന്നതിന്റെ ഭാഗമായി കണ്ണൂർ, വടകര മേഖലകളിൽ പോലീസ് കർശന പരിശോധനയാണ് നടത്തിവരുന്നത്. പാനൂർ മേഖലയിൽ വീണ്ടും ബോംബുകൾ കണ്ടെത്തുന്നത് ജനങ്ങൾക്കിടയിൽ ആശങ്കയുണ്ടാക്കിയിട്ടുണ്ട്. സംഭവത്തിൽ പോലീസ് അന്വേഷണം ഊർജ്ജിതമാക്കി.
Story Summary: Police recovered two steel bombs and one country-made bomb from Chithravayal in Panur, Kannur, during a search ahead of the election results. While the steel bombs appeared old, the country-made bomb was recently manufactured. This follows a similar recovery in Vadakara recently.
