Follow on Google News
ശ്രീനഗർ: 2025 നവംബർ 10-ന് ഡൽഹി ചെങ്കോട്ടയ്ക്ക് സമീപം നടന്ന ചാവേർ സ്ഫോടനവുമായി ബന്ധപ്പെട്ട് ‘ഡോക്ടേഴ്സ് ഭീകര മൊഡ്യൂളി’നെതിരെ ജമ്മു കശ്മീർ എൻ ഐ എ കുറ്റപത്രം സമർപ്പിച്ചു. വ്യാഴാഴ്ച ശ്രീനഗറിലെ കോടതിയിലാണ് 10 പേർക്കെതിരെയുള്ള കുറ്റപത്രം സമർപ്പിച്ചത്.(Red Fort blast, Chargesheet filed against ‘Doctors’ terror module’)
ചെങ്കോട്ടയ്ക്ക് സമീപം സ്ഫോടനം നടത്തിയ കാർ ഓടിച്ചിരുന്ന ഡോക്ടർ ഉമർ ഉൻ നബിയാണ് മൊഡ്യൂളിന്റെ പ്രധാനിയെന്ന് കുറ്റപത്രത്തിൽ പറയുന്നു. കഴിഞ്ഞ നവംബറിലുണ്ടായ ഈ സ്ഫോടനത്തിൽ 15 പേർ കൊല്ലപ്പെട്ടിരുന്നു. ഉമർ ഉൻ നബിയും സ്ഫോടനത്തിൽ കൊല്ലപ്പെട്ടിരുന്നു. ശ്രീനഗറിലെ നൗഗാം പോലീസ് സ്റ്റേഷനിൽ രജിസ്റ്റർ ചെയ്ത എഫ്ഐആറിന്റെ അടിസ്ഥാനത്തിലാണ് അന്വേഷണം നടന്നത്.
ലോകമെമ്പാടുമുള്ള ഭീകരാക്രമണങ്ങളിൽ ഉപയോഗിക്കുന്ന അതീവ പ്രഹരശേഷിയുള്ള ‘ട്രയാസെറ്റോൺ ട്രൈപെറോക്സൈഡ്’ ആണ് ഇവർ സ്ഫോടനത്തിനായി തിരഞ്ഞെടുത്തത്. ഇതിനാവശ്യമായ അസംസ്കൃത വസ്തുക്കൾ ശേഖരിക്കാനുള്ള എളുപ്പമാണ് ഇവരെ ഇതിലേക്ക് നയിച്ചത്. നിരോധിത ഭീകരസംഘടനയായ ‘അൻസാർ ഗസ്വത്തുൽ ഹിന്ദ്’ പുനരുജ്ജീവിപ്പിക്കാനായിരുന്നു ഈ രഹസ്യ മൊഡ്യൂളിന്റെ ശ്രമം. സുരക്ഷാ ഏജൻസികളെ തെറ്റിദ്ധരിപ്പിക്കാൻ ‘ജെയ്ഷെ മുഹമ്മദ്’ എന്ന പേരിൽ ഇവർ പോസ്റ്ററുകൾ പ്രചരിപ്പിച്ചിരുന്നു. എന്നാൽ യഥാർത്ഥത്തിൽ AGuH-ന് വേണ്ടിയാണ് ഇവർ പ്രവർത്തിച്ചിരുന്നത്.
ഉന്നത വിദ്യാഭ്യാസമുള്ളവരും മെഡിക്കൽ പ്രൊഫഷണലുകളുമാണ് ഈ സംഘത്തിൽ ഉണ്ടായിരുന്നതെന്ന് എസ്ഐഎ വ്യക്തമാക്കി. കുറ്റപത്രത്തിൽ ഉൾപ്പെട്ട ഡോക്ടർമാർ മുസമ്മിൽ ഷക്കീൽ ഗാനായ് (പുൽവാമ), അദീൽ അഹമ്മദ് റാഥർ (കുൽഗാം), ഷഹീൻ സയീദ് (ലഖ്നൗ), ഉമർ ഉൻ നബി (പ്രധാന പ്രതി – ചെങ്കോട്ട ആക്രമണത്തിൽ കൊല്ലപ്പെട്ടു) എന്നിവരാണ്. ഇവരെ കൂടാതെ നൗഗാം സ്വദേശികളായ ആരിഫ് നിസാർ ദാർ, യാസിർ ഉൾ അഷ്റഫ് ഭട്ട്, മഖ്സൂദ് അഹമ്മദ് ദാർ എന്നിവരും ഷോപ്പിയാനിൽ നിന്നുള്ള മതപ്രഭാഷകൻ ഇർഫാൻ അഹമ്മദ് വാഗെ, സമീർ അഹമ്മദ് അഹംഗർ (ഗന്ദർബാൽ), തുഫൈൽ അഹമ്മദ് ഭട്ട് (ശ്രീനഗർ) എന്നിവരും കുറ്റപത്രത്തിലുണ്ട്.
ഡിജിറ്റൽ ഫോറൻസിക് പരിശോധനകൾ, ശാസ്ത്രീയ വിശകലനങ്ങൾ, സാക്ഷിമൊഴികൾ എന്നിവയുൾപ്പെടെ അനിഷേധ്യമായ തെളിവുകൾ തങ്ങളുടെ പക്കലുണ്ടെന്ന് എസ്ഐഎ അറിയിച്ചു. വീടുകൾക്കുള്ളിൽ വെച്ച് സ്ഫോടകവസ്തുക്കൾ നിർമ്മിക്കാനുള്ള പരീക്ഷണങ്ങൾ ഇവർ നടത്തിയിരുന്നതായും ഏജൻസി കണ്ടെത്തിയിട്ടുണ്ട്. രാജ്യത്തിന്റെ പരമാധികാരത്തെയും അഖണ്ഡതയെയും വെല്ലുവിളിക്കാനാണ് ഈ സംഘം ലക്ഷ്യമിട്ടിരുന്നതെന്നും കുറ്റപത്രം വ്യക്തമാക്കുന്നു.
