ഹൈദരാബാദ്: അസം മുഖ്യമന്ത്രി ഹിമന്ത ബിശ്വ ശർമയുടെ ഭാര്യ റിനികി ഭൂയാൻ ശർമയ്ക്കെതിരെ നടത്തിയ പാസ്പോർട്ട് പരാമർശത്തിൽ നിയമക്കുരുക്ക് മുറുകിയതോടെ കോൺഗ്രസ് നേതാവ് പവൻ ഖേര തെലങ്കാന ഹൈക്കോടതിയെ സമീപിച്ചു (Pawan Khera Anticipatory Bail). അസം പൊലീസ് കേസെടുത്തതിന് പിന്നാലെ അറസ്റ്റ് ഒഴിവാക്കാൻ ട്രാൻസിറ്റ് മുൻകൂർ ജാമ്യം അനുവദിക്കണമെന്നാണ് ഖേരയുടെ ആവശ്യം. അസമിലെ പ്രാദേശിക കോടതിയെ സമീപിക്കുന്നത് വരെ സംരക്ഷണം നൽകണമെന്ന ഹർജി വ്യാഴാഴ്ച വാദം കേൾക്കുന്നതിനായി കോടതി ലിസ്റ്റ് ചെയ്തു.
ഹിമന്ത ബിശ്വ ശർമയുടെ ഭാര്യ റിനികി ഭൂയാൻ ശർമയ്ക്ക് രണ്ട് മുസ്ലീം രാജ്യങ്ങളുടേത് ഉൾപ്പെടെ മൂന്ന് പാസ്പോർട്ടുകൾ ഉണ്ടെന്നായിരുന്നു പവൻ ഖേരയുടെ വിവാദ ആരോപണം. എന്നാൽ ഇത് പച്ചക്കള്ളമാണെന്നും വ്യാജരേഖകൾ ചമച്ചാണ് കോൺഗ്രസ് ആരോപണം ഉന്നയിക്കുന്നതെന്നും അസം മുഖ്യമന്ത്രി തിരിച്ചടിച്ചു. പാക്കിസ്ഥാനിലെ സോഷ്യൽ മീഡിയ ഗ്രൂപ്പുകൾ പ്രചരിപ്പിക്കുന്ന വ്യാജ രേഖകളാണ് ഖേര ആയുധമാക്കുന്നതെന്നും അദ്ദേഹം വ്യക്തമാക്കി.
അസം തിരഞ്ഞെടുപ്പിൽ പാക്കിസ്ഥാന്റെ ഇടപെടൽ ഉണ്ടെന്നതിന്റെ തെളിവാണ് ഖേര പുറത്തുവിട്ട രേഖകളെന്ന് ബിജെപി ആരോപിച്ചു. റിനികി ഭൂയാൻ ശർമ നൽകിയ പരാതിയുടെ അടിസ്ഥാനത്തിൽ വ്യാജരേഖ ചമയ്ക്കൽ ഉൾപ്പെടെയുള്ള ഗുരുതര വകുപ്പുകൾ പ്രകാരമാണ് അസം പൊലീസ് ഖേരയ്ക്കെതിരെ കേസെടുത്തിരിക്കുന്നത്. നിലവിൽ ഹൈദരാബാദിലുള്ള ഖേരയെ അറസ്റ്റ് ചെയ്യാൻ അസം പൊലീസ് നീക്കം നടത്തുന്നതിനിടെയാണ് അദ്ദേഹം കോടതിയെ അഭയം പ്രാപിച്ചത്.
Summary: Congress leader Pawan Khera has approached the Telangana High Court seeking transit anticipatory bail after the Assam Police registered a case against him for remarks involving Rinki Bhuyan Sarma, wife of Assam CM Himanta Biswa Sarma. Khera had alleged that she holds three passports, including those of two Muslim nations. Dismissing the claims as fabricated, the CM stated that Khera was using documents sourced from Pakistani social media groups. Following a complaint by Rinki Bhuyan, a case was filed for forgery and other charges, prompting Khera to seek legal protection from arrest.
