ബംഗളൂരു: ബംഗളൂരുവിലെ ബയ്യപ്പനഹള്ളി പോലീസ് സ്റ്റേഷൻ പരിധിയിലുള്ള ഡിആർഡിഒ ലാബായ ഗ്യാസ് ടർബൈൻ റിസർച്ച് എസ്റ്റാബ്ലിഷ്മെന്റിന് നേരെ ബോംബ് ഭീഷണി. സ്ഥാപനത്തിന്റെ ഔദ്യോഗിക ഐഡിയിലേക്ക് തിങ്കളാഴ്ചയാണ് ഭീഷണി സന്ദേശങ്ങൾ എത്തിയത്. ഇതോടൊപ്പം പ്രമുഖ രാഷ്ട്രീയ നേതാവിൻ്റെ ചെറുമകനെ തട്ടിക്കൊണ്ടുപോകുമെന്ന മുന്നറിയിപ്പും ഇമെയിലിലുണ്ട്.(Bomb threat to DRDO lab in Bengaluru, Email says political leader’s grandson will be kidnapped)
തമിഴ് ഭാഷയിൽ അയച്ചിട്ടുള്ള ഇമെയിലിൽ, ലാബ് പരിസരത്ത് ഐഇഡി സ്ഫോടകവസ്തുക്കൾ സ്ഥാപിച്ചിട്ടുണ്ടെന്നും ഉച്ചയ്ക്ക് 1.30-ഓടെ ഇവ പൊട്ടിത്തെറിക്കുമെന്നുമാണ് അവകാശപ്പെട്ടത്. ഭീഷണിയെത്തുടർന്ന് കെട്ടിടത്തിൽ നിന്ന് ജീവനക്കാരെ ഒഴിപ്പിച്ചു. ബോംബ് ഡിസ്പോസൽ സ്ക്വാഡും ഫയർഫോഴ്സും പോലീസും ചേർന്ന് നടത്തിയ വിശദമായ പരിശോധനയിൽ സംശയാസ്പദമായ ഒന്നും കണ്ടെത്താനായില്ല. ഇതോടെ ഇതൊരു വ്യാജ ഭീഷണിയാണെന്ന് പോലീസ് സ്ഥിരീകരിച്ചു.
സ്ഫോടന ഭീഷണിക്ക് പുറമെ, തമിഴ്നാട്ടിലെ സ്വാധീനശക്തിയുള്ള ഒരു രാഷ്ട്രീയ നേതാവിന്റെ ചെറുമകനെ തട്ടിക്കൊണ്ടുപോകുമെന്ന മുന്നറിയിപ്പും സന്ദേശത്തിലുണ്ടായിരുന്നു. ‘Kiruthiha.udhayanidhi@hotmail’ എന്ന ഐഡിയിൽ നിന്നാണ് ഈ സന്ദേശം വന്നതെന്ന് പോലീസ് വൃത്തങ്ങൾ സൂചിപ്പിച്ചു.
