മാച്ചെർല: ആന്ധ്രപ്രദേശിലെ പൽനാട് ജില്ലയിൽ പ്രണയവിവാഹം കഴിച്ചതിന് 22-കാരിയായ മകളെ മാതാപിതാക്കൾ ശ്വാസം മുട്ടിച്ച് കൊലപ്പെടുത്തി. മാച്ചെർല ടൗൺ സ്വദേശിയായ ചൗഡേശ്വരിയാണ് കൊല്ലപ്പെട്ടത് (Chowdeshwari Murder Case). കൊലപാതകം ആത്മഹത്യയാണെന്ന് വരുത്തിതീർക്കാൻ കുടുംബത്തെ സഹായിച്ച സിഐ സർവീസിൽ നിന്ന് സസ്പെൻഡ് ചെയ്തു.
കഴിഞ്ഞ മാസം പകുതിയോടെയാണ് നാടിനെ നടുക്കിയ സംഭവം നടന്നത്. വീട്ടുകാരുടെ എതിർപ്പ് മറികടന്ന് മാർച്ച് 4-ന് ചൗഡേശ്വരി കാമുകനെ വിവാഹം കഴിച്ചിരുന്നു. തുടർന്ന് കുടുംബം നൽകിയ പരാതിയിൽ പോലീസ് അന്വേഷണം നടത്തുകയും മാർച്ച് 15-ന് ദമ്പതികളെ കണ്ടെത്തുകയും ചെയ്തു. എന്നാൽ, ചൗഡേശ്വരിയെ ഭീഷണിപ്പെടുത്തി മാതാപിതാക്കളുടെ അടുത്തേക്ക് പോകാൻ സിഐ നിർബന്ധിച്ചതായി അന്വേഷണത്തിൽ കണ്ടെത്തി.
വീട്ടിലെത്തി മൂന്നാം ദിവസം ചൗഡേശ്വരിയെ മരിച്ച നിലയിൽ കണ്ടെത്തുകയായിരുന്നു. മകൾ ആത്മഹത്യ ചെയ്തു എന്നായിരുന്നു വീട്ടുകാർ ആദ്യം പറഞ്ഞിരുന്നത്. എന്നാൽ പോസ്റ്റ്മോർട്ടം റിപ്പോർട്ട് പുറത്തുവന്നതോടെയാണ് കൊലപാതക വിവരം പുറത്തറിഞ്ഞത്. ഉറങ്ങിക്കിടക്കുകയായിരുന്ന യുവതിയെ തലയണ ഉപയോഗിച്ച് ശ്വാസം മുട്ടിച്ച് കൊല്ലുകയായിരുന്നു എന്ന് ഡോക്ടർമാർ സ്ഥിരീകരിച്ചു.
സംഭവത്തിൽ ചൗഡേശ്വരിയുടെ പിതാവ് ചന്ദ്രശ്രീനുവിനെയും മറ്റൊരു ബന്ധുവിനെയും പോലീസ് അറസ്റ്റ് ചെയ്തു. കുടുംബത്തിൽ നിന്ന് കൈക്കൂലി വാങ്ങി കൊലപാതകം മറച്ചുവെക്കാനും തെളിവ് നശിപ്പിക്കാനും ശ്രമിച്ചതിനാണ് ഉദ്യോഗസ്ഥനെതിരെ നടപടിയെടുത്തത്. ബാങ്ക് രേഖകളും സാമ്പത്തിക ഇടപാടുകളും പരിശോധിച്ച ശേഷം ഉദ്യോഗസ്ഥനെതിരെ ക്രിമിനൽ കേസെടുക്കാനും സാധ്യതയുണ്ട്.
Summary: In a tragic case of suspected honor killing in Andhra Pradesh, a 22-year-old woman named Chowdeshwari was allegedly murdered by her father for marrying against the family’s wishes. While the family initially claimed it was a suicide, the post-mortem revealed she was suffocated with a pillow. A Circle Inspector has been suspended for allegedly taking a bribe to cover up the murder and forcing the woman to return to her parents before the incident.
