This Content Is Only For Subscribers
അലാസ്കയിലെ കഠിനമായ മഞ്ഞുകാലം. താപനില പൂജ്യം ഡിഗ്രിയിലും താഴെ പോകുന്ന ആ സമയത്ത് മിക്ക ജീവികളും സുരക്ഷിതമായ ഇടങ്ങളിലേക്ക് ഒളിക്കുമ്പോൾ, അലാസ്കൻ വുഡ് ഫ്രോഗ് സ്വീകരിക്കുന്നത് ലോകത്തെ തന്നെ അമ്പരപ്പിക്കുന്ന ഒരു രീതിയാണ്.(The Alaskan wood frog, a biological marvel)
ശരീരം കട്ടപിടിക്കുന്ന മഞ്ഞായി മാറിയിട്ടും മരിക്കാത്ത ഒരേയൊരു കൗകതുക ജീവിയാണ് ഇവ. ഇതിനെ ഒരു തരം “താൽക്കാലിക മരണം” എന്ന് വിളിക്കാം. തണുപ്പ് കൂടുമ്പോൾ ഇവയുടെ ശരീരത്തിലെ 60% മുതൽ 70% വരെ ജലാംശം മഞ്ഞുകട്ടയായി മാറും. ഈ സമയത്ത് തവളയുടെ ശ്വസനവും ഹൃദയമിടിപ്പും പൂർണ്ണമായും നിലയ്ക്കും.
സാധാരണഗതിയിൽ കോശങ്ങൾക്കുള്ളിലെ വെള്ളം മരവിച്ചാൽ കോശങ്ങൾ വിണ്ടുകീറി നശിച്ചുപോകും. എന്നാൽ മഞ്ഞുകാലം തുടങ്ങുന്നതോടെ ഇവയുടെ കരൾ വൻതോതിൽ ഗ്ലൂക്കോസ് ഉത്പാദിപ്പിക്കുന്നു. ഈ പഞ്ചസാര ലായനി കോശങ്ങൾക്കുള്ളിലെ വെള്ളം മരവിക്കുന്നത് തടയുന്നു; ഇതൊരു സ്വാഭാവിക ആന്റി-ഫ്രീസ് പോലെയാണ് പ്രവർത്തിക്കുന്നത്. ഇത്തരത്തിൽ കോശങ്ങൾക്ക് പുറത്തുള്ള ദ്രാവകം മരവിച്ച് തവള ഒരു കല്ല് പോലെ കട്ടിയാകുമെങ്കിലും, ഉള്ളിലെ പ്രധാന അവയവങ്ങൾ ഈ ഗ്ലൂക്കോസ് കവചം കാരണം സുരക്ഷിതമായിരിക്കും.
ജീവിതരീതിയും പ്രത്യേകതകളും
വടക്കേ അമേരിക്കയിലെയും അലാസ്കയിലെയും വനങ്ങളിൽ കാണപ്പെടുന്ന ഈ കൊച്ചു തവളകൾക്ക് ഏകദേശം 3 മുതൽ 8 സെന്റീമീറ്റർ വരെ മാത്രമേ നീളമുണ്ടാകൂ. കണ്ണുകൾക്ക് ചുറ്റുമുള്ള കറുത്ത പാടുകൾ ഇവയ്ക്ക് ഒരു മാസ്ക് ധരിച്ച രൂപം നൽകുന്നു. പ്രാണികൾ, ചിലന്തികൾ, വിരകൾ എന്നിവയെ ഭക്ഷണമാക്കുന്ന ഇവയ്ക്ക് ഏകദേശം 3 മുതൽ 5 വർഷം വരെയാണ് ആയുസ്സ്. മൈനസ് 18 ഡിഗ്രി സെൽഷ്യസ് വരെ താഴ്ന്ന താപനിലയിൽ മാസങ്ങളോളം അതിജീവിക്കാൻ ഇവയ്ക്ക് പ്രത്യേക കഴിവുണ്ട്.
വസന്തകാലത്തെ ഉയിർത്തെഴുന്നേൽപ്പ്
മഞ്ഞുകാലം കഴിഞ്ഞ് ചൂട് കൂടുമ്പോൾ അത്ഭുതകരമായ മറ്റൊരു കാര്യം സംഭവിക്കുന്നു. പുറത്തെ ഐസ് ഉരുകുന്നതിനനുസരിച്ച് തവളയുടെ ഉള്ളിലെ അവയവങ്ങളും പ്രവർത്തനക്ഷമമാകും. ആദ്യം ഹൃദയം വീണ്ടും തുടിക്കാൻ തുടങ്ങുന്നു, തൊട്ടുപിന്നാലെ ശ്വസനവും മസ്തിഷ്ക പ്രവർത്തനങ്ങളും തിരിച്ചെത്തുന്നു. ഐസ് ഉരുകി മിനിറ്റുകൾക്കുള്ളിൽ തന്നെ ഇവ സാധാരണ നിലയിലാവുകയും ഭക്ഷണവും പങ്കാളിയെയും തേടി യാത്ര തുടങ്ങുകയും ചെയ്യും. പ്രകൃതിയിലെ ഏറ്റവും മികച്ച സമ്മർദ്ദ അതിജീവനത്തിന് ഉദാഹരണമാണ് ഈ കൊച്ചു തവള.
Summary
The Alaskan wood frog (Lithobates sylvaticus) is a biological marvel, famous for being the only frog found north of the Arctic Circle and for its “superpower”: surviving the winter by literally freezing solid. Unlike most frogs that hibernate underwater to avoid freezing, the Alaskan wood frog hibernates on land, tucked under leaf litter.
