കൊച്ചി: കോൺഗ്രസിനുള്ളിൽ തർക്കങ്ങളുണ്ടെന്ന വാർത്തകൾ വെറും മാധ്യമസൃഷ്ടി മാത്രമാണെന്ന് പ്രതിപക്ഷ നേതാവ് വി.ഡി. സതീശൻ. യുഡിഎഫ് ഒറ്റക്കെട്ടായാണ് തിരഞ്ഞെടുപ്പിനെ നേരിടുന്നതെന്നും സിപിഎം പടച്ചുവിടുന്ന നരേറ്റീവുകൾ ജനങ്ങൾ ചിരിച്ചുതള്ളുമെന്നും അദ്ദേഹം പറഞ്ഞു.(There are no problems in the Congress, says VD Satheesan)
യുഡിഎഫിന്റെ 140 സ്ഥാനാർത്ഥികളും മണ്ഡലങ്ങളിൽ പ്രചാരണം ആരംഭിച്ച് കഴിഞ്ഞു. എന്നാൽ എൽഡിഎഫിനും എൻഡിഎയ്ക്കും പലയിടങ്ങളിലും ഇപ്പോഴും സ്ഥാനാർത്ഥികളെ പ്രഖ്യാപിക്കാനായിട്ടില്ലെന്ന് അദ്ദേഹം ചൂണ്ടിക്കാട്ടി. സ്ഥാനാർത്ഥി പട്ടികയിൽ നിന്ന് മാറിനിൽക്കേണ്ടി വന്നവരും പാർട്ടിയുടെ അവിഭാജ്യ ഘടകമാണ്. അവരെയെല്ലാം ചേർത്തുപിടിച്ച് മുന്നോട്ട് പോകുമെന്നും അദ്ദേഹം ഉറപ്പുനൽകി.
കോൺഗ്രസ് പട്ടികയിൽ സ്ത്രീ പ്രാതിനിധ്യം കുറഞ്ഞുപോയതിൽ വിഷമമുണ്ടെന്ന് അദ്ദേഹം പറഞ്ഞു. മുഖ്യമന്ത്രി സ്ഥാനാർത്ഥിയെ ചൊല്ലിയോ നേതാക്കളുടെ ചിത്രം പോസ്റ്ററുകളിൽ വയ്ക്കുന്നതിനെ ചൊല്ലിയോ യാതൊരു തർക്കവുമില്ല. കോൺഗ്രസിന് കരുത്തുറ്റ ഒരു നേതൃനിരയുണ്ടെന്നും അദ്ദേഹം പറഞ്ഞു.
