കൊച്ചി: കേരളത്തിന്റെ വികസനത്തിന് പുത്തൻ വേഗം പകർന്ന്, 10,800 കോടി രൂപയുടെ വിവിധ വികസന പദ്ധതികൾക്ക് പ്രധാനമന്ത്രി നരേന്ദ്ര മോദി തുടക്കം കുറിച്ചു. ദേശീയപാത 66-ന്റെ ആദ്യ റീച്ച് ഉൾപ്പെടെയുള്ള നിർണ്ണായക പദ്ധതികളുടെ ഉദ്ഘാടനമാണ് അദ്ദേഹം നിർവഹിച്ചത്. കൊച്ചിയിൽ വരുന്നത് എപ്പോഴും സന്തോഷകരമായ അനുഭവമാണെന്നും ഈ വികസന പദ്ധതികൾ നാടിന്റെ പുരോഗതിക്ക് വലിയ മുതൽക്കൂട്ടാകുമെന്നും പ്രധാനമന്ത്രി പറഞ്ഞു.(Coming to Kochi is a good experience, PM Modi inaugurates projects)
‘മെയ്ക്ക് ഇൻ ഇന്ത്യ’ വഴി പെട്രോളിയം മേഖലയിൽ വലിയ മാറ്റങ്ങൾ കൊണ്ടുവന്നു. പുതിയ പോളിപ്രോപ്പിലീൻ യൂണിറ്റ് വ്യവസായ രംഗത്ത് വലിയ മാറ്റങ്ങൾക്ക് വഴിവെക്കുമെന്ന് പ്രധാനമന്ത്രി ചൂണ്ടിക്കാട്ടി. കലൂരിൽ നടന്ന ചടങ്ങിൽ ഗവർണർ രാജേന്ദ്ര അർലേക്കർ, കേന്ദ്രമന്ത്രിമാരായ ജോർജ് കുര്യൻ, സുരേഷ് ഗോപി, ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ, ഹൈബി ഈഡൻ എം.പി തുടങ്ങിയവർ പങ്കെടുത്തു.
നെടുമ്പാശേരി വിമാനത്താവളത്തിൽ ചീഫ് സെക്രട്ടറി ഡോ. എ. ജയതിലക്, ഡിജിപി റവാഡ ചന്ദ്രശേഖർ, ജില്ലാ കളക്ടർ ജി. പ്രിയങ്ക എന്നിവരുടെ നേതൃത്വത്തിൽ ഔദ്യോഗിക സ്വീകരണം നൽകി. ഔദ്യോഗിക വികസന പരിപാടികൾക്ക് പുറമെ രാഷ്ട്രീയ പരിപാടികളിലും പ്രധാനമന്ത്രി പങ്കുചേർന്നു. മറൈൻ ഡ്രൈവിലെ ധീവരസഭയുടെ ഗോൾഡൻ ജൂബിലി ആഘോഷത്തിൽ പങ്കെടുത്ത ശേഷം കലൂർ സ്റ്റേഡിയത്തിൽ നടന്ന ആവേശകരമായ റോഡ് ഷോയ്ക്ക് ശേഷമാണ് അദ്ദേഹം ഉദ്ഘാടന വേദിയിലെത്തിയത്.
വികസന പദ്ധതികളുടെ ഉദ്ഘാടനത്തിന് ശേഷം കലൂർ സ്റ്റേഡിയത്തിലെ രണ്ടാമത്തെ വേദിയിൽ എൻഡിഎയുടെ നിയമസഭാ തെരഞ്ഞെടുപ്പ് റാലിയും അദ്ദേഹം ഉദ്ഘാടനം ചെയ്യും. ഇതോടെ കേരളത്തിലെ എൻഡിഎയുടെ ഔദ്യോഗിക പ്രചാരണ പ്രവർത്തനങ്ങൾക്ക് തുടക്കമാകും. വൈകുന്നേരം 2.30-ഓടെ അദ്ദേഹം തമിഴ്നാട്ടിലെ തിരുച്ചിറപ്പള്ളിയിലേക്ക് തിരിക്കും.
