ബെയ്റൂട്ട്: ഇസ്രായേലിന്റെ പൂർണ്ണതോതിലുള്ള കരയുദ്ധം മുന്നിൽക്കണ്ട് തന്ത്രങ്ങൾ മാറ്റി ഇറാൻ അനുകൂല സായുധ സംഘടനയായ ഹിസ്ബുള്ള (Hezbollah Guerrilla Warfare Lebanon). മുൻ യുദ്ധങ്ങളിൽ നിന്നുള്ള പാഠങ്ങൾ ഉൾക്കൊണ്ട്, തെക്കൻ ലബനനിൽ ഗറില്ലാ യുദ്ധമുറകളിലേക്ക് സംഘടന തിരിച്ചെത്തിയതായി റിപ്പോർട്ടുകൾ വ്യക്തമാക്കുന്നു. ഇസ്രായേൽ സൈന്യത്തെ നേരിടാൻ ചെറുകിട യൂണിറ്റുകളായാണ് ഇപ്പോൾ ഹിസ്ബുള്ള പോരാളികൾ പ്രവർത്തിക്കുന്നത്.
ഇസ്രായേലിന്റെ നിരീക്ഷണ സംവിധാനങ്ങളിൽ നിന്നും ഫോൺ ചോർത്തലുകളിൽ നിന്നും രക്ഷപ്പെടാൻ ആശയവിനിമയ ഉപകരണങ്ങളുടെ ഉപയോഗം ഹിസ്ബുള്ള കർശനമായി നിയന്ത്രിച്ചിരിക്കുകയാണ്. 2024-ലെ യുദ്ധത്തിൽ പേജറുകളും ഫോൺ നെറ്റ്വർക്കുകളും ഇസ്രായേൽ ഹാക്ക് ചെയ്തത് ഹിസ്ബുള്ളയ്ക്ക് കനത്ത തിരിച്ചടിയായിരുന്നു. ഇത് കണക്കിലെടുത്ത്, ഇലക്ട്രോണിക് ഉപകരണങ്ങൾ പൂർണ്ണമായും ഒഴിവാക്കിയുള്ള ആശയവിനിമയ രീതികളാണ് അവർ ഇപ്പോൾ പിന്തുടരുന്നത്. കൂടാതെ, ടാങ്ക് വിരുദ്ധ മിസൈലുകളുടെ ഉപയോഗത്തിലും നിയന്ത്രണം ഏർപ്പെടുത്തിയിട്ടുണ്ട്.
ഇസ്രായേൽ വ്യോമാക്രമണത്തിലൂടെ മുതിർന്ന കമാൻഡർമാരെ വധിക്കുന്നത് തടയാൻ ഹിസ്ബുള്ള ഓരോ കമാൻഡർമാർക്കും നാല് ഡെപ്യൂട്ടിമാരെ വീതം നിയോഗിച്ചതായാണ് വിവരം. പ്രധാന കമാൻഡർ കൊല്ലപ്പെട്ടാലും പ്രവർത്തനങ്ങൾ തടസ്സമില്ലാതെ തുടരാൻ ഇത് സഹായിക്കും. ഇറാന്റെ പരമോന്നത നേതാവ് അലി ഖൊമേനി കൊല്ലപ്പെട്ടതിന് പിന്നാലെയാണ് ഹിസ്ബുള്ള ഇസ്രായേലിന് നേരെ പുതിയ ആക്രമണങ്ങൾ തുടങ്ങിയത്. ഇറാന്റെ നേതൃത്വം യുദ്ധത്തെ അതിജീവിക്കുമെന്നും ഒരു പ്രാദേശിക വെടിനിർത്തൽ ഉണ്ടാകുമെന്നുമാണ് ഹിസ്ബുള്ളയുടെ കണക്കുകൂട്ടൽ.
ലബനൻ, ഇസ്രായേൽ, സിറിയ അതിർത്തികൾ സംഗമിക്കുന്ന ഖിയാം പട്ടണത്തിന് സമീപമാണ് നിലവിൽ പോരാട്ടം കേന്ദ്രീകരിച്ചിരിക്കുന്നത്. ഇസ്രായേൽ കരസേന ലബനനിലേക്ക് പ്രവേശിക്കാൻ സാധ്യതയുള്ള പ്രധാന മേഖലയാണിത്. സിറിയയിൽ ബാഷർ അൽ അസദ് ഭരണകൂടം വീണതോടെ ഇറാനിൽ നിന്നുള്ള ആയുധ വിതരണ പാത തടസ്സപ്പെട്ടത് ഹിസ്ബുള്ളയ്ക്ക് വലിയ വെല്ലുവിളിയാണ്. എന്നിരുന്നാലും, 2024-ലെ വെടിനിർത്തലിന് ശേഷം പിൻവാങ്ങിയ ഹിസ്ബുള്ളയുടെ എലൈറ്റ് ‘റദ്വാൻ’ (Radwan) സേന വീണ്ടും അതിർത്തിയിൽ തിരിച്ചെത്തിയതായി റിപ്പോർട്ടുകൾ സൂചിപ്പിക്കുന്നു.
Summary:
Hezbollah is bracing for a potential full-scale Israeli ground invasion by returning to its guerrilla warfare roots in South Lebanon. According to sources, the group is operating in small units, avoiding electronic communication devices to prevent Israeli tapping, and rationing anti-tank missiles.
