വാഷിംഗ്ടൺ: വരാനിരിക്കുന്ന മിഡ്ടേം തിരഞ്ഞെടുപ്പിൽ രാഷ്ട്രീയ തിരിച്ചടിയുണ്ടാകുമെന്ന മുന്നറിയിപ്പുകൾ അവഗണിച്ച് ഇറാനെതിരെയുള്ള സൈനിക നീക്കവുമായി പ്രസിഡന്റ് ഡൊണാൾഡ് ട്രംപ് മുന്നോട്ട് പോകുന്നത് (Trump Iran War Political Risk). യുദ്ധം വരും ആഴ്ചകളിലും തുടരുമെന്നും കൂടുതൽ അമേരിക്കൻ സൈനികർ കൊല്ലപ്പെട്ടേക്കാമെന്നും ട്രംപ് മുന്നറിയിപ്പ് നൽകി. നിലവിൽ മൂന്ന് യുഎസ് സൈനികർ കൊല്ലപ്പെട്ടതായി സ്ഥിരീകരിച്ചിട്ടുണ്ട്. യുദ്ധം നീണ്ടുപോകുന്നത് എണ്ണവില വർദ്ധിപ്പിക്കുമെന്നും അത് വോട്ടർമാരെ സ്വാധീനിക്കുമെന്നുമാണ് റിപ്പബ്ലിക്കൻ പാർട്ടിക്കുള്ളിലെ ആശങ്ക.
യുദ്ധവിരുദ്ധ നിലപാടുള്ള ട്രംപിന്റെ ‘മാഗ’ (MAGA) വോട്ടർമാർ ഈ നീക്കത്തിൽ അതൃപ്തരാണെന്ന് റോയിട്ടേഴ്സ്/ഇപ്സോസ് പുറത്തുവിട്ട പോൾ വ്യക്തമാക്കുന്നു. നാലിലൊന്ന് അമേരിക്കക്കാർ മാത്രമാണ് ഈ ആക്രമണത്തെ അനുകൂലിക്കുന്നത്. ഗാർഹിക ചിലവുകളും ആരോഗ്യ മേഖലയും ചർച്ചയാകേണ്ട തിരഞ്ഞെടുപ്പ് കാലത്ത് യുദ്ധം മുൻഗണനയാകുന്നത് പാർട്ടിക്ക് ദോഷം ചെയ്യുമെന്ന് ട്രംപിന്റെ ഉപദേശകർ മുന്നറിയിപ്പ് നൽകുന്നു. എന്നാൽ, ശക്തനായ നേതാവ് എന്ന പ്രതിച്ഛായ വർദ്ധിപ്പിക്കാനാണ് ട്രംപിന്റെ ശ്രമം. ഇറാൻ പരമോന്നത നേതാവ് ഖമേനി ഉൾപ്പെടെയുള്ള 15 ഉന്നത നേതാക്കൾ കൊല്ലപ്പെട്ടതും ടെഹ്റാനിലെ രഹസ്യാന്വേഷണ ആസ്ഥാനം തകർത്തതും ട്രംപിന്റെ വിജയമായി വൈറ്റ് ഹൗസ് വക്താവ് കരോലിൻ ലീവിറ്റ് വിശേഷിപ്പിച്ചു.
